SKY BAR

Traveloge-4
(Covid19 lockdown article 22)

Tlangsam kara Lamkhuang buk hnuaia uluk fahran, zam ru tak bawk si a biahthu kan hlai khan mi changkang deuhte chuan Thla leh Arsi hnaih theiber tura an rina sangah ṭhenloh biahthu hlanin biang in si rialin an hun an hmang ve bawk a. Khawvel kan chên dan hi in anglo hle mahse tumah hi kan in itsîk lemlo a nih hi.

Hmun tamtakah Sky Bar hi i hmu in i hretawh ngei ang, mobile games a Carrom pool khel thinte chuan Dubai Sky Bar ah te kan khelh thin kha maw. Zu leh in tur dang, sehrep ilo vel zawrhna Bar hi hmun tamtakah awmin kawng ân mai ah te pawh tamtak a awm. Sky Bar erawh chu kawngpui ân nilo, kawngkal pawn an hmuh mai mai lohna inchhawng sang ler ah a awm thin.

Hmun changkang tamtakah chuan ei tur hi inchhawng chunglama dah a ni ve hrim hrim thin a, motor thâwm leh kawngkal thâwm tihbuai phakloh ah zalen taka ei theihna siam a ni thin. Shopping mall lian leh changkangho pawh hian chhawng chunglamah vek ei leh in an zuar tlangpui thin.

Sky Bar chu Inchhawng sang chung zawl ah, mawi taka chei niin, light leh music system a thuam a ni a, dawhkan leh thutthleng a awm a, han lamna mai tur hmunruak a awm tlangpui bawk. A enkawltu nula leh tlangval zei em em mai, hmeltha leh nalh ten polite takin chu hmuna kalte chu an lo dawngsawng thin

Hmun thenkhatah chuan Hotel mikhual nilo pawnlam mite tan pawh dawr theiha siam ani thin a, mahse sum sen a hautak deuh vangin a ziaawm deuh lo chu an kal manglo thung a, a kalte erawh an in la champ ve ngei ang.

Sky Bar hi chhun ah an hawng ngai meuhlo a (chhuna inhawng kala hmulo) zan lamah erawh chuan an lûn viau ṭhin a, a kil thim deuh laia insi chiala ṭhu an awm mek laiin lamtuala zawite a lo su hlah hlah an awm bawk. An ṭawng lung lung ngai vaklo a, zahawm tak, hawihhawm leh nelawm tak siin an awm ṭhin. Kil khatah chuan Bar tender an awm a, hnehsawh taka cocktail an siam laite chu hmuhnawm tak a ni.

Thla leh arsi eng de chuai hnuaia a tawk chiaha light tihèn ah, en kham theihlohte nena in hmatawna han ṭhut chu a thlakhlelhawm hle dawn a, a mawina belhchhah tura khawpui eng de tuar mai kiltin han hawikual paha, no ringrêk dawm chunga kumtluang daih thu han chham vel chu a romantic lo theilo.

Hotel Bar leh pawnlam Bar te aiin ei leh in man a to tih hriatlawk tur a ni a, hmundang aiin tip pawh a san ngei a rinawm.  Hmun thenkhatah chuan member niin an hmang thei a, hmun thenkhatah chuan khualzin tanlo chuan a hranpaa man chawi a ngai.

Sky Bar hi i la kallo a nih chuan i kal hma in hriatchian tum a thaa, menu, rate, book man, etc hriat lawk a him ber. Sky Bar a duhtawka rual i pawl hnu ah inhnuaiah i chhuk dawn tih hriatrenga, elevator chuan nuam tawk tala in control a tha bawk. Hmun thenkhat ah chuan staff ten thawmhnaw an ha tlem hle a, ha tlem mahse lo zuam ngawt a fuh lovang.

Tun ṭum atan duhtawk dawn ila, Hotel changkanga i thlen hunah Sky Bar an neih chuan i kal ve ngei dawn nia, khawvel hi a mawi bik riau a nia. (Model te hmel hi chu ignore mai nise😄)

COVID19 NEN LUNGRUALIN
(Covid19 lockdown article-21)

The law of a daptation hi hringnun dana thil pawimawh leh ṭul tak, zawm hlawh leh tihdan hlawhtling tak ani an ti thin a, chuchu mahni lam insiamrem zelna hi a ni. Chu dan chu awm talo sela, hringnun hi a buaive thin ngawt ang.

Kan taksa khawl ropui tak pawh hi insiamrem in a hun a hmang nileng zankhua a, khaw vawt, khawlum, ei puar lutuk leh rilṭam thleng hian kan tuar theih turin a lo in siamrem thuai thin. Natna kan tawh leh kan in hliam palh nikhuate pawh hian kan taksa chu a insiam rem thuai thuai thin niin mithiamten an sawi.

Media a chak hma khan keini hmar lama awmte hian chhim lama thil mak leh rapthlak thleng kan lo hriatte hian kan lo hlau em em a, kan lo fimkhur phah viau thin. Sarthi te leh tualthatte pawh rampumin kan hriaa, kan râp a, kan hlau bawk a. Mahse Media a chak hnu hi chuan chung thil hlauhawm leh rapthlak kan tihte chu kan hre thuai thuaia ngaiah kan neih a, kan engah mah a thawk talo.

TB natna kan hmelhriat tirh chuan Ngawr hri tiin mipuiin kan hlau a, Cancer phei chu kan hlau lehzuala, cancer damdawi leh invenna tih chu kan lei thuai thuai a, HIV Aids kan han hreleh a, kan hlau a kan ten bawk a, mithi thlengin kan pack ta hial a, Hepititis te hlei hlei kha kan manganpui a nih kha.

Khang natna kha a bo ta em? Bo lo ala awm reng, Zeng natna bak umbo kan nei taktak em ni? Malalria lah chu umbo tumin theihtawp chhuah nimah se, kumtin mi engemawzat in an la thih phah fo. Henglo pawh natna tamtak hi umboa ti rêm lo hian an la awm reng.

Mahse, heng natna tamtak mihringte thih phah theih hial natna ṭihbaiawm takte hi vawiina nitin kan chenpuite an lo ni ta zawk. Kan kiangah, kan sîk phak rengah natna ṭihbaiawm tak takte chu awm mahse chungte chu kai lovin damlai pialral kan chên mek a nih hi.

Vawiin hian Covid19 hi kan umbo mai dawn hauhlo, WHO pawn bo mai turah a ngailo hial a nih kha. Kan hriat angin nitin natna kai thar leh thi an awm reng a, kan ram ngei pawn ring takin ralkhel dar a vaw ri reng a nih hi. Mahse keini ang ram pachhe tan chuan umbo chu sawiloh hnawh kian ngawt pawh thil harsa ani si.

Hmelma chu hneh dawnloha ral mai ai chua thurualpui mai hi a finthlak zawk ang hian Covid19 hi nitin kan chenpui atan pawm thiam ila, chumi tur chuan insiamrem hlauh zawk ang u.

Nitina kan chenpui, kan khawsakpuite hi chenpui nuam an ni vek kherlo mai thei, mahse keimahni lam kan insiamrem thiam poh leh kan hahdam dawn tih hrereng bawk ila.

