Tuithak Neitu

Pawl thlang ho kan ngaihsan em em leh kan zah em em, an uniform te pawh mawi bik riaua kan hriatte ho kha, Kekawrbul pawl leh kawr var an ha a, keinin a pawl leh a hringduk kan ha a, kan han bei khak thei em em leh nghal a, kan in daidanna chu huan pal pakhat chauh kha a nia, chu pawh tha tak hungloh lehnghal.

School Inspector in min rawn tlawh dawn tum khan a sin, a fai thei angbera kal tur an ti a, pial tawkin sam kan khuih a, kan ngal ah tel kan chulh tle sar bawk a, Sapte lo kaltur chuan zawhna min zawh chuan pawl thlanga kal kan chak thu lo hrilh tur a ni nghe nghe. Inspector chu a lokal ta ngei a, engmah chu min zawt lem hlei lova. Keini pawh chuan pawlthlanga kal kan chak thu pawh kan sawi chuanglo.

Nitin deuh thaw khan chithak leh tuithak kan liak in kan in a ni mai a, keini a siam ve thiamlo chuan kan lehkhapuan kan pawt thla a kan thleng mai thin. Tuithak neitu han lal thin zia kha aw, a duhsak zawngte chu lehkhapuan a thleng pawh ngai lovin a in tir mai a, tuman kan sawisel ngamlo. Saidawium, um puitling khat in a rawn pai a, tengtere tlem a tel a, aieng, mosola, hmarcha, chi, khang zawng kha a bawlhlo a ni a. Mahse khatiang kha JB School a sumdawnna liantham ber chu a ni si. A in duh kan tam tum deuhte khan a chhin khat phek khata thleng a ngai a, hmanhmawh takin Tuithak neitupa chuan ahan thli a, a chang chuan a chhin chanve pawh kan in hmanloh chang a awm, hmui a thak sa hlur a, mahse kan lawm ve em em tho. Engatinge khang hunlai khan a bawlhlo engkim kha kan nei ve tho si a, kan lo siam ve mai loh le.

Chithak season alo thleng leh a, chi tamtawk, aieng, mosola, hmarcha chawhpawlh kha a ni leh mai a, mahse a chung ami ang bawk in, chithak neitu kha an lal leh em em a, thuneihna zawng zawng kha an pumbilh tawp mai a. Lehkhapuana thlengtu nih char char chuan kum khat chhung khan rin aiin kan lo pawtthla hnem hman daih.

Kum a lo vei zel a, kumthar alo nih meuh chuan Pawlthlang ahkan kal ta. Chu pawlthlang chu kan school JB LP School thlang chiah a awm anih vanga Pawlthlang ti mai kanni a, a hming chu ME School a ni. Tunah chuan Govt Middle School a lo ni ta. Kamis var leh kekawrbul pawl puanpheikhawk var nen kan ri ta ap mai, JB ah khan form pheikhawk kha kelawng a awm ani mai a, a in buaithlak hleih ta ngei mai.

Nau hruai an han phallo panga, Ipte chu ak reng lova desk a dah tur an ti bawk, kum tamtak ak reng tawh han dah chu koki a zak tlat. Zun In ah leh Ekin ah chauh inthiar tur an ti thul, thil inthlak nasa lutuk khan min tibuai rei ngawt mai. ME School ah meuh chuan Tuithak neitu leh chithak neitu pawh angkhat in kanleng ta dial dial erawh kha chu a nuam veng veng mai.

Ka Pa ziah. (In memory of my beloved father)

HMARVENG YMA VUL RENG RAWH SE.

