Kei alawm Vannei

 A kum mai nilo, a Ni leh thla, a darkar famkim thlapa  piancham nei ve ta nafam chu, kum a thar hian ka lo upa ve ziah a, he upatna hi ka duh vang emaw, ka phu em vang pawh  a ni lo, ka sual chhuah pawh ni hek lovin ka chungah hun hian a rawn thlen tir ve mai thin a. Naupan lai ka nei ang bawkin tleirawllai ka nei a, chu mi hnu lawkah " Ahun ve tawh a lawm" an tih hun ka lo chuangkai ta reng a.

Chutia 'hun ve tawh'  era a ka din tak vang chu a ni ngei ang,  ka suangtuahna leh ka mumang pawha kala man ngailoh ram thar ah hlankai ka ni chawpchilh ve mai bawk a, tunah zet chuan ka hming bulah ka duh emaw duhlo emaw lam a sawi theih tawh loh va, Pu tih hi an dah ta ziah a, chu chu fa ka neih hma nupui ka neih tawh si pawha ka title thar a lo ni reng mai a.

Title thar ka neih tantirh lai leh ka neih hma deuh atang tawhin miten, "a ni hi a awm ang" an tih vang ni hmiang, eng pawl pawl ah emaw chanvo ka chang ta zeuh zeuh a, Kohhran lamah pawh Group tesep hruaitu ka ni thei ta riau bawk a, ka nihna Pu bakah chuan nihna dang neuh neuh ka nei ta reng mai a.

Tunah Pu min ti pawh nise zaha lak loh hun kalo thlen hnu pawh hian nihna dang chuan min la rawn sehmur tuau tuau fo thin a, Association hrang hrang leh YMA leh Kohhran mai bakah veng bil thil ah pawh ka awrh leh nuaih ta mai, Mi ngaihin mi fel nge ka nih a, mi awl/hman, mi ngaihah Hruaitu tlak ka ni nge tirh kah chi pawh ka in thliar thiam bik chiah lo na in, eng nihna emaw hi chua a kum tel in ka cahng ve ta reng mai, chanvo channa/ nihna hi kawngka luchunga tar tur nise ka kawngka  lu chungah chuan leng lovin kawngka biangah te hial ka tar a tul chang a awm ngei ang.

Til rehloh  nana na chu Lalpa laka kan rochan tih tur hi a chhang khat tawk hian an piang ve reng a, chhangchhe pa nihna chu ka title neih belh  a ni leh ta der a. He hun ah meuh pawh hian Pawl hrang hrang te chuan ka kiansan an remtih miau siloh vangin zakkep nei tunin Chhungkawpa ka ni ta reng anih hi.

Chawlhkar khata ni 7 awm hi ka thu chu nise ni sawm chuang lai ka dah tur hi a ni a, a chhan chu ina awmna hun nei lek lovin Inkhawm leh hnatlang, committee leh  Office dawr tih vel hian ni 7 chu a chhun a zan in a khat reng mai a, Minute Book ringawt pawh thuah tun tham han kawl meuh chuan Pa thluak hi a buai ve fo mai. Naupang ho a pawlsang ber pawh Class III chauh la ni mahse zirtur an  ngah tawh a, pencil nitin an tibo a, eraser thar an mamawh reng a, zan tin an form suk a lo tul a, a upa berin homework a tih zawh hma in a teber mutpui a ngai bawk si.

Chung hun  buaithlak leh indaihloh hun chhung zawng zawng ah chuan kei chuan Committe  emaw Kohhran hla zir turin emaw ka chhuah a ngai zantin tho a, hrereng mah ila ka kalsan tho angai, a chhan chu ka title neih te kha an ni a, ka ngaih pawimawh avanga puitlinga chhiar ka nih phah ve bawk si.