Family economic a nghawng a, kan ei a chhe sawt a, kan chawhmeh a tlem sawt a, kan chhun thil ei a kiam sawt ani thei, sum lakluhna kan nei tlem sawt a, kan hlawh a kiam sawt a, kan income a tlem sawt a nih pawhin chumi mil tawk chuan in siamrem tum ang u. Inkhawma lam vir kual chiam a rem talo anih pawhin pindan chhungrila Tawngtai tam lamah insiam rem ila, vantlang huapa show neia entertainment lam buaipuitu kan nih pawn Online lamah emaw Television lamah emaw in siamrem tum ila. Nitin thawhchhuah chawp eizo thin kan nih pawn nitin tlemte chhekkhawl dan zir thar ila, chutiang zelin kan nitin hun hman dan hi kan siam rem a tul ta ani.

Mi ina leng kual mi inih pawn lenkual aiah telephonea biak lamah ramṭang hlauh ta la, ṭhenrual kawm chi i nih pawhin inchhungah i khawih tur i tuizawng dapchhuak ta la, ṭhian zahova chhuahvah nuam ti chi i nih hlauh chuan thianzaho a group chat nuam tih zir ta bawk la. Bazara chhuak thin i nih pawhin kiltin i hrut kual loh nan in lamah i leitur list siam fel thlap la, a bak lei miah lovin haw daih tawh la. Tun hmaa i tih ngailoh tih tur tamtak i neih a ngai tawh dawn a, mi i hlat a ngai a, mi hmazawnlo a thut leh tawng te, kut silfai leh hmaituam thlengin, tunah chuan i ning a, hrehawm i ti a, a dik a lawm, i ti ṭhanloh hlir tih a ngaih tawh vang kha a nia, mahse chutak chu insiamrem dawna pawimawh chu a ni si.

HIV,Hepatitis, Cancer, TB leh natna hlauhawm tamtakte hi an awm reng, mahse kan kai vek lo. A chhan chu chung natna kailo tur chuan kan in veng a, kan in siamrem vang a ni.
Covid19 chu kan nun ah hian senglut law law ila, kan nitin nunphung ah hian telh law law turin insiamrem ila, mahse, a hrik kai miahlo turin fimkhur thung ang u, chu chu kan damdawi neih thatber ala ni hrih si.

Kan duh emaw kan duhlo emaw pawh ni raw sek sek he natna hian min la luhchhuah dawn khawp. Chumi hunah chuan a insiamrem thiam apiang an dingchang dawn. He natna in a nghawng tam tak economy, zirna, kohhran leh khawtlang thil tamtakah hian kan zinga telve turah pawm ila, chenpui ila kai lovang u. Covid19 nen lungruala lendun zir mai hi kan dam khawchhuahna tur a ni.
(Thiam ila chuan a aia uar hian ka ziak tur)

RIHDIL KAMAH HAIH JISHH!!!
(Traveloge-3)
(Covid19 lockown article -20)
Fur ruahtui dir tluk tluk a kiang tawh a, ṭhal bouak thiang nuam lo herchhuakin thlasik a inṭan ti tih tawh a, hmanlai pipute sulhnu enkualin khaw hrang hrang kan suartluan hnu ah Rihdil lam hawiin Champhai Tourist Lodge ah kan in vawm lut rawih a, kan khaw makpa fel zetin a lo enkawla min duhsak nangiang mai.

Zingkar ah Champhai District Courta lalber in chaw min eipui tete a, an police lal em em kan han chhaih nuih leh hnu in Rihdil kan pan ta. Buana hmaa kherh tih ang maiin kan thlen hma in kan motor dahna tur leh zan riahna lam kan buaipui hle a, Mizoram leh Myanmar ram in ri na laia khaw nuam zet mai Zokhawthara ka thianpa in min lo dawngsawng a, ramdang nena insumdawn tawnna thu ah thil a lo khirh khawp mai a, kan zinga  Mithiam zirna sangbera zirtirtu ṭanglai leh Sipai lal em em fapa chuan Zokawthar major chu tlawn tih tih, vau titih, in sawitheihkhum titih in an lêm ngial tak naa kan motor chuan ramri daidanna lei chu kai an phal thei tlatlo mai. Mahse ka thianpa feltak chuan engkim a lo enkawl theih thu a sawi takah chuan a kutah motor pathum lai kan dah ta a.

Ramri kanna senso engkim kan tihfel hnu ah, Ṭiau lui kanin ral lehlam Kâwl ram chu kan dailut ta chhak mai. Rihdil pan nan motor hire tur min han biak kual sak zung zunga, chumi hlan chuan ṭhian thenkhatte chu an khap veloh thil lamah shopping an lo nei mek bawk a. Motor ah kan lut, kan ṭhu kim ta maw tih ah, kan bag 1 a kimlo tih kan hre tatlat mai, zan lama kan thawmhnaw lum hak turte toilet bag ilo vel kan dahna ani a, kan han zawng ngial a, kan hmuzo tawh silo, rilru pangkhing angreng deuhin kan kal ta, kei vawt tuar chaklo ka nia ka thlaphang deuha mahse kan zinga a palianlo berin 'ka jacket i ha dawn nia' a ti a, lung a muang ta. (Kan bag hi kan haw lamah kan hmu leh hlauh)

Rihdil kan thleng, an lo zi huai huai mai a, mizo pawh tamtak an awm a, kâwlho hlei hlei chu a nuam ti ti ah an ṭang a. Zanriahna leh ei leh in chungchang kan han buaipui a, thil a khirh leh ta ṭuat mai, Sipai awmlai ani a, Sipai lal a awm bawk si a, zalen taka min riahtir kha an ngam mang tlat lo. Ka ṭhianpa in theihtawp a chhuaha, 125(uan tu faih) in a tlan tawn kual chhen hnu ah permit chu to deuh ṭalhin min pechhuak thei ta a, riahna leh ei leh in pawh kan in book fel chawpchilh nghal ta bawk a.

Han en mai pawh hian Rihdil chu ami den dan a dang zar nghal mai a, rilru ah pipute ho an lang nghal zut zut a, mitthi khua leh pialral thleng thlengin kan mitthla nghal chuai chuai mai. A kam chu awi tlân zâl nuam tak a ni a, phul a hring dup mai a, dil thlir remchang em em mai hian riahna tur cottage a awm tlar ṭhat a, chumi thlang ah chuan Mei khawl (generator) leh an khap veloh zawrhna a awm a, a bulah chuan a enkawltu In, ei leh in zawrhna ni nghal a awm a, helai hmunah hian zan dar 10 thleng chiah Mei (lectrict) a awm dawn a, chaw leh thildang chu duh ang zawng order tur tihte min lo hrilh thlap bawk.

Dil chu Rih pal an tih mai thing zar bawrchhawr deuh kawkalh em ema in sîr khup hian a hual a, dil kam lehlam chu buh chinna atan an hmang bawk, a tui a fim tha a, Rih Ar an tih pawh an awm sap sap mai. Tawka (love sign) anga a lan theihna chu a hnaihber khaw tlangvchung aṭangin a ni a, chutah chuan khawthlirna remchang zet mai an siam nghe nghe. Rihdil atang chuan Uan tu Faih(125 bike)hire a han kal mai tur a ni.

