Min chibai

Nia, min chibai a, mahse ka lai miahlo,  "E...Ka lo chibai tawh ang che" a ti a, kan in chibai a, kan inchibai dan chu in chibai dan pangngai ang hi a ni a, kan in vuan reng lova, kan in thlah thuai heklo, smiling face nen kan in en a, a bul ah chuan naupang duhawm tak a awm a, kan vel ah chuan mi chi hrang hrang an awm nghe nghe. Titi phungleng leh hmalak tumdan tlem kan sawi thuak a, kan inthen chu a ni leh mai. Ngaihtuah zui pawh nei chuanglo in  kan hna lam ka ngaihven a, chu chu tukin dar 9:00AM vel kha a ni a, he site kan buatsaih hnu a lawmthu sawina atana min chibai hmasabertu Pastor Lalropuia nen a kan in chibai dan chu a ni.

A ni hi Hmarveng ah Pro Pastor niin hun engemaw chen a rawn awm a, tun ah phai lamah Pastor hna thawk in a awm a, an veng ah a pawm thlap a, a ni aia lo awm rei tawh pawhin pemthar/ mikhual an ti chuanglo a, an lo admit thlap kha ani. Tun ah a naute la awmin a home town ang maiin chawlh hmangin a lo haw chhuak zeuh zeuh thin a, chumai ni lovin  a nakruhbo a hmuhna khua  a ni a, kan tan a ni hi mikhual a ni thei ngai lovang.

Site kan hawn hnu lawk khan a in register a, regular visitor a ni nghal a, ka haw veleh Admin ka chibai ang a tih kha a rawn tipuitling ta a ni. Keimahni lam kan in thlir a kan site hi in chibaina tham khawp in a  felfailo va, a thuken lah a nep viau si hian ka hre thung.

Mizote hi hmasawnna kawng zawh awlsam tak kan ni a, thiamleh thiamlo pawn kan risk buaih a kan ti thei zel mai leh nghal a, chutiang chu ka nih ve tho avangin in sitna hi kei aiin a palian daih zawk fo thin a, chuti chunga "In ti tha e. A lawmawm tak tak a ni" tih paha in chibai kher hi chu a lawmawm dan a thuah hnih em a, han sawipunglo thei ka nilo.

Mite hmalakna leh mite thiltih sawisel mai te, mi te hlawhtlinna a lungawiloh maite hi kan hnam zia chikhat emaw tih mai tur ani a, thenawmte hausdakna ah kanlungawi lova, veng chhung ro relna ah kan lungawi lova, Malsawmna dawng chhah deuhte lakah kan vui bawk fo thin. Keimahni chan leh kan dawnlam reng reng ngaihtuah lovin mite chan kan thlir a, thiante kuta sahrang kan hmu liana, chu chuan lungawilohna leh phunchiarna ah min hnuk lut ta mai anih hi.

Mahse, Pu Lalropuia chuan kan hlawhtlinna(hlawhtlinna a ni em ka hre chiah lova) ah lawmthu sawiin min chibai a, a lawmawm in a entawn tlak hle mai, mi puitling nge nge chu tlukloh rim a lo nam nge nge e.

Babulon luikama Israel fate an tap lai mitthla ah hmu miahlo mah ila Tlawnglui kamah hian ngaihtuahna tamtak chu ka seng ve ta. He luipui Mizorama Lui seiber hi eng ang taka Zofate tana  tangkai nge anih ang le? A kam sir tuak chu Balu thami in a khat tlat a, a chungah chuan a taima faten nul an siam a, thlai chitin chitang an ti to del dul bawk a. Tui chimchin leh chin lovah chuan tiau lung tha chi hi a awm zui mai bawk nen, chutah mau sei tak taka  tawnkhawm hi a rawn len thla dul dul a, chungte chu Zoram mau Paper mills a an hralh tur mahader in a thiar vel hi an ni nghe nghe a.

Luipui chhung ah cuan nungcha tinregn an awm emaw tih turin an tleng dul dul a, a te leh lian  kawr nei leh neilo, ke neilo te, ke tamtak neite an cheng ho bawk . He luipui hian chawm leh hrai a ngah zia te ka ngaihtuah thin.

He luipui ah ngei maihian Mizoram atana a vawikhatna ni turin 1st Mizoram  Open rowing championship kan buatsaih a, A tuihleuh thiamlo ber tur hi Aquatics Association ah secretary ka nih ve vah  tak si ah chuan ka liam thla tlut tlut a, nuam ve viau mai. Aizawllam atangin hotu liante an lo chhuk bawka, kan district lam atanga hruaitute pawh kanthawkrip ve hle bawk. Intihsiakna beitu erawh chu Bairabi leh Hortoki an ni deuhber.

Ka sawi duh tak chu Khawvela thil reng reng te hi Pathianin duh taka a siamte vek an ni a, tangkaina hi an lo nei vek mai. Kei pawh, nang pawh  Pathianin  tangkaina nei tura a siam kanni. Chhungte tan te, thenawm khawveng tan te, ram tan, khawtlang leh Kohhran tantea tangkai tura siam kan ni. Engahmah tangkaina neilo a i awm a nih chuan pathian in a din chhan leh Khawvela i lo awm ve chhan i ti hlawhtlinglo tihna a ni a, chuvangin i insiamthat thuai a pawimawh tihna a ni ang. Mitin hian hlutna leh ropuina leh tangkaina kan nei vek si a. http://northkolasib.org/