Friday, September 11, 2020

PPE

 PPE


Covid 19 hnu a kan sapṭawng thumal hriat lar deuh zinga pakhat chu PPE tih hi a ni awm e. Mahni invenna hmanrua tiin sawifiah ve tawp ta ila, a lampum chu Personal Protective Equipment a ni . Hri or natna midang lak atanga kaichhawn lohna tura mahni lam invenna a ni tih kan hrevekin ka ring.


Hripui lêng mek hi inkaichhawn thuai thuai theih a nih vangin mitin kan fimkhur a, chuvangin PPE kan neih ang ang kan hmanga, face mask leh sanitizer phei chu mipui nawlpuiin kan hmang mek a, ṭhelret kawr suit erawh chu mi nazawng tan a buaithlak deuh bawk nen  frontline a thawktuten an hmang tlangpui.


PPE dang leh chu Bible leh ṭawngṭai a ni. Kan rinna chu nitin zantinin beih a ni a, hripui aia rapthlak tuarna leh chatuana thih vang vangna hri hmelmapa hian a neia, chu chuan kan rinna tih nghin tumin a bei reng ṭhin. Chu beihna rapthlak leh hlauhawm laka kan himna turin  Bible leh ṭawngṭai PPE hi kan hman reng a ngai.


Inven chu tihdam aia a ṭhat chhung chuan kan inveng tur a ni, sex lama chaklo i nih chuan PPE i hman a ngai tihna a ni. Chu chuan a hunlova fa neih, nau tihtlak, HIV leh thildang tamtakah a veng dawn che a ni. Kan kawngsir ah te hian Use Condom tih intar a awm ṭhin. Sex hmanglo theilo i nih chuan PPE nen hmang zawkla i him ang an tihna a ni.


Hmeichheho tana pawimawh leh deuh chu Ṭawng tamloh PPE hi a ni leh pek a. An sawi dan chuan hmeichhe pahnih kawng sira an dindun hlek chhung pawh hian mi an rêl hman zel an ti. Chutiang em em chu in nih ka ringlo naa hmeichhe ṭawng zawt zawt chuan pawi an sawi ngei ngei thin, chuvangin ṭawng tlem PPE hman a himber fo.


'Tun aṭang chuan fimkhur takin ka kal dek dek tawh ang' an tih ang khan kan nitin nun hi fimkhur takin hmang ila mahni lam inveng tlat ila, engkim ah PPE kan mamawh tih hrereng teh ang u

RAMHUAIIN MIN SAWISA

 RAMHUAIIN MIN SAWISA


A tuka chiseh lama zin tur ka nih vangin mithi lumenna aṭang chuan a rûk té in ka haw a, thla chu vanlai zawl ah a êng pup naa, chhum dum kal zut zut chuan a hliah leh thin a,  ka piah lawkah chuan ring takin Ui a u vuah vuah bawk. Lumenna lama zai thawm chu a reh duk a, chutih lai chuan vawt hian min ṭham seng seng bawk a, ka tukhum hi a za mer merin ka hre tlat bawk.


Sarthi a nih vang nge kan mitthi chuan lumentu a ngah hle a, khawlai chu a ruak huai vek mai. Chhum dum lian tak hi a rawn in zial tup tup a, thla bial pup pawh chu a hliah thim vek mai a, chutih laitak chuan engemaw hian min rawn kal pel thuakin ka hre tlat mai, ka hmulthi a ding deuh suau a, rang takin ka hawi let a, engmah ka hmu silo.


Ka hming chu Lianzama a ni a, Aizawl hmar lam thingtlang khaw lian ve taka awm ka ni. Nupui neia fanau kawi duah tur ka ni tawh naa, eizawnna ngialnghet kala neihloh vangin mahniin kala thên mai mai hrih a, YMA hruaitute aia ka upat deuh tawh vang hian chhiat ni ṭhat ni ah pawh min ngaichang der thiam ṭhin hle.


Vawiin ah kan veng pa fel tak vawi tamtak ka ramvah pui chu a ram kalnaah a chesual a, tukin ah pawh  sa hnu thar deuh a hmuh vangin pêl turin min rawn sawm kha a ni a, mahse, naktuka Aizawla ka kal ngei ngei a ngaih vangin ka lo hnar a, amah in a kal taa, a ramkalna lamah a zu chesual ta hlauh a, khawtlangin a lu kan men mek a ni.