Cottage lamah kan in vawmlut a, cottage pakhat chu room hnih zel niin khum 4 a awm a, lei atanga feet 3 vela kanga sak ani a, a chhuat thingphel niin Rihdil lam an hawi ṭhat a, veranah nuam tak a awm bawk. Khum chu a dûp lualo naa a nuam viau a, thosilen leh blanket a awm bawk. Battery charge duh mah ila zan dar 6 a rik hma chuan engmah a tih theihloh. Bathroom chu a awng deuh suara inhnuai a lang thei a, European type Commode leh Sink a awm ve thlapa, tui vawt nuam tak herh haw mai turin a awm bawk a sahbawn an chhawp sa bawk.Khumbul dawhkanah chuan Toothbrush, toothpaste leh sahbawn bakah tissue a awm ve thlap.

A kawt phul cham dûr mai chuan min hîp ta ber a, dil chhuk thlir chugin kan ṭhu khawm a, van boruak a mawi em em a, nitla tur chuan dil a chhun eng phût a, dil chungah chuan chhum rialbawm ang hi a in pharh duai mai bawk a, lung hi a leng vawng vawng a ni tawp mai.

Kan titi ṭan ta, eng agenda pawh kan sawi tui èm êm mai a, a khat tawkin thla kan la thùl, chaw lah chu 8pm hnulamah kan ei ang kan tisi a, hun thawl tak ah rilru thawl takin kan khawsa ta, an ram chhiah lakna kha khap ve heklo, Haih jishhh !! a ni tawp, sawi tur a ti tam em em mai a, mi chi hrang hrang awmkhawm tihtakah kan hawl kual variety hle. Kan titi kar lakah Ukulele perhin kan zai tak rawng rawng ah.
Hlauhthawn deuh ang taktak in ka duh aiin a vawt tlat, jacket offer ka hmuh ngei mai kha ka ha ta a, ka tan chuan body fit an sawi ang mai hi a ni a, mahse min vawng lumtu a nia ka dem phal hauhlo. Kan hriat zawng zawng kan sawi hma in chaw ei a lo hun der a, dil kamah puar el euhin zanruah kan ei ta a. Helai hmuna ei leh in hi a to fang fang hle mai a, kan lo pai mailo kha kan inchhir ṭêp a ni.

Mut zai kan rel meuh chuan Thla pawh a her bawih tawh a, patling ṭhankinin zan rei lama thingphel chhuat dim vak lova kan han rap chu Sabengtung kawlh in hrosa thawm tepawh a ang rum rum hian ka ring.
Rihdil kam ah kan riak a, mahse haih jishh hi sawi vek a rem lemlo ram pawn lamte a ni si. Haih jishhhh!

ABHI SILCHAR
(Traveloge-2)
(Covid19 lockdown article-19)

Kan pi leh pute khan Hringchar tiin an sawi thin a, Cachar Distict khawpui, khawpui hlun leh upa tawh tak, central minister te hial pawh awm tawhna khawpui pawimawh Silchar ah kan zin a, vawi khat mai nilo vawi tamtak in kalve tawh ngei ang.

Tuifinriat atanga teha km 72 leka sang, municipal ward 30 awmna leh mihring nuaih hnih dawn awmna khawpui niin Assam state khawpui lar ber dawttu a ni.

Silchar ah hian awmlo a vang khawp mai a, awmlo hi chu zawn ngial a ngai zawk an ti. Silchara lar deuhte Maldhigi Mall (Big bazar, Pantaloon leh market dang awmkhawmna) te, mizo in “Au au bazar” an tih mai Ṭhianite lane te, Tuiruang leihlawn ropui deuhte, civil aviation in an hman hawh sak Airforce ho thlawhna ṭumhmun Silachar Airport te, NIT, Medical College, Assam University leh Ranggir Khari a Subash Chandra Bose lim ding luahte hi hrelo an awm manglo.

Hotel tamtak a awm a, Rambo Hotel atanga Star Ranking Hotel thlengin a awm a, chung hotel zinga pakhat Holyday Inn ah zankhat lek riak turin ṭhalai rual kan riaklut rup mai.

Lobby hranpa a awm vaklo a, reception counter chu kan hual tuau tuau a, India ram Hotela pawimawh em em check in dawn a Passport/ Voter id/ adhaar card pekluh tel ngai hi an ngai serious viau mai a. Keini lah chuan register ah kan duh duh hming kan ziak si a, receptionit pawh a buai hle mai, saptawng a thiam mumal loh ang chiahin vaitawng kan thiam mumal silo a, kan in bekbawr rei viau a, mahse kan zingah ṭawng thiam tak tak an awm a, kan in tifel ta.

Inchung lamah room in sem tlangin kan chho ta dum dum a, mizo style diktakin mahni room turah bag kan in dahfel hnu ah midang room ah kan kalkual leh huai huai phawt a, chumi hnu ah Bathroom ah kan inbual sup sup.

Puja puiber an ṭan ṭep tawh a, khawlai chu an chei vul chûk a,  a êng chei chuai a ni ber. Pawnlam ah chuan thawm a bengchheng hle a, keini ho pawh room pakhatah kan awmkhawm a, kan nui uarh uarh a, kan bengchheng ve hle bawk.

Zanlai pelh dawrh hnu ah mahni room lamah lutin kan mu bawrh bawrh a, Silchar khawlum chu tui takin kan mutbo san daih.

Telephone ri thawmin min kaiharh a, chutah door bell a rawn ri leh, a hnu lawkah telephone bawk a rawn ri leh a, kan zinga vaiṭawng thiambera kan puan ngei khan phak zetin ‘hello’ ava ti. Vaiṭawng ngialngan hian vai receptionist chuan a rawn bia a, kan vaiṭawng thiam chuan “ ha, ha,.........abhi” ati a phone a khup hmak. Keini vaiṭawng thiamlo chuan ṭi dêkin “enge ni ta” kan ti a, “Rang takin Room ah Breakfast sa vervawrin rawn dah rawh u ka ti a nih kha” a ti nghal zat. Mahse hlauhthawn rukna keumahah a lopiang nghal, rinhlelhna a tel deuh bawk, lei chawina ni êmlo mahse a pawisawi hlauhna ka nei tel bawk. Ṭawng duh tawh miahlo se vairam ah hian ‘ek dui’ mai lek kan ni dawn si, mahse ngaih a ngam thei thlawt silo.

Chutianga rilru insual, in khâp buaia ka awm lai chuan waiter in eitur a rawn chawi vu vu a, room dangah a va dah. Ka rilru a turtu chuan min tur hneh em vangin ka kâ ka chip thei ta ngang lova, “Telephone a i biak lai khan ka lo ngaithla reng a, “ha ...ha.......abhi” tih chiah kha i sawi si a, nang lahin rang takin breakfast sa vervawr room ah rawn dah ru ka ti iti bawk si, ‘abhi’ tih khan khang zawng zawng kha a sawi vek em ni?” tiin ka zawt ta phawng mai. Min chhang chiangkuanglo naa ka zawt chiangkuang ngam tawh bik silo. Waiter dang an lokal leh a kan thiante mulaite an va hlui a, room dang an pe zel, kan nghakhlel ve tawh, ril pawh a ṭam, waiter an lokal leh room dangah bawk an pe leh ta.

