Thursday, January 31, 2013

Music Ministry (RALDONA magazine tan)

                             

                                   MUSIC MINISTRY
                                                                                                      I C. Lalthanmama
                                                                                                      Leader
                                                                                                      Western Division Songsters


         Chhandamna Sipai Pawl, Pathian Kohhran ropui tak ti ropuitu, a dintirh atang renga vawiin thlenga hmanraw thaber la ni fan reng chu rimawi rawngbawlna hi a ni.Rimawi rawngbawlna hi a Pathian thu em em a, a sipai bawk a, chuvangin kan Pathian biakna ah hian hmun pawimawhber  a luahlo theilo.

        Rimawi hian hnamtin min hnaih em em theuh a, chuvangin chhandamna kawnga mite hruainan leh mi thlarau chawh harh a, tih hlim nan chuan a la pawinawhber lawrlak bawk. He rawngbawlna hi kan kalsan emaw kan hlamchhiah a nih vaih chuan kan rawngbawlna hi ke lehlam bul ang maiin a awm ang. Hringnun hi rimawi hian a luah tlat a, mi a piantirh atanga a thih ni thleng in rimawi hian a kalsan ngailo.Heti fakaua hringnuna pawimawh a nih vang hian Setana pawh hian ralthuam thaber atan a hmang ve reng a nih hi.

        Tuna kan dinhmun: Corps/Kohhran tinah hian rimawi hian hmun a chang tha hle nachungin ngaihthah a hlawh hle bawk. Kohhran inkhawm hi Zai tellovin kan ti thei lova, mihlim pawh zai tello chuan a hlim thei tak tak lo. Vawikhat kan inkhawm hian Thusawi aiin zaiin hun a changtam mah zawk a, chutiang chu kan dinhmun ni mahse hmasawn tumna emaw hmanraw thar ngaihtuah emaw lamah chuan rilru kan seng tamlo hle hlawm. Kan khuang leh rimawi hmanraw dangte hian duat leh enkawl ngun an hlawh lo hle a, kan inkhawm zai kalphung pawhin hmasawnna a nei hranlo hle. Kan zaipawl leh Band te hi rorelna hmun ah sawi chhuah an hlawh lo hle a, a tel lova kan awm theih loh rim awi leh a hmanruate chu diktak chuan kan ngaithah a ni.

        Kan Corps zaipawlte pawh, vawi 1 hla rem turin a tlember ah vawi 5 tal hla zira an chhuah a ngai a, mamawh tamtak an neihte pawh chu ngaihtuahpui an ni zen zenlo fo, thiam tak leh mawi taka zai tur erawh chuan kan duh reng thung si. Band leh rimawi pawl dangte pawh Item nei a, tha taka inlanfo tur chuan kan duh naa, an mamawh leh hma an sawnna tur chu kan  ngaihthah fo bawk.

        Hetia ngaihtuahna leh tanpuina em em pawh neilo chung hian thatakin Item neiin hun an la hmang reng thei a, kan Biakin inkhawm zai pawh a la tha reng mai, Pathian hian rimawi rawngbawlna hi a hniam a phal lova kan ngaihthah chung pawhin a kal reng a nih hi.
        Chhandam nan: Kan tum ber Sipai Pawl pian chhan Thlaraubo chhandam nan he rawngbawlna hi hlan ila, kan Band hamte, kan zaipawl sak te hian mite thlarau chawk nung sela,  thlaraubote pawh hruaikir rawh se.Kan Inkhawm zaite pawh hi a satute  tan mai nilo, inkhawm velote hian malsawmnan lo hmang sela, Pathian lama rilru an siam nan lo hmang teh se. Chu chu kan  din chhan a ni si.

        Chutiang tak tur chuan rilru kan seng tawh em? mipui hmaa show tur ringawt kan ni lova, mite chhandam nana zai, band ham kan ni tih hi kan hriatreng ka duh takzet.