Mahni tawka pa in ti, ram palaileng ah pawh riak mai thin ka ni a,  ramvah nikhua pawha a hmahruaitu inti ve ngat ka ni. Phung leh thlahrang an sawi pawh fiah duh zel inti ve ngat ka ni thin.


Mahse zanin ka haw kawng chu a thui ta riau mai. Chhum dum chhah tak chu a rawn in zial leh tup tup a, khawhawi a tawi tuk mai a, inti pa taka chhum dum lam ka han en chu kalam hawia lo meng kuau hian ka hmu a, mak ka ti hle a, chhum dum thim mûk chuan min melh rùn mai hian ka hria. Ka mitvai ani ang tiin ka mit ka nuaia, ka han en leh chuan thla eng chuan alo chhun leh tawh a, ngaihtha takin ka kal zel a.


Thawk leh khatah ka hma ah hian Zawhte dum lian zet mai hi a rawn lang phut mai a, thla eng chuan a mit chu a chhun de rû mai a,  ka ding chawt a, pa intih nak laiin ka zâm ru ta tlat mai a, thâm ṭuak hian “Zawh” ka han ti a, kawngthlang lama Rawhungah chuan thawm ri miah lovin a zuang lut ta mai a, mak ka ti a, ka rilru hi a zâm ru tlat mai.

Khawlaiah chuan mi kalvel an awm miah lova, a reh tlawk tlawk mai a, ngaih hi a ṭhalo tlat zawk a. Kan in pawh ka thleng ṭep ta a, chutih lai tak chuan ka hnung lam hi vâwt hian a ṭham leh tlat mai a, chutah engemaw hian hnai takah min kalpel thuakin ka hria a, ka mür chuai nghe nghe a, kan kailawn ka rap chiah tihah chuan kan ṭhenawmte ar chu an ai tuar tuar a, an ri phur phur ta mai. Ka rilru ah zamna a awm tawh a, fiah ta nge pawh ka tilo kawngkhar ka pawt hawng rawk a, ka lut zui nghal a.


Khuantevîka Aizawl pan tur ka nih vangin ka thuamhnaw ka siam nghal a, kawr leh kekawr chu bag ah ka thun a, bang thlang lama ha nawhna brush ka zu la, ka bag a ka khung tur chu ka thawmhnaw khungsa chu alo awm hauhlo mai, rang takin ka hawikual a, khum tlangah chuan ka kekawr chu a lo awm a, khum hnuaiah ka kawr alo awm bawk a, mak ka ti a, hlauhna in min man ṭan nghal a, ka kawr ka han phawrh chhuak chu thisen tharlam tak hi alo kai a, a tháng em em mai leh nghal.


Ka pindan chu a vâwt ruih mai a, a thang uih hmún mai bawk. Ka bag chhuata let reng pawh chu ka ngaihsak tawh lova khumah chuan ka mu a rizaiin ka in khuh ta ringawt mai! Pawn lamah chuan mi kal zut zut thawm ka hre ta a, rang takin ka rizai ka theh hlîm a, tukverh atangin pawn lam ka dak vat a, tumah an awm  silo. Mahni maia awm ka nih avangin midang pun tur an awm mai silo, han au chiam dawn ila zahthlak ka ti ve deuh bawk si.


Ka êng neih zawng zawng ka chhi eng a, thukah mei ka tuah bawk a, chutih lai chuan ka kawmchar lamah chuan ring deuhin hmeiche nui hawr hawr ri hi a rawn ri chhuak a, ka zuangtho zawk a, ka chempui ka chuh a, mahse tumah hmuh tur an awm silo. Thawm a reh leh meuh chuan a reh hian a reh vawng vawng mai a, mu ta nge pawh ti lovin meilumah chuan ka ṭhu reng a, rei pawh ka ṭhut hma in socket bolt chu amah hian a tla rirawk a, ka kawngka chu a in hawng chîk ta ruai ruai mai.