Ṭhiante room ah kan kal kual a, breakfast eina hnu an ei bang nawi alo awm zel a, keini lah rangtaka sa vervawr dah tura ‘abhi’ ti a order kha alo thleng thei rebg reng silo. Ṭhiante zawng zawng eizawh vek hnu ah breakfast dai deuh duk tawh hi vai hriselloh hmel deuh hian a rawn chawi lut ve ta hlawl mai. Kan vaiṭawng thiam bawk khan alo chilh zêk ni ngei tur ani, a ti vei khâ khâ tlat, mahse ‘abhi’ a sawi tello a, a hmanhmawh thlakloh a ni ang.

City of Love an tih Silchar hi mizo sumdawng luhkhawmna a ni a, Burma sumdawng kan tihte thlengin he khawpui hi kan dawr a, foreign lane changtlung tak a awm a, thlasik lamah Bhutanese market te a awm a, khêl lovin kumtin Gandhi mela leh Green silchar phool mela a awm thin, mizo tan chuan Prem Talla, Shillong Patti, Janiganj leh Maldhigi Mart hriatbel a, Sonai road atanga haw tur kan ni tih chian leh mai hi a awlsam ber a, E-Auto service a tam a, cycle ricksha a la tam hle. Sap ram ang maiin an sanitation truck erawh a changkang hle thung.
Ramdang ang bawkin Silchar hian zia a nei hrangve tih hriattel a tha, Mizoṭawng thiam an tam a, mahse vai rilru bawk an pu tih hria in nel lutuk loh hi a him ber mai. Min duhsaka min duat viau emaw tih pawh hian a lo nilo leh thin a nia, A bak chu i kal huna i chhunzawm ah 'Abhi' i zuk tive dawn nia.

(covid19 article-18)
Amah Hriatpuia Pa Kolasib hi kava tlawh dek dek a, "Travellouge lam hi ziak teh" mi lo ti khauh mai a, ka ngaihtuah a, ziahtur ka nei thei angem aw ka ti a, hei ka han risk chhin a nih hi. A duhdan a ni em tih phei chu ka hre law. Comment min pek theih hlawm chuan ka lawm ngawt ang.
               ---***---

PATTAYA  DAWR TÉ

Gulf of Thailand tuipui kama a awm, Chonburi Province, mahni a ro in rel khawpui (self government municipal) Pattaya khawpui hi nawmchenna hmun an tih mai leh, khualzin tam em em na hmun niin, Thailand a khawpui lar berte zing ami a ni a, Russian, Indian, Vietnamese, Japanese leh Europe ram thenkhat hi khualzin an thlen tam zualte an ni.

Shopping Mall lian leh ropui tak tak te, Russian Market te, a awm a. Tuipui kama awm a nih vangin tui nena in kaihhnawih in tihhlimna chi a awm vek a. Theatre leh Cinema te, Muy Thai leh Arpa insual tirna hmun te, Botanical & Hitorical hmun ropui takte leh Hardrock Cafe te pawh a awm.

Kawtthler pakhat chu Walking street an ti a, he kawtthler hi a hmingthang hle a, tourist ten an tlawh ngei ngei thin a, chhun leh zan danglam lem lova hmanna hmun a ni, chutah chuan Dawr té a tam em em a... mipa nilo tawh phawt chuan dawr an hawng...ti ila,, a lang thei chiah biklo naa han belhchian chuan dawrkai an lo ni zel mai.

Tuifinriat kam maiah chuan kawngpui ngil tak a awma,  chumi bulah chuan palm tree a chei mawi ke a kalna zau tak a awm bawk. Chu hmun chu Beach road an ti a, chu kawngpui zau leh nuam em em chuan walking street chu a va pawh a,  zan lamah chuan he kawngpui dungtluan hian dawr té a tam hle mai.

Pattaya ah hian pawisa i neih chuan Lei, lei chung leh lei hnuaiah nawm chenna a awm vek an ti a, tak tak nimaw, mi thenkhat chuan Paradise city ti te pawn an ko thin.

Ladyboy tamna hmun a ni a, massage parlour ropui zet zet mai a awm fur bawk a, ladyboy show ropui Alcazar leh Tiffany pawh he khawpui ah hian a awm. An khawpui dang ang lovin Sky train leh fly over bridge a tam velo. Kut hnathawk  leh lo nei awmtho mahse  Eco tourism an hlawkpui zawk vangin chulamah chuan an kal na hle a, public service lirthei pawh a tam nangiang, Tuk Tuk chu kan rama Auto rickshaw ang deuh a aia lian si hi a ni a, he Tuk Tuk driver te hian engkim an hria an ti thin a, mahse mi ei tum reng an nih vangin fimkhur a ngai hle.

Tlai ni nem hun a Beach road a i kal chuan loh theihloh vin Pattaya city tih lian em em a tlang panga in ziak chu i hmu anga USA a Holiwood tih an tar kuau ang mai khu niin khualzin ten chumi lang tel kher chuan thla an la ngei ngei thin.  Zan ah chuan eng mawi takin an ti eng thung. He Beach Road ah hian eitur leh in tur chikim a awm vek a, streetfood tuitak a awm bawk.

Khawlai bazar a Kekawrbul thar lei tur nula te pawh hian khawlaiah an ha chhin mai a, a awlsam hle mai a, trial room hanpa an mamawh lutuklo,  Zing atanga zan thlengin tuifinriatah para gliding, sea diving etc etc an ri chuah chuah reng a,  Dawr tamzawk chu 10-11pm ah an khar a, eitur zawrhna chu an hawngrei hret thung. DawrTé erawh an in hawng tlaivar niin a lang. Pattaya veng dang chuan zanlai hmang zovin khawfing chah an nghah mek laiin Beach road leh walking street chuan an thawm an thlahdul meuh lova, zan chuan chhun an bantlang tir leh nge nge thin. Zanlai pelh hnu hian dawr té engemaw zat chu an kalbo tawh naa tamtak zingkar thlenga inhawng pawh an awm. Heng dawr te  hi  a dawr bungrua aiin a dawr neitu hmeltha an in hralh thei zawk. An dawr bungrua chu chhing te in an hliahkhuh a, kawngsir leh remchangah an lo ding thin a, a tamzawk erawh chuan Bar leh Barber shop vel ah te dawr an hawng.

Dawr té hi Russian nula leh Asian nula ten an hawng nasa ber a, Europen leh American lam an tamlo, ram rethei leh ram buai nula ten an hawng tlangpui.

Thawkkhat lai khan an Mayor in tihtawp tumin hma ala a mahse a hlawhtling lova, register a Dawr té hawng hi mi 2000 vel chauh an nei naa, dawr hi a sing tel tehmeuhin an hawng si a, hei hi an rama Tourist te sum laksak hnembertu a nih lawisi vangin sorkar lam hian a haider ni awm tak a ni.
Pattaya i kal hun ah heng Dawr té tehi han en ve ngei la, mahse dawr ve kher lo ang che.
(The story of freelancer at Pattaya)

THEIRIA LAWH THU
(Covid19 lockdown article-17)

Khatia Pawlthlang School (Middle Schhol) kan han lut ve ta kha mahni tawkah kan inti nalh hle a, uniform mumal ha ngailo kha Puanpheikhawk var leh mawza var bun a ngai ta bawk nen, changkanna kawng khat chu kan zawh ta poh a.
Thawhṭanni tuk a lo ni a, Kekawrbul pawl, kamis var leh Puanpheikhawk var mawza var nen kan in ṭam ap mai a, tunlaia school bag hi a la awm lemlo a, Ipte kha kan ak a, kan thianho pawh phur em em in school kan kal a, pawl li room ah kan tlan kawi zawr zawr thin.

