Saturday, August 29, 2015

SAP RAM

Jet Direct Flight

Nia, a peih peih chhiarah kan ti zel ang, mi tu emaw Sapram kal tum a ngaihna hre vaklo ten an lo tangkaipui mial mai thei a sin.
Sapram kal dawn chuan Passport leh Visa neih a ngai tih chu kan hre vek a, neih dan erawh kan hre lem hlei lova, chuchuan reitak min tibuai ve thei a ni.

Tunah chuan Aizawl ah Passport Office a awm taa, a awlsam ta deuh a, Passport neitur erawh chuan Document  neih kim a ngai hle thung.: Birth Certificate hi keini ang putar te chuan kan lo nei ikhaw lo a, chuvangin Court leh Economics And Statistic Department lamah lak tur a ni a, form man leh Affidavit man neuh neuh chu chawi huam ve tur a ni thung. Education Certificate neih a ngai bawk a, Tribal Certificate leh Residential Certificate a la ngai cheu. Hei bakah hian Tax Excemption Certificate pawh a la ngai cheu. Heng document zawng zawng ah hiani hming chu a in ang vek tur a ni a,  pianni leh kum etc pawh a in ang thlap a ngai a, i voter's ID ami nen a in ang vek tur a ni.

Passport application form hi ziah sual phal a nilo a, fimkhur taka fill up tur a ni a, online pawh dilna hi siam theih a ni. Passport fee hi Rs. 2500 vel a ni ang.  Heng zawng zawng  hi mahni buaipui ai chuan hetiang buaipuia inhlawh thin an awm a, chung ho hnenah chuan pawisa pekbelh a buaipui tir theih a ni. Police verification an rawn neih tawh chuan i dilna chu an hmu tihna ani mai.

Tichuan passport nei mah ila Visa kan neih leh a ngai a, hemi nei tur erawh hi chuan midanga in nghah theih vak a ni lova, Kolkata ah Travels Agent rintlak eg Cox & King te eawm  biak a, appointment te lo lak tir a, an kuta in nghah a tha in a him hle. Appointment vawi 1 miss hian hmuh leh mai a harsat avangin imiss loh tum  a tha.

Nangmah ngei Kolkata ah i thlawh thlak a ngai tawh anga, i apllication hrang hrang leh document te chu i Agent te nen in en ho ang, tichuan  Reene Tower lamah visa application ti turin i kal anga, i document leh i passport te i keng ang. Pawn ah i appointment an lo check anga ti chuan metal detector gate paltlangin chhawng chunglamah lift in i chho ang.

I bag leh i pocket zawng zawng security in an check anga, i mobile phone i swich off ngei ngei a ngai bawk. Token number an lo pe ang che a, duty in a luh tir hunah che UK & Ireland tih room ah i lut ang, bangah chuan flat TV a awm nuala tah chuan counter number leh token number a rawn lang anga, i hun  lo thleng tur i nghak ang. I hun a lo thlen chuan screen a counter no an pek ah che khan i va inlan dawn ta a ni. Hemi hma hian Passport size thla lak ngei ngei a ngai a, copy 4 vel a chhuak anga Rs 200 i chawi daih ang, xerox hmaih palh i neih pawn  hall ah khan a awm a phek 1 Rs 10 ani daih dawn a ni.

I document counter a check fel anih hnu ah file thar ah an khung sak ang che nga, tichuan Bio matrix ti turin i nghak leh anga, i  token number hmang bawkin an ko leh ang che, Biomatrix room ah chuan i kut thla, i mit thla(Iris) an la ang, i document an check leh anga, an hnenah chuan i kalsan tawh anga, 10 working days chhungin visa chu hmu tura beisei ini tawh ang.

Sapram i pan a hun ta, Lengpui Airport atanga Heathrow thleng thlawhtheihna thlak lo a connecting a kal hi a awlsam a, a hahthlak hret naa, vawi khat kalna anih chuan a himin ka hria. Jet airways ah connecting a ticket lak tur a ni a, tichuan Lengpui Airport ah i lugage  zawng zawng pawh kawnglaka buaipui ngai miha lovin direct in i book vek ang. Kolkata ah thlawhtheihna thlak a ngai a, chuvangin deperture side  chhaeng chungah i chho anga i ticket kha gate pass a ni nghal. Seceurity checking tih leh a ngai a, tin hand baggage tag  a thar thlak tur a ni tlangpui bawk. Kolkata atanga  Mumbai ipanna chu thlawhtheihna lian ani tawh dawn a, a chuang pawh an tam fu tawh anga, first class a chuangte phei chu an awh awm duh tawh hle ang.