        Sipai pawl ngaihdan: Ri thei tawh phawt chu Lalpa fak nana hman hi Sipai Pawl duhdan a ni a, a hman pawh a hmang nasa hle reng a ni.Rimawi hi a hrechiang a, a ngaihlu a, a ngaisang bawk, a pawimawhna a hria a, a tangkaina pawh a hrebawk, a hlutna leh a tangkaina ang ngeia hman chhuah hi Sipai Pawl tum chu a ni reng.

        Sipai Pawl rawngbawlna hmun reng reng ah chuan Rimawi hi No1 a ni a, ringlo mite leh mi hlate hruai nan a hmang a, a nghet sa te thlarau nun chawm nan a hmang bawk. Hei vang hian a enkawlna dan pawh mumal leh fel takin a nei nghe nghe a ni.

        Hmasawn nan: (1). Rimawite hi rawngbawlnan uar leh zualin hmang ila, keimahni intih lungawina mai nilo, midangte tana malsawmna ni phak turin bei ila, tih tak zeta beiin midangte chhandamna ni ngei turin buatsaih ang u.
(2) Naupang lam (YP) lamah hian nasa leh zualin  zirtir ila, music bulbal atangin zirtirna pe ila, zai zirtir ila, zai pui hnem bawk ila.
(3) Hnam zia rang mila rimawi rawngbawlna hi kalpui deuh deuh tum ila, hnamdang zia paih hret hret bawk ila,
 (4) Thalai leh puitling zawk ten thiamna sang zawk nei turin zirna uar ila, midangte zirtir chhawng thei tur khawp thiamna neih ngei tum ila.
(5) Inkaihhruaina mumal tak kan neih hi hmang tangkai ila, phuahchawp taka in kaihhruaina leh in relbawlna hi kalsan deuh deuh ila,
(6) Tunlai mil a rimawi rawngbawlna  hmang thiam turin mahni in siamrem ila, thalai nun hi a advance hle a, music pawh a advance bawk a, kum upa lam ten hriatthiamna an neihloh chuan sawi nawn ngailo in upa leh thalai a in thliar mai thin.

        Mizo hlimna lanchhuah tirna nasa ber chu zai leh lam ah a ni, Biakin zai a that loh chuan lam pawh an tlem nge nge, chuvangin kan Corps theuh ah Khuangpu thiam engzat nge kan neih? khuang tha  eng ang nge kan neih? khuang vuakna eng ang nge kan neih dan in enfiah ila, hamsawnna tur kan nei ngei ang. Khuang vuak leh hla hruaina lama tui an awm phei chuan seminar leh in rawnkhawmna neih fo pawh hi thil tih makmawh a ni.

        Pathian hian Amah faktur in min duh a, a chhandamna ropui tak leh A malsawmna nasa tak vang ringawt pawh hian fak tur kan ni. Mahse Pathian meuh fak tur chuan tih theih kan nei tamlo hle mai. Zai leh rimawi leh Lam bak hi mihringte hian tihtheih kan nei lo a nih hi. Khuangte, Tingtangte, Dar leh rithei chitin rengin  Amah fak turin min ti a, kan awte pawh Tawtawrawt anmg maia ri tuarh tuarh turin min duh a, chu chu  mihringte hnena a beisei let chu a ni. Chuvangin Rimawi rawngbawlna hi kan hnualsuat thei lova, kan hlamchhiah thei lova, kan ngaihththah thei heklo, hmasawn zel tur leh nasa zawka bei chhunzawm zel tur zawk kan ni. Kan thiam dan te, kan hmanraw neih ang te chu a in anglo vek ngei ang, mahse kan thlenchin theuh atang khan hmasawn tur kan ni e. Rimawi hi awmlo tase he Lei hi chu ruak mai then siar a ni ngei ang le.

        Note: In duhdan ka hre chiahlo a, keima ngaimawh zawng angin ka han ziak ve tawp mai a, in hriatthiam ka beisei, Music ministry ah hian sawitur a tam lutuk a, tlemte a khung len tur chuan a harsa em a ni. Min duhsakna vangin ka lawm e.

He Article hi  RALDONA Magazine in ziak ve tura min sawmna anga ka ziah a ni.