Ka ṭhiante kha kei aiin an advance deuh vek a, an love letter pe kual veltu ka ni deuh ber a, mahse zei kha a ngai nasa mai a, tuma hmuhloh a lehkhathawn pek, a tuka a chhanna tuma hmuhloh bawka lak leh kha ka hna a ni. Chawlhlawk laiin meizial bung zawng tura ruat ka ni ziah bawk a, kan boss ten chawlhlawka an zuk hman ngei tura lêt leh a ngaih vangin kawngsir dung tluan hmanhmawh tak siin kan suartluan thin.

Zan ah pawh chhun ah pawh lehkhazir kha kan ngai
pawimawh em em lova, changpat chehchhum an sawi ang mai hian kan tal vel mai mai niin ka hria. Mahse, kan lo tal mai mai hauhlo, keini thianho mi panga zingah bialnu neilo chu keimah chauh ka lo ni ta reng mai a. Ka chhiat em em bik vang pawh ni lovin kala neih ngamloh vang a ni mah zawk.

Zankhat chu Drama kan  show a, room pakhatah puan kan zar a, entu kan ngah lemlo kan ṭhianite ho bakah naupang chumchiap tlemte an ni a. Ka kawr âwm chhungah changel kâwr leh dawl kuang kan dah a, a changtupa chuan min vit anga, a bur vâ vâ tur kha a ni a. Min han vit taa, chemte kha a rit roh si a, a bur mai ta hauhlo, a aia uar zawkin min han vit leh taa, ka âwm a thip zawk, a thî nghal, a bur vâ mai bawk si. Kan thianite ho chuan, “ava ang em!” an lo ti a, nia a ang mai nilo in a vit tak tak a, dawl kuang leh changel kâwr pelin a vit a, ka thisen a chhuah phah hial a ni.

School ban hian in ah kan haw mai ngailo a, kan leng kawi ziah thin. A chang chuan School thlanga pialtlêp thui takah mawng belkang tuar khawpin kan tleng thin bawk. Damdawiin tlang phûla thim dawn thlenga tawlh te kan hrat viau thin.

Tlai khat chu Theiria lawh kan tum ta, kan inbul maiah hian Theiria kung hnih ngawt a awm a, chumi lo tur chuan ṭhianite ho zawng nen kan in lam kan pana, kan lawn ta, mahse zar khata a pair te te a awm kha mipa lam duhdan a ni si a, kan chhuk leh vek, a bul aṭangin kan lawn ṭha leh a, tunah chuan zar khat ah a kawp tete in an awm kim ta, kei chu kawp tur awm heklo a zár âwl kan lawn ngam ngailohna a arkhen (a ngêt in thing a tih sawrbawk, tliak mai thei khawpa rinawm lo hi Arkhen) zar ah ka lawn a ngai ta tlat mai. Hlauthawng zetin ka lawna Theiria chu kan ei mawlh mawlh a, kan kawr ipte ah kan ak bawk a, school form var ipte a Theire hmin ah chuh...a sufaitu kan nilo kha kan vannei thin.

Kan duhtawk kan ei hnu ah kam chhuk dawn taa, a kawp tete bawkin an han chhuk a, a hnukhawi ah kei ka chhuk a, ka fimkhur em em emaw ka tih laiin a arkhen lai chu a ri tuarh a, Theire zar nen rang deuhin lei kan thleng rual thla zui a, thiante ka delh nual leh nghal.

Engatinge khatih hun lai khan Theire zar khata awmdun kher zel an tum le tih hi kala ngaihtuah fo nia.

HMUHNAWMBER 3 NA

(Covid19 lockdown article-16)

Kan ram ah hian hmuhnawm atam vak lova, Cinema te a awm tawh lova, Theatre mumal tak kan la neilo bawk nen, khualzin chamrei deuh tan hian tihtur a vang ngawt hian ka ring thin.  London ah chuan Theatre tamtak bakah O2 Arena a awm a, chutah chuan hmuhnawm en tur a awm reng a, Pattaya ah chuan Alcazar te Tiffany show te hmuhnawm a tam hle, Singapore ah chuan Cinema 297 a awm bakah Theatre tamtak a awm a Repetory Theatre te chu lar tak a ni.

Mihringte mit hi thil hmuhna tura siam a ni bawka hmuh tur hi a zawng ruaia, thil danglam hmuh tumin kan mitte hi a lêng ruai thin a ni.

Khawvela hmuhnawmber chu Nula a ni a, a dawttu chu Pangpar a ni an ti. Nula nalh tak hi Nula vèk pawh hian hmuhnawm an ti a, mipa tan phei chuan a hmuhnawm lehzual,  Siamtun ama dungthula a siam ani bawka, nula nalh tak hian chunglam khi an chawimawi tel kan ti thei hial ang.

Pangpar awmlohna hmun chu khawimah hi a mawi ngailo an ti a, hnam tin hi Pangpar hian min hnaih em em vek mai. Kan pipu hun atang daih tawh réngin Zamzo chu thlam kawtah a vul chûk a, pangpar tel lovin Hindu ho hi an inkhawm theilo  tluk achhâ a ni. Chawimawina leh duhsakna zawng zawng chu pangpara lantir a ni thin a, nun hruaitu leh tihlimtu tia sawi a ni thin.

Hmuhnawm 3na chu Sipai ani an ti. Lammuala ngil fahrana an han ding ringawt pawh hian mit ala zar mai sin,  an han parade a, rual taka an han kal ṭhip ṭhup hmuhte hian ti a mur sung sung thei. India inchhuanna ve tak chu Hell March a ni a, chu chu India Republic leh Independence day a Sipai kalrem lam an entir hi a ni.

Sipai kawr ṭial rak maite hian mit a la a, ralthuam famkim an ak bawr ṭuaih te hi a pui riau a sin, khawi ramah pawh sipai chetla hi mite hmuh kham theihloh a ni a, Buckingham palace vengtu Guards inthlak laite, Swiss Guard inthlak laite hi mipui sang tel tehmeuhin an thlir thup thin.

Sipai chu a bika zirtir leh enkawl, thiamna hrang hrang nei, ram leh hnam tana thih ngam lupu an ni. Thawh tur tihna hmuna thawk, kah tur tihna hmuna kap nghal thei,vengtu, thlamuantu, hnemtu leh awptu an ni. An in thlahdul a rem lova, an thatchhiatsan a rem heklo, an ralven buk an kalsan thianglo a, an duty an ṭhulh theilo.

Tunah hian Mizo mipuite hi Hmuhnawm 3na chu kan ni mek, Khawvel hmelma Covid 19 in  min luhchhuah phêt tumin min rawn hual tuau tuau a, ralṭitna hmun leh ralmuanna hmun awm thluah mahse kan perimetre chuan a sen a kawk mek.

In thlahdul loh, thatchhiat sanloh, tlanchhiat sanloh chu kan tihtur a ni ta. Kan chipui ngei hmun danga tangkhangten haw runpui an nei dawn, kan duty kan tih that sauh sauh a ngai. Anni chu kan hlau em ni? Hlau love hmangaih taka lo duattur kan ni, mahse hripui ngawichawi nunrawng si lenna ram atanga lohaw turte an ni a kan lo fimkhur a ngai.