Kum 1996 chapchar lai a ni a,Hmarveng YMA pawh kan inthlan that tha tho lai tak a ni nghe nghe a,Pu C.Lalzuithanga President a ni a, kei Vice President ka ni a, kan hote pawh an in pe zo em em in, aia upate thuawih kawngah pawh entawn tlak an ni a,Games lamah pawh chak ber kan nih lai a ni a,YMA lamah pawh tu Branch mah kan awt bik lo.Library tha tak kan nei a,kan hlimpui em em thin a, chutih lai chuan Hnam thlipui a lo tleh phut mai a, Kolasib Sawkar Office zawng zawng te chu Hnam Sipai (MNF) in a luah veka, keini engmah hre lo tan chuan thil mak leh kumkhaw sawi a tling hial a ni.
Hnam Sipaite chuan Kolasib a hnamdang sorkar hnathawkte OC, Pu, Chhetri a hovin an man khawm vek a, Town hall (tuna Taitesena Hall) ah hian an lo dah nghuk mai a, tuk khat chu, lalengthuam (L), Pu C.Zahlira tumpui ten en kan va thleng ve hlawl mai a, Pu lalzuia VCM kan hmu bawk a ani hnenah chuan en kan dil a min lom phalsak ve mai a, OC Chetri chuan, “ Ni hnih chhung engmah ei lovin min khung tawh a, heti anih chuan kan thi mai ang” tiin min lo hrilh a, daikal nan tui hmang chi anni si a, Tv, Biaksanga s/o Laltinchhingi venglai hian vzawi 3 lai tui paw halo chawi sak tawh nghe nghe a.
Keini ho chuan chaw pek kan chak em em a, tichuan,Capt.Aia a lo kal a, tuna P&E E.E.Office hi Consumers Store a ni a, hetah hian MNF in bungrua an man tam tak an dah a, chu chu Capt.Aia chu kan dil a, phalna lehkha min pe a, tichuan Hmarveng YMA chu Emergency Committee kan kova,chhun dar 12:00 ah chaw leh chawhmeh kan khawn khawm chu Town Hall a vai ho tang chu kan va pe a, an lawm em em mai a, O.C. Chhetri chuan a lehkhabu ah chaw petu te hming leh YMA Branch hming a ziak lut a, O.C. chuan,”Sipai(Army)an lo thleng tep tawh a, riltama thi tur chaw min pek avangin Sipaiho lo thlen hunah pawh theih ang angin ka hum ve ang che u,”tiin min hrilh a ni.
Tlai lama an ei tur YMA in kan buatsaih leh lai chuan Indian Army chu an lo hleng ta rup mai, ka thianpa Lalsangliana ho khan Sericulture Farm bulah kan lo Ambush a, Saidan Mini Sport Complex thleng hian an rawn um chho a, chutih lai chuan Hmarveng tuikhur atangte, Pu F.Aizika In mual atangte in mi tam tak in an in kap lai chu an lo thlir a, vanneih thlak takin khua a lo thleng lovin kawngpui lamah an kir leh ta a ni.
Pu Laibuanga In luahtu Dawia tlanchhia an kap hlum a, tichuan, Thana lam panin an lo phei zel a, Town Hall a tang an rawn chhuah a,kan phek buai ta a. Mi bungrua an suasam a, mi tam tak an man a, hmeichhe ho chungah lah zah an ngai hek lo.Veng dangte chuan an tuar nasa em em a, Hmarveng erawh chu O.C.Chhetri chuan min lo hum a, thlamuang takin kan awm ta reng a.
Tang tam tak chhuk leh chho an rawn hruai a, Kolaasib Thana an rawn pan pui zel a,O.C. Chhetri te YMA in chaw kan lo pek avang khan O.C chuan ‘Hmarveng YMA in chaw an pe thei ang’ a lo ti zel a,min rawn kova,”Curfew pass min pek chuan, chaw chu kan pe thei ang” ka ti a, tichuan tang awm apiang YMA chuan chaw kan pe ta ziah a , pawisa pawh tlem a zawng kan hlawh ve ziah thin a, chung kan pawisa hlawh chuan buhfai kan lei a, Maj.Thansanga kan kawl tir a, chung kan hman bang chuan Kolasib a harsa zual te YMA chuan kan tanpui zelthin a ni.
Indian Army an lo thlen tuk chuan, Pastor Thanfianga’n, PU C.Lalzuithanga President chu Kolasib Thana a tangte tanpui turin a rawn sawm a, an kal dun ta a. Sipai ho thin rim chuan an pahnih chuan an lo beng ta vak mai a, Pu C.Lalzuithanga hi BDO Kolasib a Casheir thawk lai a ni a, YMA Prersident nihna hi lo keng kawh zel mai rawh min ti a, an tangkhan hun lai khan, rem lohna tam tak a awm reng a ni. YMA Day kan thleng a, Pu Thlahzova kan insiam danglam tir a, YMA sumtuak nan kan ti a, a hmuhnawm ngang ani ang, a en apiang an nui let tawp tawp hlawm mai a,entu an tam lutuk a, a awmna In a tlu a, pawisa kan hlawk tur ang pawhin kan hlawk hman ta lo a ni.
Pu Thlahzova chu Rengtekawn a a bal cho tur Sipaiin an man a,Bihar Central Jail ah a tang a, Hmarveng YMA chuan Sorkar ah,”Pu Thlahzova Kolasib hi MNF a ni lo va, YMA Joker a ni a, a rang thei ang berin rawn chhuah rawh u,: tiin kan zuk ziak a, Pu H.Thanseia Headmaster chu English in kan leh tir a, ani chuan,”I tan a pawi mai thei asin,” min ti a, chu lehkha kan thawn atanga thlakhat ah Pu Thlahzova chu an rawn chhuah ve ta mai a ni.
Khang hun lai YMA hruaitu fel tak tak ten mual min liam san a, kei pawh Golden Jubilee hi thleng ve phak pawhin ka inring lo va, mahse, he Article te ziak thei a Lalpan min hruaina leh kan YMA hotu fel tak tak ten duhsakna sang tak min hlan hi ropui ka ti a, Golden Jubilee Lungmawi tak mai Kolasib Field sir a ding luah mai te hi ropui ka tiin, tuna YMA hruaitute fel zia leh remruatna tha an nei hi chawimawi tlak an ni e, an chungah leh Pathian chuangah lawmthu ka sawi e.
Hmarveng YMA vul reng rawh se
C.Rokhuma,Kolasib-I
(He Article hi Pu, C,Rokhuma’n N.Kolasib YMA Golden jubilee souvenir a a ziah lakchhuah a ni. C. Rokhuma hi SA ah Envoy niin Burma ram thlenga rawngbawlin akal a, Mizorama VC Secretary thaber lawmman Aizawl Bawrhsap hnen atanga kum 10 chhung a zawna dawngtu ani.)