Mumbai airport i thlen in International airport nen a in hlat avangin  Bus a chuan leh fe a ngai a, chu bus nang tur chuan Arrival gate vei lamah kawngka a awm a, minute 25 dan zel ang velah bus a kal avangin in tlar thuai tur ani. Mumbai International Airport chu a lo eng pup anga, a liana, mihring an tam em em tawh dawn a, i gate number i hriat thuai angai a, tin, custom checking leh immigration tih thuai i ngai dawn ani, a awlsam dan zawngin i air ways counter pan vat la an lo tanpui ang che.  Counter atang chuan form fill up tur an pe ang che a, i passport pawh an lo check anga, i visa te a lem ani em tih uluk tkin an lo check ang. Checking tih fel ah room lehlamah Imigration tih tur ani a, form  chu i fill up anga i va in tlar ang, counter tamtak a awm a, remchangah iva  intlar ang, heng intlar leh security checking ah hian ind the gap hi an ngai pawimawh a, yellow line a awm chuan pello hrim hrim rawh. I passport leh visa an check anga, zawhna tlem azawng an zawt ang che a, i Iris an en bawk anga, tichuan i passport a stamp an chhut chuan i tlang tihna ani mai.

I terminal a Gate number i zawh tawh kha i thlawehchhuahna tur ani tawh a, i lo nghak anga, luh theih an tih velh i lut  ang, a tlangpuiin  numberhmasa an lut thin a ni. I luh ve meuh chuan Jet International flight chhungah i awm tawh tihna ani a, thlawhna pawh a lian ta hle a, seat ah tv a awm vek a, eitur a tama, a tui bawk a, blanket leh lukham  a awm bawk a, Head phone a awm bawk a, i seat veilam ban ah khan 3pin a vihluh tur ani ang. Air hostess ten action song ang maia safety pre coution an neih thin kha a awm tawhlo a, i hmaa tv ah engkim aawm tawh a ni. (Pix dah zewl ka tum naa net  muang tlat)
chhunzawm leh atan bawk/.



Monday, August 24, 2015

SAP RAM KALTAWH KA NIA



A ni tak tak a lawm, Sapram ah chuan ka kal tawh, ke ngat pawn ka kal tawh a, Bus leh Train pawn ka kal tawh, ka tlan tawh a, ka mu a, ka thu a, ka lama, ka zuang tawh bawk, tak tak a lawm...

Ka puiltin hunah chuan Sapram ah ka kal anga  sap nupui ka nei ang ka ti thin a, mahse hei sap nupui chu ka nei talo. Neih mai tur chu awm pawh an awm mahna. Ka naupan laia sapram kal ka ngaihsan theih zia kha aw...

Kan thlen in ah: Kan thlen in ah chuan kawngkhar hi an tang tuk hlawm a, hawn leh khar thuai thuai hi a awlsam vaklo. Room luh hma in hall kaltlang a ngai a, chahbi chu kan han dep zeuh a "pit pit" a rawn ti a, a hawn theih mai, Corridor luhphei dawn khan kawngkhar pakhat hawn leh a ngai a, chu chu chahbi a ngailo, kan hawng chu  amah in electric a lo eng nghal a, corridor kawngkhar chu chahbi a hawn a ngai thung, Corridor a kan kal lai chuan kan hma lam electric a eng zel a, kan kalsan a thi zel thung a, chuan, ka room B1G chu ka thleng ta.

Ka room ah chuan Khum dup zet leh lukham  nuam tak leh puan sin tur a awm a, a bulah chuan Almirah a awm a, hunger a lo awm nghal bawk a, a chhawng hnuai ber ah chuan safe a awm bawk. Dawhkan te a awm a, fixed dawhkan kual pup a awm bawk a, a chungah chuan Hair oil, Bath gel, Soap, Tooth paste, tooth brush, shampoo, roll on, lotion, talcum powder te a lo in rem thap a, dawhkan chunglam bangah chuan  chhuar mawihnai tak  fixed in a awm a,  lehkha chhiarna tur light a lo awm bawk a. Ka khum sir lawkah chuan folding khum a awm bawk a, chumi phen ah chuan Room heater a awm bawk, room chhung chu ceiling a light pakhat bial pup chuan a ti eng tha tawk em em a, tukverh pakhat chiah a awm a, chu chu darthlalanga siam a ni, kawngpui a Double Decker Bus tlan lai ka zu hmu nghal chat thei nghe nghe.

Khum lu lam chu feet chanve vel thil han hun na mai tur hian a in dawh phei a, chumi chungah chuan mut paha  battery charge remchang takin plug a awm bawk a, chuta tang chhuan chhim lam hawi phei chuan Bath room kawngkhar a zawn chiah bawk.