Ram leh khawtlanga roreltuten rel sela, keini mipui chuan an thu awihin Hmuhnawm  3na kan nih hrereng ang u. Ralthuam famkim 4 kan nei, 1) kut silfai 2) In a tawm 3) social diatancing 4)Hmaikawr vuah. Heng kan ralthuamte hi dah ṭawl mai mai lovin ral beih nan hmang angu khai. Ram pachhe tak kan nih vanga ei leh bara kan lo harsa ta deuh a nih pawhin he hripui hi in eihlum tir lovang u, a boral thak hma chuan kan ralthuam hian i bei tlat ang u. Chu chu kan hna , kan duty a ni reng ang.

Khawvela thil hmuhnawm ber 1 na Nula leh pahnihna Pangpar ni lovin tun hi hmuhnawm 3na Sipai rual kan chet hun a ni e. Mitinin he hripui do tur hian tihtur kan nei vek si.

AGARWAL
(Covid19 lockdown article-15)

Amah chu sa tha nelh nulh a hmel phuloa aw sin rût mai, ruakhau thlurh mai leh zaidam tak a ni , Mizoam ah pawh vawi tamtak a kal tawh a, ka ṭhianpa a nih ve miau vangin a veivah pahin min rawn be ziah thin a, a foreign zin tur lah hian min rawn intihtheih khum ziah bawka, a hming chu Sushil Agarwal a ni.

India ramah hian million 10 chuang zet hi Agarwal an ni a, Nothern leh Central India ah te an tam a, East India Company behchhanin Northeast lamah tlem an lo chhuak a, independence hnu ah Northeast chu an luh chhuah ve tak tak chauh.

India ram mipui 1% hi an hauh a, Hindu sakhua zuitu an ni ber. Sa ei mi leh vegetarian an in zat deuh nawk, Agarwal community ah hian hnam 18 emaw vel lai an awm bawk. "India ram sumdawng lian hming chu Agarwal anih loh chuan Gupta a ni thin" an tih angin India ram sumdawnna hi an kutah tamtak a awm. An awmna hmun apianga an hmingthat em emna chu an sumdawn thiamna hi a ni.

Agarwal hi sumdawng hnam niin Indian economy ah hian an pawimawh a, ram intodelhna hi an kutah a innghat thui em em. Sokhar tha ti chaktu an ni a, senso tlem thei angberin an khawsaa, sum an renchem a, an khawlkhawm bawk.

Mizo hi hnam tlemte kan ni a, metropolitan city 1 zat vel chauh kan ni. Kan industry lianber chu sorkar hnathawh a ni , mi thiam sorkar hna thawklo ngam khawpa mahni kutkawiha ding an awm meuhlo. Hnathawktu tamber chu kum upa lam an ni a, thalai naupang deuh zawk leh naupang zawng zawng deuhthaw hi chawmhlawm an ni.

Khawvel ram lian pui pui leh hausa taktakte chu Japan ram tereuhte technology tello chuan an kalh a kim thei lova. Stage a lam zaw zaw thin kan ngaihsan em em Korea chhungkua tamzawk chuan home industry an nei. Thlaler ramro Arab ramte chuan an leilung hausakna chu nuam tawlpui tham an la chhuak thiam.

Lalpa zawnchhuah ram inti leh Lalpa zawnchhuah hnam hi ui hûm lek nimah ila, chawmhlawm, puih reng nih kan duh rêng em aw, thawk lova ei chu kan hnam zia a ni lova, mi thilpeka in nghah pawh kan lairil hian a pawm ngailo a nih kha.

Sorkar chu min chawmtu, min tuam hlawmtu leh kan kalsiam min  relsaktu ah kan ngai a, kan pawm a, a tha e, sorkar chu kan tan a tha a, a theihtawp a chhuah reng, mahse kei hian cheng khat lek pawha sorkar hlawkna tur enge ka tih ve.Thangkhat lian zet zawt state niin min chawm a, an duhna apiangah min hnuka, min nam bawk a, enge tih theih kan neih chuan? Chaw petu chuan a chawpek chu a thuhnuaiah a awm tih kan he sa vek.

Sorkar ṭha kan duhthute kan sawi fo, sorkar siamtu kan nih zia pawh kan hai heklo, mahse sorkar tan, sorkar tha ni turin engmah kan ti silo. Kan tilo mai ni lovin kan thiam dan theuhin a thau sawh kan tum a ni si hi. Chu chuan enge a hrin kan tihchuan kut tlingloa lak duhna (corruption) bawk a ni leh thin. Campaign laia hnathawhkawr hak min diltu kha lal puan kan sin tir zel si a nih hi.

I awmlohna room light i off hian i tan leh sorkar tan i khawlkhawm a sin, sorkar lirthei hmang lova office i kalte, kawngpuia rod i chhut lohte, tuihawk kawngbo ilo siam thatte,a hun taka hnathawhna hmun i thlen te, pawimawh ah chauh telephone i hman te, i office leh ina entu awmlo tv in chhuah reng i off te, chhiah chi hrang hrang i pek leh abik taka GST i chhun luhte, office thil pakhatmah ina i kawllohte mai pawh hian sorkar tan tamtak i sengkhawm a sin.

India ram kilkhata Mizo nih mai hi a tawk kan tilo, khawvel hriatah Mizo hi kan pholang anga hmai uang kan hmuh tur a ni, chumi ni tur chuan intodelhna lamtluang kan zawh a ngai.

Lockdown in a nghawng chhuah chu thlai chin a ni, chhungtin deuh thawin kan ti sup sup mai, ava tha em! Thlai ei nasa hnam kan nih kan hria mahni eitur pawh thar tum miahlo kan nihzia leh sum a lo hekzia kan man ta. Tun hi a bultanna nise uar tial tial ang u.

Mobile phone kan hman hma khan cigrette vangin phaiah kan sum kan umliam a, tunah erawh chuan mobile network vangin kan sum kan thawn liam hnem em em mai, mizoamah tlemte chauh a tang ve ve a, a bak chu an liamthla duak duak mai. A tlem thei angber mobile phone leh internet kan hman hian kan ramah kan sum kan chhekkhawl a ni.

Agarwal leh Mizo chu kan va inthlau ta ve, mahse kan harhchhuah hun ah, kan ram kalsiam a dik hun ah, mitinin mahni mawhphurhna kan hriat hunah Mizo nih chu chhuang takin kan lantir thei anga, kan in duh ve thei tawh anga Agarwal te nen kan in kiahkuah thei tawh ang, chu mi nitur chuan intodelhna kawng zawh rawh le.

ENGE KAN NIH?
(Covid19 lockdown article-14)


Mal kalh bang awng  kara Smart TV chhhuah phêt zut zut zak lo,  a bâa vawksa hmeh hreh hauh silo, mahnin thiam nei hawt si lova Branded thuamhnaw in bel ngam. Engkim support ringtu fîr lo. Thiamna (skill) aia readymade lei nuam ti.

Chawmhlawm title puchunga thah thianglo ang maia khawlaia leu thin leh a ruihtheih tawh phawt mausam phal lo. Smart phone manto a in selfie a data pack man chhungte dil. Online games a  “Lord” real games a ‘No’ nisi. A bâa car lei  kawngsira zanriah tira jeans kekawr seng theihnghilh phal ngailo.