“Tunge i nih? Enge i duh? Engatinge min tihbuai?” tiin ka au a, ka chem chu ka vilik kual a, chhuatah chuan ka inhrosa kual chiam a, chutia ka han tih chuan thawm engmah ka hre lova, fimkhur takin kawngkhar lam chu ka pana, ka va thlen chuan rang zetin ka khar a, ka kalh a, a bula hruizen chuan ka ṭawn nghal bawk a.


Ka tiril chu a khur zaih zaih a, ka thukhum sam hi a ding sung hian ka hriaa, ka chem hum pawh chu ka thlauh lek lek hial. Chutih lai chuan ka in chu a in sawi ta chiam maia, bel leh no te a tla ri chuai chuai ta mai. Ka inchhung chu boruak dangin a luah leh vek tawh a, a uih leh hmún tawh bawk. Tlan chhuah ka tum a, ka kawngka hruizena ka suih tlat chu ka hawng thei bawk silo, ka chem lah ka thlauh daih tawh bawk si, puitu tur au mai ila ṭha in ka hriaa, ka han au dawn a, ka khâ a chih ta tlat, ka auchhuak thei reng reng lova, ka rilru chu a harh a, kava mangang tak em!


Inchhunga ka bungraw neihve te chu a darh chei chuai a, keilah che thei heklo i ka en reng ringawt mai a, patling mangang au ri tuarh tuarh hi ka hria a, “Lianzam min ṭanpui ta che” tih hi chiang deuhin ka hre thei a, chu aw chu zanin a a lu kan menpui mek, ka ramvahpui ngei mai aw kha a ni. Chu aw ka hria chu ka khur zawih zawih a, “Min that dawn Lianzam hmanhmawh rawh” a rawn ti leh a, ka bulvel ah chuan chhum ang tak, meikhu ni awm tak dum rei ruai hmuh chian theih siloh hi an thlawk kual sup sup mai a, boruak chua a vawt em em mai bawk si.


“Lianzam tlan chhe rawh, tlan chhe rawh” ka thianpa chuan a rawn ti leh tuar tuar a, ramhnuaia hnim kan tawn ri sung sung ang deuh hian thawm ri sung sung chuan a zui bawk a, kei chu bangkil ah che thei miah lovin ka ding reng a, ka khur zawih zawih ringawt.


Kawngkapui zawn atang chuan thil dum pianphung pawh nei vaklo hi a lo hnai zel a, ka âwm chu a tawt tlat a, ka thaw hleithei lova, ka rilru chuan talchhuah a, tukverha zuanchhuah chu a duh a, mahse ka chesawn thei der silo. Ka sirvel ah chuan min nuihsawh ni awm tak hian hmeichhe nui awr awr thawm a ri chhen bawk a.


Zanlai pelh tawh hnua mithi lumenna atanga haw kha ka ni a, tunah hian enghun nge tih pawh ka hrethiam tawh lova. Ka hrawk chu a thip kha hluk mai a, thawk harsa ka ti em em bawk. Inchung lam chu lungte ṭhila vawm ang mai hian a ri leh tuarh tuarh ṭhin a, tal chhuah ngei tumin theihtawpin ṭan ka la a, ka che thei eih lo, ka ding tlaw reng mai a, aw thum belbul hian engemawni hi a sawi a, enge a sawi ka hrelo, mizo tawng ni pawn ka hre heklo, a thum bul bul ringawt mai a, mahse chu aw chuan ka taksa pum chu a fan tlat a, ka vawt vek hian ka hria. Ka din na bula darthlalang ka khai chu ka han melh ṭawk ṭawk a, awi, ka duh theilo! Ka hmel chu adang var vek a, ka mit chu a sen duk ruih mai bawk a, keimah leh keimah pawh ka inhlau hial.


Tihian ka thive mai dawn chu a nih hi, ka ruang lah chu an hmu mai dawn silo, ka thihchhan tal hi hria se ka duh mahse an hre dawn silo, thawk harsa ka ti tial tial a, vâwt ka ti tulh tulh thung, ka mangang takzet tawh. Tihdan tur engmah ka hre tawhlo, hria pawh niila ka ti thei heklo. Ṭhenawmte Ar nachina rak vak vak zinga an Arpa chhiarkhuan chu a rawn khuang ta ul ul mai. Chuveleh engemaw hi a ri deuh suau a, keipawh chu ka thawl hawk mai. Ka thaw thei ta.