Bath room chu a zau nuam tawk chiah feet 8 bial a ni a, kawngka zawn takah chuan sink (wash basin) a awm a, chumi vuanpha tawk chiah tur chuan a ding lamah European type commode a in hung poh larh a, a bulah chuan toilet paper roll 3 lai a awm nghe nghe a, chumi ep chiahah chuan Darthlalang lian a awm a, ring han tih fan deuh hlek chuan inthiar lai chiangtakin kan inhmu thei ang. Commode thenawm ah chuan shower a awm a, chu chu celing atangin polythene puan nem  tak parda inzar kual tur a awm nghal a, room chhuat dang tihuh lova inbual a awl zawk nan ni awm tak a ni. Shower tap chu hot and cold button a awm a, mahni duh ang chiaha tih vawh leh tih lum tur a ni. Chhung lam atanga kawngka han khar chiah hian kawngka ah chuan "Khawngaihin Kawngkhar khar rawh, steam in fire alarm a tiri palh ange" tih hi Saptawng ngial ngan takin a in ziak a, chu thu inziahna chung ceiling a khawl pakhat lang theilo lura mawi taka khuhbo si chhungah chuan tuilum kan mamawh ang min pe turin room kawngka kan hawn rual chiah khan Steamer machine a lo nung ve var thin a ni.

Building hi chhawng li a ni a, chutiang building chu inkawmho ni awm takin an ding khawm a, pawnlamah chuan kawtzawl feet 60 bial vel grass nhuam tak a awm bawk a, hetiang building hi kan awmna bulah chuan a awm fur nghe nghe a, chu building chu Goldsmith University Cumpas Hostel building pakhat a ni a, London a New Cross Gate veng a awm a ni. ( peih hun a chhunzawm tur)



Wednesday, April 1, 2015

London zin

LONDON zin tum hi a namai lo


"London Bridge is falling down.." tih hla i sa thiam em? min rawn ti tawlh tawlh a, kan pi Dini Varte hian, Kuttum lian zet vawklu bai thiam em em si, Moses lah hian Colombo khawpui atang daihin min rawn passport ka neih leh neihloh te min rawn zawt fiam vel luam a, eng vanga chutianga fiam fo nge ka nih ka hriatloh laiin lehkha pakhat ka dawng hlawl mai a, 2015 July ni 1-5 chhung hian Salvation Army kum 150 tlin lawmna  London khawpuia neih turah kal ve tura ruat ka nih thu a lo in ziak a.

Kha lehkha ka dawn ni atang khan ka suangtuahna leh rilru tamtak hi hla takah a awmfo a, Sherlok Holmes a kawatkai suangtuahnaa a awm laiin Anthurium tui pe turin nupui ten min lo tir mek a! Buckingham Palace tuala Royal Guard parade mit tla lek leka ka thlir laiin Auto Rickshaw horn te hian min kai harh ta fo mai.

Nia, tichuan London kal tur chuan rilru ka han siam tan dawn taa, tihtur lah chu a lo tam zek mai, lehkha ah lah khan min tur hmanhmawh phian bawk si.. Passport neih hmasak phawt a ngai tih hria in ka han buaipui phawt a. A lo buaithlak zek mai, passport ah ka buai tak tak ni lovin ka hming ah leh ka kum leh ka pianni ah ka buai ta phawt a, ka piang ngei a, hming pawh ka nei  ngei mai, mahse a tam lutuk pawmtur ber pawh hriat a ni ta tlatlo. Voter's ID leh School Certificate leh keima Official leh Birth Certificate te chu a in anglo vek! Passport dilnaah chuan chi hrang hrang a tih theih siloh. Chung zawng zawng chu a in anga siam phawt a ngai a, ka han siam zo ta. Mahse, Residential, Tax excemption leh Bank Statement ah te ka hming leh kum etc vel chu inmil a lo awm leh chuang silo. Chung zawng zawng in anga han siam zawh meuh chuan... ka upa ta sawt a. Ka hming pawh a sei ta duah mai, document pawh ka ngah ta hle mai bawk a... chuan lehkhabu tereuhte a kawm dum a kawma rangkachak rawnga Republic of India tih chuang kalh Passport chu ka  dawng ta.

Heng document zawng zawng angkhat veka siam thei tura min puitu mi fel tak tak te kha in hming ka sawilanglo anga, mahse in chu8ngah ka va han lawm chiang tak em.