Puja Bati leh JB school

Step ah chuan Gate mawi tak an tar aa, a bul ah chuan Changel kung hi a hnah nen an phun chho luk mai a, a chheh vel ah chuan mau phel hi an dawn kual pup bawk. Gate chungah chuan thil inziak a awm a, mahse ka chhiar thiamlo, a chhung ah chuan mawi taka chei milem lainpui sakei chunga chuang, lei sen tha tka chhuah a ban tamdeuh nei hi a awm a, a kut lehlamin chem a hum tut a, midum pakhat fei a chhun hlum hnu hi a rapbet bawk. Sam sei deuh anei a, lal lukhum ni awmtak a khum bawk a, chu chu chibai an buk thin a, Vai Pathian kan ti kher kher thin.

Chu Shiv Mandir thlang chiah chu JB School chu ani a, kekawrbul pawl leh kawr hringduk kha kan form a nia, kawmchhak lawkah Puja a awm avangin hal rimtui rim class room atang chuan kan hre phak a, zan ni tawh se kan ti thei hle.

Zan chu a lo ni ta ngei a, thimhlim atangin Vaiho chuan an kawtah Mombati te takte an chhi tlar tiar a, an Mandir (Vai pathian Biak In) kawtah chuan an chhi uar zual a, a eng tuarh mai thin. Chung Bati tereuh te te chu keini ho chuankan han hui phei pawp a, kan kawr ipte ah kan hnawh hmiah mai thin a, Vai KTP ni ve ngei turte khan min umzui a, mahse kan school JB ah chuan kan tlana kan him thin.

A tuk ah Puja Bati engzat nge kan hui theih tihkan han sawi ho a, kan zinga a huai deuhte chuan 50 lai te an lo ak haw hman thin a, kei ve chu ka dawi vang ni miahlo in 12 bak ka ak haw hmanlo. Chung Puja bati te chu eng atan mah kan hmang leh chuang lova, engtin nge kan tih zui tak pawh ka hre chuanglo.

Kolasib a School hmasaber JB School kha alo va nuam em! kan chhuahsan dawn lamah khan Primary School N0-1 an ti ta mai pawh a. Sports neih te khankan champ reng mai a, Cotton puan a jersey thui chawp a pawl leh a eng kan ha vet vet mai mawle.
Kan Headmasater in kal tlai ahrem dan erawh kha chu ana duh, chalk a tung zawngin dawhkanah a dah a tauh keh dip darh angai a, a dip zolo anih chuan tukhum ah min lo nempui a, a tuk ah chuan chal a belkang ngei ngei thin.
Buaithlak deuh erawh chu nau hruai an phal kha a ni, thianten nau 3 te an rawn hruai a thutna a tawt duh khawp mai.