Arpa chu a khuang leh a, khua alo var dawn tawh reng hi alo ni a, thum deuh deuh te, sin deuhte a phun  sup sup ri hi ka hria a, ansawi hrelo mah ila a ri hriat pawh chu rapthlak tak ani. Thawklehkhatah ka inchhung borual chu a danglam leh thut a, keipawh chu ka che thei nghal a, uih thang nghur pawh a reh chawpchilh nghal a, ka la khur zawih zawih a, chesawn thei tawh mah ila ka din ngaiin ka ding reng a, khua alo var ta der a.


Khua avar chian bal hnu chuan rang takin ka thianpa ruang chu kava pan leh vang vang a, a lu lamah ṭhu in a chal ka dawm a, “Zam suh, hlau reng reng suh, hei i kiangah ka awm e” tiin ka hrilh mawlh mawlh a, Aizawl ah pawh chuan kal lovin ka thianpa ka ramvahpui thin chu thlanmual thlengin ka thlah ta zawk a.

Sunday, August 9, 2020

AIGUPTA SABÊL

 AIGUPTA SABÊL


Israel fate kha kum tamtak salah an tang a, hrehawm tak leh rim taka chhawr an ni. An hnamzia leh râng, an  sakhua nen lam khan awpbeh an ni a, Pathian remruatna chuan Mosia hmangin a hruaichhuak leh ta kha a ni a.


Zalenna neih kha an duhber a, an hnam kha awpbettu awmlo se, hnuaichhiahtu awmlo se, hmusittu awmlo se an ti. An lungngaihna leh an lunglenna chuan Lalpa faka zai pawh a harsat tir em em a, Tuipuisuthlah kungah te chuan an Ṭingṭangte chu an bâng uai vel mai mai a, 'engtin nge mi ram ah, mi sal niin Lalpa fakhla kan sak theih teh lul ang ni' tiin an in dawmkun a ni.


Zalenna kawngzawh tura ke an pen ṭan aṭangin harsatna leh buaina, tawrhna in anang a, rilṭam leh tuihal dangcharin an awm a, ṭhenkhatte chu nasa takin an damlo ngei ang. Apui anawia zalenna kawng zawha an kal mup mup chu eiturin a daih seng lova, in turin a daih seng naheklo, phunchiar leh vuivai in an hun an hmang ta.


Nupui fanaute, tu leh fate rilṭam tuihala an awm chu hmuh a hrehawm ngawt ang, naupang rilṭam ṭap rite chuan an beng a chhun ngut ngut dawn si a. "Engatinge rilṭama thi tura min hruai chhuah, Aigupta ramah khan kan tan chaw a tamtawk a ni lawm ni?"ti a an han au pap pap te pawh chu an demawm lutuklo hian a lang.


Mahse, sal ata hruaichhuaktu ngaia chiau vawng vawng leh, mi rama awm hrehawm tia Lalpa pawh fak theilo hialte kha an ni si. Chung phunnawia Aigupta sabêl thlahlel leh ta te chu zalenna duha beitute kha an ni si.


Kan nuna thilṭha lam duhna vanga ke kan pen changte hma kan lak laite hian kan tan hrehawmna leh channa a ni fo. Dikhlel deuha lak mai tur a awm laia kan duhlohna te hian min ti hrehawm fo ṭhin bawk.


Nun thlakthlenga a ṭha lam kawng kan zawh ṭan laite hian Aigupa sabêl hmui rim kan hre fo. Piangtharlo leh Pathian ring velote ten malsawmna an dawng emaw tihmai tura an hmakhua a en viaute hian sabèl hmui rim kan hre ṭhin.


Nangpawh engemawber lakah i tang tawh ngei ang, Zu, Zuk leh hmuam, Sex, Sum, Rinawmlohna, Eirukna leh a dang dangahte i tang tawh ngei ang. I nunna atana i tlanchhuah hian a nuam leh awlsam ah vek a kal theihloh a, hnunglama Sabêl hmui rim chuan thlem che mahsela hmalam pana tlan zel tur i ni.


Israel fate pawhin Lalpa an rinna leh a hruaichhuaktu thu an zawmna avang chuan Thlaler ramro ah Tui a pe a, Chaw a pe bawk tih hrereng la, harsa mahse bei fan fan ang che.