Thangchhuah diar roh tak hlawhchhuah tum hauh silo.
Restaurant changkanga eitur order thiam zet mahni ina chawhmeh nei mumal leh silo, Lengser hmer khat pawh nei hawt si lova hnahthawh kawr hlau bawk si. A thlawna dawn theiha in register kim viau a, NREGS hlawh suit nena lak fo.

Mahni lawilohna apiang Kohhran hmuh nikhualoh a, rinna lama belh tlak hauh silo. Tuktin zantin  thil changkang hmu mahni changkang silo, local zu chhia pawh in duh khawpa ruih theih thil ngaina, changkanna emaw tia damdawi lo khawih ve ngawt. Arpa sual huai pawma mahni dawih hle si.

Ram hruaitute nuihzat viaua an hruaina hnuaia awmloh hlaua phè phê leh si, thawhchhuah nei silova eiral ngah em em, Thlarau mi luattuk vanga Pathian pawh titi pui mai. Khuang a rika lâm, thusawi veleha muthlu leh si.

Thihna hripui pawh fiamthu nana lo hmang, nui huah huah chunga hlau leh ber lawi si, thingtlang mi hmusit viaua an thlaithar dawnni a veng pum chawhmeh in ang thup thup. Nihlohna nihpui hrehlo, nih na tak nei chuang silo.

Khauphar thawvena thawveng, Lungphur phura phur, kumkhat hmakhua pawh sial lâwklo kan ni em?, hetih lai hian kan ram chuan puk tur zawngin a vân ruai a, puitu a melh a, ram mipuite pawisa ip a hmu tai mek a nih hi.

Enge kan nih, tunge kan nih? Zofa tlawmngai, ṭhianchhan thih ngam kan ni lawm ni? Lu chhum ban chhum pawh huama ram chhana ding thin kan ni lovem ni? Kan nulate mualpho phallo tu, hmeichhia leh naupangte rilṭam ai chuan mahnin nghei pawi salo Mizo tlangval kan ni lawm ni? Dam leh tlang khatah thih leh ruam khatah tia au hla nei hnam hi i harhchhuak ang ule.

LAN THAT DAN
(Covid19 lockdown article-13)


Kum tamtak thlalak hi ka buaipui ta a, ka tui ve em em a, ka thiam hlei lova, mahse tuina a nive miau a, khawilo chhuahvah naah mite chu fel thlapa an kal laiin ka lo in ak puar pur pur reng a, thianho a zinte hian nalh tak takin thla ka laksak a, an nin phê deuh deuhin min laksak ve thung a. Mi thlala te chu an hlawkpui em em a, keilah ka chawibelh zawk maha, nuam erawh ka ti phian thung a.

Lan ṭhat hi a pawimawh ber chu a ni, a hnuaia thlalak pawh hi i langṭha an tih tlat vangin mi thlalak hman aiin ka hmang a nih hi(hahahaaaa) . A hmun, a background, a foreground leh photography rules dang chu a pawimawhlo ni lovin a hmasaber ah chuan lan ṭhat hi a pawimawhber mai.

Thlalaka lang ṭha tur hian make up artist te fashion designer te stylist te rawih an ni hial thin a, vawi khat lan ṭhat nan hian cheng tamtak sen a ngai thin.Mipa ah chuan a thawh dan a nêp deuh a, hmeichhiaah chuan he "Lan ṭhat" hian thawk na tak ani ringawt mai. Khawi hmun leh eng hunah pawh lan ṭhat hi an thupui a ni ber.

Thlalak ah chauh lo pawh lan ṭhat hi a pawimawh em em a, bazar na, inkhawmna, office, hnathawhna, inleng kawm na, pro pic, khawlai lenna zawng zawngah hian lan that duhna hi number One a ni reng.

Lang tha tur chuan theihtawp an chhuah tlanga, bur chi hrang hrang, darthlalang bial tereuh tete, brush chi hrang hrang nen, powder, gel, liquid, a tle sep sep thlengin, chumai ala nilo lan that nan a lem hrang hrang an tel ala ngai cheu. A ni takah, nula lanthat duh, duhtawka an han in chei hi chuan anmahni a bo vek tak tak a sin.

Inchei leh make up hi ka sawisel reng renglo, mithmul lem leh mawnglem te hnute lem thlengin ka sél love, a duh chuan an hmang tur a ni. A duh chuan sam lem leh sam rawng lem pawh hmang rawh se, ka sawisel lo, mahse hei hi ka rilru ah alo lang zawk. A nihna ni hauhlo hmanga lan that duhna rilru kha rilru tha leh rilru hrisel a ni angem tih zawk hi.

"Mawng lem vuah chu han khawih zeuh ila an her vut zel" an tia tak tak ni maw. A nihna mawng dêp duhtawk lova alem hmanga a mawng  tihpoh duhna a han nei ta mai te. A mithmul tawi er silo aiin nuamlo deuh mahse mithmul lem sei er tán mai han vuaha khap per sak sak  duhna thinlung hi enge ni ang?
Choak Arawn chang tawn pawh khan mawi intiin nalh inti hle mahse a hram veleh "Ák ák âk" a ti tlat a sin. Chinghnia beram vun sin pawh kha Beram rual karah tla ve mahse hnim thatnaah ṭamchhawl chiah a hmabak a sin.

Nula / tlangval i ni a, lan ṭhat i duh tiraw, hei hi ka hrilh ang che, i make up leh i silhfen kha i mawina a nilo. I mawina leh i ṭhatna chu i chhungril ah zawk a ni a awm ni. Lumenna leh khawhar ina i hmel a lan miahloh te hian i lang ṭha thei thin lova, kohhran thalaia i lan ve ngailohte hian i mawnglem vuah nen nuih kawp ini fo. Thalai mu tluk tluk mai inih hian monu/makpa atan hmuh mawi i harsa em em a, khawlaia i tam viau te hian i bialpa chhungten an hmu ṭha theilo che.

Mawng lem leh mithmul lem man chu sawiloh, Make up set pawh nei zolo, a zirna leh a eizawnna a beih ngawrh êm avanga pawr fapte hi  khawtlangin an hmu chhe ngai lova lan chhiat lai an nei ve ngai miahlo. Tlangval thiamna em em pawh neilo, mahse chhungkaw innghahna ngam ani tih hriatte hian lan chhiat lai an nei ngailo.

I ngaihsan zawng (valued system) atangin eng mi nge i nih teh i ni a, i thuam leh silhfen zawng zawng leh i make up atangin i income chhut sak i ni a, an teh tlinglo che a, an chhut tling zo thinlo che a, chuvangin i lang ṭha thei thinlo a lo ni.

Lan ṭhatna hi pawnlamah a in nghat lova chhunglam ah a awm zawk si. Miten i hmel mawi taka chei an en emaw itih laiin i thinlung an en zawk a. I fashion man to pui pui mawi ti awm taka an en laiin a man zat leh i income an calculate a sin! Fai mam purh a khawlaia i len zuai zuai lai khan i hmabak thimzia leh tlai chawhmeh in neih chhiat tur si zia an lo hre lawk a, lan that itumna hi an hmuh kan leh si thin.