Sunday, January 27, 2013

My Picture -ii



Lung tilengtu
(Thlalak ah hian click rawh)


CHHEIH!




My Picture -i




THLALAK THENKHAT THLIR ANG AW!

(Just Click to Enlarge  Images)



Mistiri Scanza


Thirsakawr Gear


Rairuang a ni lo


Tui khawih bial pap!


Ngiau thing


Hnah kawkalh


Ruah sur (B&W)


Phaizawl pangpar


Tlaiberh Nupa


Dil chhuat char


Pangpar Eng




ZIAH KA CHAK LO

                                                                       ZIAH KA CHAK LO



"Kan chanchinbu hian a nghak reng che a nia" tih tawngkam han hriat  zet chuan beng hi a za zak mai a, Pen leh lehkhapuan laka han thai zung zung mai tak hi ka nap a, mahse, hetiang tawngkam a khat tawka han dawn ve zeuh pawh hian khawlai lunlai taka hrilh ka nih thin vang hian han thai nghal mai chu a rem tlat lo. Chhangchhepa nih a, inchhung enkawltu nih chuan in han thlen hi chuan tih tur leh tihloh tur a lo awm khat tlat thin tawh a,  mi tawngkam mawi pawh mut hmunah chauh kan hrechhuak leh thin.

Lo ziak dawn ta teh reng pawh ni ila, tawnghmang thiam deuh a, eng tawng upa emaw telh ve ngei kha ka duh anga,  chumai a nilo, ka thil ziah tur chu Pathian thu emaw Khawvel lam thil pawh nise, chiang taka ka hriat loh chuan ziahsual ka hlau  dawn si, ka tawn hriatte han thailang dawn ila... ka theihnghilh a tam tawh zawk bawk si a, ka thiam zawng tak midangte tana tangkai tur chhawpchhuah tur ka nei a zeng a ni chuang silo. Mahni rilru a awm ang ang  hi phochhuah mai a tha ang tih rilru han put kan tum chhin a, a chang leh Nula te ka rilru ah a lo lang a, hmana ka sava perhthlak te, thianzaho a chaw kan eikhawm te, sermon te leh kan nu ka tih lungawi dan tur te a awm pawlh vek bawk si. Thliarhrang lova han pholan mai chi zia zang ani silo. Chuvangin Article  hi ZIAH KA CHAKLO.

Krismas a hnai ta hle a, boruak a nuam em em a, Tlangsam par ten dai an ti vul chuk a, mitin mai hi an thar sur hian alang a, nul an leh thlasik thlaithar te chu chhungtin ten kan neikim fur a, Phai lam atangin dan pangngai angin Phai chawhmeh a thleng tha bawk, he hun thawl nuam tak mai ah hian October thlatawp lam atanga lo in mun tawh, Bak leh chhawlhring ten an lo bawr fe tawh  leh Vapaw rual ten an lo venhim ni mai awm tak Zawngtah a thar ta!

Hei zet hi chu a duhlo aiin a duh an tam ngei ngei, Van sang boruak chhia hip phalo tawk a hniam leh leilam vaivut leh bawlhhlawh dawng phalo tawk a sangah a in khai uai diai a, in chhangbung tawk chiahin a te leh lian bawr hrang hrang ah an awm a, make up Artist ten thiam taka nula sam an herh vial ang maia mawi hian thenkhat chu lungawi em em in an  in herh chial a, Mizo pa awmkhawm ang maiin thenkhat tawi deuh thenkhat sei deuh in dung inchenlo furin an han awm a. Hnuai lam atangin a tui tur zia  suangtuah chungin tuktin tlai tin kan thlir a nih kha.

Mau tlawn tha tak, a hmawr sah kak  ngei mai chu a kakpui ah kan han chuan chhuah pui a, hnuai lam atangin, "Kha lai zar ami chu  a la te deuh, helam hi hawlh rawh" an rawn ti bawk a, mau hmawr kak in an kuang a han thil chat hnu a, herh vir map map an han nih chuan an tuar talo a, an la awmna ngai reng reng loh he piallei hi thum tawkin an rawn deng ta. Philipines a to zia leh an ngaihsan zia te, Indonesia a an ei nasat zia te  hre ve miahlo mah ila Dania leh Tomoto nen a han chawhpawlh chu ava tui chiang.