CHHANGCCHE SUNDAY TUK

 CHHANGCHHE SUNDAY TÛK


Kartluanin paber a hnaah a buai a, hah a inti hle nachungin duattu tur bik pawh awmchuang lovin inlam ah nuber chu a phe kar tluan ve bawk a. A kum zawna piangte pahnih bakah inchhangbung tawk chiah pali nen an fate chu kartluana buaipui tham chu an ni ve reng reng.


A tuk hahchawlh ni tiin Inrinni zanah an han mu duham ve dawn a, kawl a ên rualin a te ber a harh, reilote ah a ute a ṭhawngharh leh a, khua a var chian meuh chuan inti ṭap an awm hman der tawh a, mutrei pawh tum teh mahse thawhloh theih a nilo.


Thawh hun ah meuh chuan an zuangthla sup sup tawh a, nuber eirawngbawl tibuai tawk chauhin an lo harh hle tawh a, a ṭhenin thingpui an ti baw rawl vel nen. An ri nak naka mi ei rualin tukṭhuan chu an ei ve thei mai.


Chaw eikham chuan inkhawm tura insiam a hun ta, a upa berin a naute ke a lo sil laiin  nuberin  hmanhmawh takin thleng a sil ri rawk rawk a, paber lah  pawnlêr ah kuhva ṭhai chungin meizial a pak khu vut vut a. "A u sil ka duhlo" tih vangin pahnih an nuar mek a, sil zawh tawh pahnih in ekin an in chuh mek bawk. 


Hmanhmawh em em in nuberin thu an rem thuai thuai a, uber sil duhlo ho zawng a han silfai leh a, chutih laiin paber lah pial taka samkhuihin a kawrchung hlui tawh tak alo phawrh mek bawk a.


Inkhawm dar a ri ṭep tawh, insil an zo ta bawka, chawlhni kawr an la chhuaka, mahnia ha thiamlo pahnih haktir a ngaia ha thiam mahse mahnia ha duhlo pakhat ala awm bawk. Thuamhnaw an inbel fel vek hnu in sam khuih ala ngai.


Pa ber insiam zo tawh chuan samkhuih a lek vâ a, naupangho an dingtlar ṭhap, chutah bari ngil taka ṭhenin pakhat a khuih zo. A dawt leh ami chuan a chalsam chu sava bu anga khuih a duh, a dawt leh in chalsam khuih chhoh a duh, style ruk ngawta sam an khuih zawh chuan kal an in peih ta hle.


Inkhawm dar a ri ta, nuber pawh hmanhmawh em em in a insiama, a powder hnawihna puff lah a faten an thlawhbo tawh si, a lipstick neihve chhun  chu kawm deuh ngawng ngawng a ngaia, a chang changa ahman ṭhin a mithmul dumna chu an teber in a sehbung a, hman pawh a hmang talo. A insiam buai tehreng nen naupangho chuan thawhlawm an lo dil ngawng ngawng a, pakhat tete in a han sem diat diat hnu ah, a puan thulkhung ala chhuak a, kal an rual nghal, kalpahin a in zut mam thuak thuaka Biakin lam an pan ta.


An sa hmeh ni ve ber chu chaw kaw puara an ei loh ni, hmanhmawh em em an dawlh zung zung ni a ni a, in uluk hman miahlova an inchei ni a ni bawk.


Inrinni zan ah hian thawmhnaw hak tur leh pheikhawk nawh ngai zawng zawng chu a nawh lawk vek chi viau asin. Thawhlawm a sem lawk vek theih a, chawlhni sa a chhum lawk vek theih. Chaw ei hmain naupang lo in sil sa thlap bawk sela.


Pathian tana kan Ni pek kan hman dan leh kan inbuatsaih dan hian chhungkaw rorelna fel leh fello a hriat thui theih viau. Inkhawm tlai reng chhungkua in nih phei chuan in bih nawn a ngai. Sunday chibai ule.

ṬHENAWM

 ṬHENAWM


Thingtlangpa chuan Aizawl te hi kan han sawi ropui khawp ah, mihring an tam lutuk tawh a, ṭhenawm pawh an in hre tawhlo, an inhnuai amite pawh an hrelo te hi kan tia, kan khuaah hi chuan kan la in hre zau viau asin le.