HEATHROW A INHNIALNA
(Covid19 lockdown aeticle-12)


Bungruate dan pangngaia kan buk tir zawh hnu ah, airport dang ang bawka hmuhnawm a tam vangin kan han in pose leh chiam phawt a. Heathrow Airport hi Londona awm a ni a, engtiang taka ropui nge tih hi keini hriatthiam phak ni pawn ka hrelo. Second tin mai hian thlawhna lut leh chhuak an in sul zut zut a, khawivah bu lun tak ang mai hi a ni.

“Mumbai India, a kalturte security check-in hun a ni, tunah lokal rawh u” pa uangthuang deuh hian a rawn ti lung lung a, a kalkual velpah chun, “Polythene bag ah  tuiril leh diak (liquid & gel) khung vek tur, zu in neih chuan ken kan phallo a, keimah min pe dawn nia, ka lo in zel ang” nui vur vur chung hian a ti zel a. Keipawn chutiang thil ka neihte chu ka khung ve thuai thuai a, bawr zetin camera ka ak bawk si, ka hand baggage nen ka buṭu bik riau lehnghal.

Kan intlar a, pakhat te te in security check chu kan paltlang dawn ta a. Pheikhawk phelh, kawnghren phelh, tih a pui an ngah riau mai. Kekawr kawng a thawl si a, vawn deuh a ngai ka thil khai dangte nen ka landan kha a chhe ve ngawt ang.

Kan tlang phei zel kala him zel, ka hand baggage chu an screen ta a, an ngawi renga, check zo tawh inti thawveng huaiin ka bag chu ka va la dawn a, police officer pakhat hian a lo vuan bet ta tlat mai. "Helamah lo phei" teh tiin min hui nghal, hetia in check vel laia in lakhran bik hrehawmzia chu a tuartawh in awm chuan in hre ngei ang.

Midang an kal tlang zung zung zel si, a eng pawi tak awm ang maw ti rilru chungin Officer chu ka va nuih tlawn phei a, “Hello, officer, harsatna awm em ni?” officer chu alo nui vur vur a, “Hei hi i bag a ni em?” “Aw ka bag ngei a ni” ka ti vat. A chhungah enge awm tih min zawt zui nghal zat a. “Sir, Camera leh camera accesaories a awm a, document pawimawh leh medicine tlemte a awm” ka ti thuai a. “I bag hi kan screen vek tawh a, chulo chu thildang a awm a ni” a ti ta.

Mahnilo maha hlauhthawnsa tawh nak laiin a engthil phiangsen nge lo awm chu le. “Sir, ka bag ani a, ka lokal dawn pawn a chhunga awm ka check vek a ni” ka ti ve tlat. “I property nilo i keng em” a ti leh a, ka hlauthawng leh ta deuh, mi an tam si an zi huai huai mai kha ani a, ka hriatlohin ka bag ah hian ruihhlo damdawi engemaw an lo dah em ni dawn le, National Geographic channel ah chutiang chi chu ka enfo tawh si. Aw a khur titih deuh, ṭhian ten min rawn en leh dek dek thin bawk si. Officer chuan, “Rules i zawm thaa ka lawm e, mahse i bag ah hian thildang dan bawhchhiatna a awm a, i ta a ni silo a, ka nei mai ang aw” tiin nui vur vur hian Perfume bur a rawn lek chhuak a. Uluk tawka Tesco a Victoria Secret dawr lianpui hnuai ami ka lei ve ngat kha lo niin, sawi theih ka nei ta hauhlo mai. “Officer, kha kha Tesco a ka lei a ni a, ploythene bag ah khan ka lothun lo palh a ni e” ka ti a, nui vur vur chungin tluang deuhin i thlawk dawn nia darkar 6 chuang zet i thlawk dawn si a, darkar ruk chuang min hriatchhuah reng ai chuan kha, la rawh” tiin min pelet leh ta.

A tir lama dik ka intih tehreng nen, ka bag chhunga awm lah hrechiang ka inti em em a, mahse haichhuah a han nih meuh chuan dawl zawrin ka zawr ta hnáp mai. Min la peleh te hlei hlei kha ka van lawm tak.

Hriatdan in anloh vangte, ngaihdan in anloh vangte, duhdan leh pawmdan in anloh vangte, tha tih in anloh vangte mai mai hian kan lo inhnial in kan lo in Mu leh Ar mai mai thin hi a lo ni. Midang theuh hi thurual pui zel mai ila inremna a lo chhuak zel mai dawn a lo ni. Han in chaltauh bap bap thin mah ila, duhdan a in an chuan lungrualna mualah kan tla ho thei zel mai.

You Or Me
(Covid19 lockdown article-11)


Thla khat aia tam mah lockdown ni-a kan inkhung hran chhung zawng khan i tel lova nun hman kha a
va kimlo teh lul. Ngaihtuahna i luah veng venga, rilru ah i cham reng mai.

Theih nise, tuktin zantin inhmu ila, min rawn pan loh leh keiin pan che ila, thuthar leh thu hlui thu hmuikeu sawiin ke vei lam lengbut buta nuih dun avan chak awm em!

Theih nise, kan inkai rial rial anga, suar leh ruam, tlang leh mualte kan hrût tur, achangin  inkuah rialin, in si chêtin kan thu ang a, nui ri hawr hawr leh kuk râwih râwih thawm ruam tin kan hnutchhiah tur.

Theih nise, pisa pindan ah thingpuisen hang in hun, in ang vekin mahni seh seh van zêm ah kan ti tur. Theih nise lâp um leh lâp nghakin, mi duhloh hlau reng rengin kan bungrua kan chhep mawi tur. Mahse ram dan chu a khauh êm a, sakhua meuh pawn a palzut zo lova in kharkhip kan ngai ta si kha a niah.

Enteh, i ngaihawm tih hian a sawifiah zolo naa, a aia tha tawngkam dang a va vang em! Lockdown a zawh fel huna zalen  kan nih leh hun chuan, In kuah ila, in chibai ila, in pawm vawng vawng ila, khang hunkhirh kan tawh lai zawng zawnga kan hun hmandante kan in ngaih tawhzia te kha, a ṭawng hmasa zawk nih inchuh ngai hial khawpa ṭuahin in hrilh ila tiraw.

Mahse, ka hrechhuak leh si..... Nang emaw Kei emaw hian kan hriat miah lohvin he hripui ṭihbaiawm zet hi kan lo kawl reng thei tlat. Kan zalen hnu hian kan thenawmte thil kan mamawh ka sengkhawm nghala, kan hriselna leh kan damreina tur aiin kan rilṭam leh kan insak kan dah pawimawh zawka,  chu chuan he silent virus hi veng keltil thleng a lo darh reng tawh thei tlat.

I ngaihawmna a kiam dawn lova, ka mamawhna che a phai dawn hek lova, ka duhna che a tlahniam dawn heklo. Lirnghing vawi hnihna hi a nalo zawk thin naa Hripui vawi hnihna chu tuar a har zawk an tih kha, kan pahniha hripui kaia famkhua lawi ai chuan Nang emaw Kei emaw kan him chu a tha zawk iti ve ngei ang. Anihloh vek pawn ka pahnih a kan him chu i duh zawk ve ngei ang. Chuvangin, inhlata awmkhawm zir ila, inhlata in ngaih zir ila, inhlata thawh dun zir zawk ang hmiang. Nang emaw Kei emaw hi a kaidarhtu kan ni thei si.