Mahse, Khaini bur ruak emaw. Mau dil hriam tak emaw, a tur ve renga thir pan taka siam ziahkur tello chuan a hel ei ngawt chi si loh a, mahni thiam ang tawk in a kawr tihfai tumin han bei ve mah ila; a bung, a kaw duai,  a lehlam a theihloh, .... harsatna a va tam em,  mahni dang  fah khawp pawh ka tifai thei silo, chuvangin Zawngtah hi tui hle mahse keizawng ZIAH KA CHAK LO.

Ngun takin ka in bih a, hetiang em em hian keimah leh keimah ka la in hmu chiang ngailo, ka in en na  Darthlalang pawh keimah chen zet a ni a, a fiah em em a, langlo lai hi a awmlo hialin a hriat. Ka sam tlema kir deuh anga langte hi lo mam pel ta se, ka va inhmeh dawnlo em, ka biang hi puar deuhin ka khabawr hi lo thau ta se ka va hmelchhe dawn e aw.. Ka khabe kuala  hmul tlemte, hawi zawng pawh neilo a zalen em em a an duhna lam lam an hawikual ka han hmuh chuan hei hi em ni ka nalhna thuruk chu aw tiin ka ngaihtuah hial a, mahse niin ka hrelo.

Ka hmai chu a mam a, bawl chhete pawh a awmlo, khuavang chhinchhiah a awm lova, ka mitmu tihloh chu ka hmel ah rawng dum dang a awmlo. Mahse ka hmel hi a Area a va zim em! Biang, mitko, hnar, hnarngul, khabe, bek... hming an lo neivek niin  ka hmel laitak chu ka hmai a hming neilo awmchhun Biangki sir hi em ni dawn ta le?

Kan bih chiang leh deuh a, ka kamsir chung chiah ah hian a dinglam leh vei lamah hian hmuihmul ka lo nei ve ran a. He hmuihmul hi ka tan a hlu a, a pawimawh bawk, naupang kan nih laiin Sairil tui vawi tamtak ka lo hnawih tawh a, ka beisei aiin leh mi min hrilh aiin a to har a, hmuihmul neilo in ka dmchhung hun hi ka hmang tawh mai dawn nia hriatna ka neih rum rum hnu ah, Isaka chu Abrahama te nupa tan Fa neih theih tawhloh hnu a pek ani ang deuh khan, dam rei man ah a rawn to vev ta nih hi. A mawi leh mawiloh in min tibuai lova, a sei emaw a tawi emaw, a kir emaw a ngil emaw, a dum tha emaw a tuak emaw pawh niraw sek sek ka tan a danglam lo, hmuihmul anih chuan a tawk a, Khawvela hmuihmul neilo an tam vei nen, kei ka hmui berkher,   Kohhran leh khawtlanga kan tangkailoh tehreng nen hmui mawi leh tha pawh ni mah suhse a han hmul ta hi sawisel thei ni hian ka in hrelo reng reng a, ka kalna apiangah  ka kalpui a, ka thut leh ka mut pawhin engmah sawibuai a nei ngailo, ka tan harsatna leh buaina a thlen ngai reng reng lova, chawm leh hrai a ngai lova, rinawm tak in  hmundang khawiah mah kalsawn lovin a tona ngaiah hian tunthleng hian a la awm a ni. Mahse hetiang hi a dinhmun ni mahse, :I hmuihmul kha ziat rawh, a tlem si, a mawilo" min ti tawk hi an awm ta fo.

Kum kha leh chen buaina leh harsatna ani nen kan nei ngi lova, naupangte ka nih lai atangin Sairil tuiin ka chawm a, tun ah ani nen thlamuang taka kan awm dun lai a hetiang thurawn ka dawng hi ka pawmzam thei lova, ka nun hlui ka dawnklir chang phei chuan he ka hmuihmul hi ZIAH KA CHAK LO a ni.