Buai nih hi kan duh hle hian a lang. Mitin hi kan buai em em tawh a, tihte hi kan ṭawngkam hman lar a ni tawh. Buai ang taka lang hi kan tamzawkin ka hre thung. Buai chhuanlama rawngbawlnaa pha ṭhin te, pawl thiltih nikhuaa buai chhuanlama hmangte hi han chhui chian chuan an lo buai lemlo fo tlat. Mi buai tamtak hi chuan an hun an hman thiamloh vang leh hnathawh kalhmang an hriatthiamloh vang mai a ni thin. Buai chhuanlama ṭhenawmte ngaihthah lah an pung viau.


Ṭhenawm neilo chhungkua chu tlemte chauh kan nih a rinawm,  kan ṭhenawm te ṭheuh lakah hian ṭhat chhuah ila kan khua hi ava nuam dawn em! Mizo Upa thu khawchang chuan "Khaw sarih do aiin Ṭhenawm do a ṭhalo zawk" an ti. Bible thianghlim pawhin ṭhenawmte chu hmangaiha bum lova ṭanpui zawk turin min zirtir.


Kan mangan lai, kan nat lai, kan bawrhsawm lai, rikrum kan tawh laia kan kianga lo ding ṭhin chu kan ṭhenawmte an ni. Chi seh tlakchham thut ahte, hmanrua hawh ngai neih thutah pawh kan ṭhenawmte bawk hi an pawimawh.


Chhungkua tukchhuah fuhloh vanga buaina a awm chang pawha kan kara banpharte chu kan ṭhenawmte bawk. Malsawmna dawnga bungraw thar kan neih changte, kan tu leh faten result ṭha an neih changte a lawmpuitu hmel kan hmuh hmasakte chu kan ṭhenawmte bawk an ni.


Damloh vanga menpui kan ngaih hun a awm thin, pa ber rui buaina siam chang lah  atam, chhungkaw tinin harsatna leh buaina kan nei vek, chung huna kan kianga min pui tura loding ṭhinte chu kan ṭhenawmte an ni.


Khaw khat do pawh tih nak alaiin khaw sarih do rapthlak tur zia chuh, chu ai chuan ṭhenawm do a la ṭhalo lehzual. Mizote hi in ṭhenawm diat diat vek kan ni. Ṭhenawmte hriatloh hi changkanna ani reng renglo, mahni inhnuai luahtu hriatlohte hi mawl hri rapthlakber a ni zawk.


I ṭhenawm lakah ṭhat chhuah rawh, a ram nek lo la, i insak in an ram tibuailo se, puih an ngaihin haiderlo la, fak hreh hek suh, chung zawng zawng chu ilakah pawh an tive ang. Ṭhenawm ṭha i nih chhung chuan i ṭhenawmte pawh i lakah an sual ngailo ang.

ENG KAN TI NGE

 ENG KAN TI NGE?


Thlang kawrvai ngalria tâwna kan nulate an tlâwmin  demna tinreng leh anchhe tenau nen lamin kan umzui a, kan diriama, archuk tuilovah kan chhuah a, a ram leh a hnam chu kan hmelmak tir fo. A chhungte tana khawhawina awmlo khawp leh kimkit ngaiin kan chhuah fo.


Sappui tâwna kan nulate an tlâwmin vannei kan ti a, changkang kan la ti zui ta dah a. An hming tawpa an pasalte hming ṭawm rau rau ah  vai hming  aiin lam puam ṭâlh theih sap hming an put chu mawi kan ti tlat. A ram leh a hnam chu phatsantir ahnêkin a fate pawn mizoṭawng an thiam tiin hahîpin kan sawi a. A chhungte lah chuan an la chhuang zaw mah a.


Hah thikula thawhchhuah sum tlemtê aṭanga sawma pakhat lo lut chu dan pangngaia ziahfel mai a nih laiin eiruk pawisa thianghlimlo tamtham tak lolut chuan fak leh chawimawi a hlawh zawk fo.