London hi zin mai maia kal tur ka ni lova, mawhphurhna lian tak ka ko ah a in nghata, Kan kohhran huangchhunga thalai zaithiam tak tak mi 25 lai enkawltute zingah ka tel a, chung thalai rualte chu Mizo Singers ti a koh an ni a, an hming hi helaia kan lo phuah chawp ve ngawt pawh a ni lova, London lam atanga min rawn phuahsak a ni nghe nghe.

Calendar kan han ena, kum 1 lai la awm angin lang mahse, Khawvel pumpui hmaa zai tur kan nih avangin inbuatsaih a ngai nasa hle mai. Member tamna ber leh Headquarters awmna ani bawka, Aizawl ah chawlhkar tin Zirtawpni apiangin hla zira ka kal a lo ngai ta a. Thal khaw nawm chhung Zawng chu Bike in kan kal mai thin a, zanah hlazir ban veleh kan tlan haw leh a, Kolasib chu 1:00AM vel ah kan thleng thin.

Vawi 2/1 zai mai tur emaw kan intih laiin, a lo ni hauhlo mai. Ni 5 chhung hian hunawl awm manglo khawpin programme min duan sak a, Mizo bik hian darkar khat chhung CONCERT kan  nei dawn bawk a. Khawvel huapa zaithiam leh Band thiam, New York Staff band te, Pasadena Songster ho te nen hla saho turte kan ni a, Scandivanian ho zai laite pawhin a part/harmony lo pe tur kan la ni cheu a, Khawvel ram hrang hrang te khawmpui lokal lawmna hun ah a bik taka Mizo hla chu sak tur ala ni cheu. He hun hian danglamna a nei a. Khawvel ram 125 atangin palai an lokal dawn a. Hnam hrang leh tawng hrang atam teh reng nen, zaipawl pui (Combine songster) zai turah tawng thlan bik hman ani dawn a, chung tawngte chu;English, Spanish,Korean,Scandinavian leh Mizotawng thlan ani. Khawvel huap thila  Mizotawng han thlan chu a mak a, a ropui bawk.

Inbuatsaihna lam theihtawp chhuah a ngai a, chutih lai chuan Visa dil a lo ngai a, document an duh fir leh hle mai, chung document neih vek hnu chuan Kolkata a UK Visa Office ah Interview neih a ngai a, mahni kal ngei ngei a ngai a, he hunah hian Bio matrix tih angai a, sakawlh hlau tan chuan a nuamlo mai thei.

India pawisa hi neih tam a har tehlul vei nen British pound ngat  phei chu ava har dawn em! kan Rs.100 leh an Rs1 a in tluk tawk lek a,  Manchester Jersey te hi min han chah   nghal ngawt a, pound 350 man chu a hniam pawl ani a, chu chu India pawisa chuan 3500 a ni daih si... hausak va har dawn tehlul em!!! Kan theihtawpa  kan insum chung pawhin kar tina kan hla zirna senso hi Rs 650-1000 a ni zel si a, London a kan pai ve tur zawng zawng hlazir naah kan hmang zova, Queen Victoria Street vel ah riltamin kan chau ang tih a hlauhawm zawk.

Ram khu leh chena kal tum ta chuh  hmuh tum leh kal duhna a tam nghal pang mai, thenkhat chuan Old Tafford a thlalak ngei an duh a, India pawisa a Rs.6500 vel chawi huam a ngai si, London atangin 4-5hrs Train a kal ngai a ni. Ka thiannu, ka zoom pui Littlehampton ami pawhin tlawh ngei turin min beisei a, map leh tuldangte min rawn thawn vek tawh a, ka tan pangpar chi te a lo collect bawk a, hun ka nei angemaw...... London atangin leihnuai rel ah darkar 4 tawp tlan a ngai thung.

O2 Arena, khawvela arena lian leh ropui chu kan Inkhawmpuina hmun tur a ni thung a, a chhungah hian engkim a awm an ti. Sawi vak ngaihna ka hrelo. Kan kal tum hun lai hi Londona Wimbledon leh Event lian tam hun lai anih vangin Hotel leh Resort leh Public transport te an lun lai ber hun anih vangin booking tih ran angai hle a, a bik takin keini ho chu kan hotuten engkim an ngaihtuah fel vek a, University Campus te chu kan tan an tiruak dawn a, tin Hotel Lian in telkhawm te pawhin kan tan ruahmanna an lo siam dawn a ni.

Pathian in min veng anga, A rawng kan bawlsak ve theihdan ber, zai a Amah faka Khawvel hmaa kan zai ve min phalsak beisei ila.  Dam taka kan tum anga kan kal ta anih chuan ka lo haw hun ah ka rawn chhunzawm leh ang.