Mawng pawh hung hman lova nilenga an vir buai  hnu ah Paber Office ka bang thingpui min lo pe a, naupang lehkhazir leh eirawngbawl leh Insuk alo kawp vek a, zanin hi ka awl zan anih mial avangin amah chauh nilovin kei ngei pawn mak ka ti a, naupang an han mufel a, inchhung a han phiat fai a, Mizopa khumpui ngei ah kan han mu a, engge maw chen hnu ah ....."Kei alawm vannei le" min han chho tih hi chuan Nupui te that zia leh fel zia hi ka hrechhuak thin Zaitea'n (Zairemchhunga Royte) a ti.

Thalai nun

Fur tui a lo tla tan a, Indian Filmstar Kajol ten Padma Shri an dawn lai leh  Sri lanka leh India ten Cricket World Cup khel a Mumbai  khawpuia an au thler duai duia lai khan.... Lybia sorkar buaina avanga civil war thlenga mi tamtak ten nunna  an chanlai leh Kohhran Chanchinbu enkawltuten hmanhmawh taka Press lam an pan dawr dawr lai te, London khawpui meuh pawhin darkar khat laia an sana an herh hma laiin mi hrang sa hrang hma a zamlo tur kan thalaite chuan mamawh an neih hre uk si lovin mamawh em em siin kan Khawvel hi anlo hmang ve me a.

Hmundang leh khawdang sawi lovinmahni chenna mual te te ah  bul ihan tan teh ang, Hnam pum huap te Ram pumhuap ten thil pawimawh a awm a, rampum huapa hlim taka awm hun pawh alo thleng fo thin. Kan sih leh sa hian chutianga Thalai te han cho  riau hun chu anei bawk. Mahse Thalaite hi khawiah nge anhlim anga, khawiah nge chu hun thawl, zalen taka mahni eizawnna leh hnathawh kalsana hun an pekna hmun tur chu.

Thalai tana hl;imawm hi nu leh pa  leh NGO tan a hlimawm kher loh. Thalai tana nuam hi Kohhran tan a nuam veklo, Mahse Thalaite hlimna leh lawmna chu thik ni awm fahrana an hnawla, an do a, an hnial zel hi thil thaber em ni dawn?

Thalaite tan nuam leh hlimawm hi kan dodal zel anih chuan an tan kawngkhat kan hawng tihna  ani, chu chu  zalen an nih veleh Uchuak tak leh am taka an nun hman hi. Chu hun chu alo thlen chuan a thenin sawn an pawm a, athenin an thlak thung a, a then an OD a athen in an tih thar phah bawk. Mizinga polite taka mahni bialnu/bialpa te kawm an thiamloh phah a, In ngaihzawnna chu a ruk thei angbera tih ngai ah an ngaih phah.

Nu leh pate buma chhuah chu an tan thil tih tur awm chhun leh tih makmawh ah kan chan sak a, hun awl leh hun thawl, hun zalen tawite an neih chu a am thei angberin an chen ta mai a ni. Chu hun tawite chu an hmu theilo anih chuan an computer hma ah emaw an tv hma ah rei tak an thu a, an Mobile anhmet char char a, tlai takah an mu a, an tan thawh hma a theih loh tih hrereng chungin Thalai mut hun hrelo thawh hun hrelo tih tawngkam chu kan bel leh vek lawi si.

Mu tlem na nana chu chhungte rual lova  tukthuan eikham veleh a phur taka hnathawhkawr inbel chu thil harsa a ni tih hriatpui mang lova, kan thalaite hi an thatchhia tih lehngawt pawh hi a dik ber em ni?

Kan khawtlang hian Thalaite nungchang hi zir ila, thalaite mamawh te hi hre chhuak ila, an tan thianghlim taka lamna hmun te ennawm enna hmun te, an duhtak te nena lungchim taka inkuah hleuh hleuhna hmun tur hmun thawl leh  nuam nei bawk ila, a tawk chauha Thalai nun chen a tul zia te  zirtir ila chutih hunah chuan kan thalaite hian engvangin kan ram hi  sang takah min hruai loh lem ang le.
 http://northkolasib.org/