Tlawmngaihna avanga pawl hruaitua ṭang duh chu kawla nichhuak chhiara kut hnathawk an ni fova, lar duhvanga pawl hruaitu chu pisa kai paha nihna chelh an ni fo. Khawtlanga chhiatna a awmin pisa chhuahsanin chhiattawk inlamah ro an rel zat zat a, tlaivar eitur an ngaihtuaha an mahni erawh chu tlaivarho zingah an lang silo, tlawmngaihna an lantir apiangin pisa lamah an eiru tih an pawm leh chuang silo.


Tih ṭhat leh hratlâk vanga Kohhran hruaitu a awm theih, chung mite chu rorel thiam, kohhran dan leh hrai hria, thusawi dan kalhmang thiam leh hmasawnna ngaihtuahna kawnga fing tak niin Thlaraubo erawh an hmangaihin an vei hauh silo.


Khawtlang leh ram hruaina kawnga mi vengva, sawi chhuahna tur leh sawi chhuah ngah, kam ṭha, nui mawi si, mi biak nuam, tupawh dawngsawng thei mahse ram leh khawtlang aia mahni leh chhungte hmangaih daih zawk an awm fo.


Hmangaihna hian huamchin a nei em ni, dai theu chin a nei rêng em? Chipui leh hnampuite chauh huap a ni takzet em?  Nge ni keimahni hian ramri kan lokham mai mai zawk? Tuipui aia thuk van aia zau, ziah senloh leh chhiar senloh, a thuk leh zau zia, a san leh a ngheh zia teh theihloh hmangaihna hi kan duhlaia lo rehbun mai chi em ni?


Sawma pakhat tam lam chu pakhat a ni reng dawn lawm ni? Enga vanga sawma pakhat chu thliar viau zel nge kan nih tak mai?


Piangtharlo leh Thlarau hmangaihna neilo kohhran hruaitu kan neih chuan kan biakin a pui tual tual anga kan thlarau a ro tual tual thung ang tih ava hlauhawm em!


Lanmawi tumna leh pumpui hmangaih vangin ram leh pawl hruaitu kan neih fo vangin sawisel rin ngamloh a ruka mitinin an sêl si pawl a awm thei, ram hmangaihna tello ram hruaitu an awmin ṭam hmachhawn chiah kan hmabak a ni thung.


Eng kan ti nge?

A KIANG ṬHIN

 A KIANG ṬHIN


Tlangbâna uai hnâwp khawpa lung a lên changa kalam hawia i rawn seih hian ka dam sawng sawng a, ka lunglenna zawng zawng chu buhsî thliin a len bo ang mai hian a kiang vek ṭhin.


Chhûn nisa rumrût hnuaia thlan tla zawih zawih chunga nang ka ngaih chang leh, mutmu tuah hleithei lova lukham kuaha ka ngaih veng veng lai chea i thu lothleng te hian lunglen a hnawt ṭiauva, lawmna thinlung min neihtirin lunglen a kiang ṭhin.


Rilru hah tak, thinlunga a so liam zawih zawih vanga hmela langchhuak hial, hnawhtu awm ang maia awm hle hle pui theihloh manganna ka tawh laia i kianga ka sawi hian chung buaina zawng zawng chu a kiang ṭhin.


Tlakchhamna leh pachhiatna in min mana, lakkhawm mai tur hre silova hawihai taka ka awm laia engkim i neih thu min hriattir hian chakna thar min pe a, manganna a bova hrehawmna a kiang ṭhin.


Natna tuara chautaka ka awm lai leh dam beiseina pawh ka neih tawhloh laiin nang chu beisei tur leh damna ini tih min hriattir vangin  beiseina nung min neihtir a beidawnna a kiang ṭhin.


Mamawh pawh neilo, hrehawm pawh tuarlo, tlai leh puara ka awm lai pawn ka vanneih bik zia min hriattir a, chapona a kiang ṭhin.


Nangmah chauh hi engkima engkim ini a, kei hi enge maw ka nih a min hriatreng thin ni, i lam hawi lova kalsiam ka zawh lai pawn hmangaih leh dawhthei takin min nghak si.


I kiangah hlauhawm a awm lova, hlauhthawn tur a awm heklo, lungngaihna chhan tur a awm lova, hlima tur hlir a ni si. I kiangah chuan a kiang ṭhin sual leh a hnthawh pawh.