Monday, July 11, 2011

Auhmuna Vang vek!

AUHMUNA VANG VEK



        Chhun lama ruah tla tla siin zan lam boruak chu a rit riau a, a lum a, a uap bawk a, hawina lam erawh a thiang nuam viau thung, Thla chu  a chanve a ni tep tawh a, a eng dul nuam hle mai, khawlum dan chu mut tichhuak tawk chiah a ni.

        Eng Hall chiah nge a hming ka hre talo, mipui an thahnem hle a, naupang leh thalai te nu leh pa te an telkim hle. Chung mipui pungkhawmte chuan nghakhlel  takin an hmalam an thlir thup a, enge an beisei ber pawh thenkhat chuan an hrelo.

        Ka Kamis thar hak chu ka duh aiin a te tep nachungin tunlai ah body fit an uar a ka ngaidam thei mai, Cotton Jeans fan thei chi (stretch) dum ka ha a, ka tih thin danin  kekawr mawng dinglam ah  puar alh in wallet ka ak leh a, a chhungah chuan  thil tamtak a awm a, ATM leh ka visiting card chu hmun khatah a awmkhawm a, a pocket pakhatah chuan business card sawm chuang zet a in zep a, pocket khat leh ah chuan Rs.2/- coin leh Sri lanka coins a awm bawk a, a pocket lianber ah chuan Zaia Royte Scooty rawng ang Note sen,  India note siama lianber chi hi a in thauh thap bawk. M & S company  Soft smart shoe dum ka bun a, International trade fair a ka mawza lei ka bun bawk.

        Mipui nghakhlel  tawh chu Stage hma ah chuan an phu lui lui a, an rak teng tung  tawh bawk a, kei erawh chu tan hun chiah a lang thei mai turin stage hnung lama green room ah chuan inpeih at in ka awm a. Ka bul ah chuan mi pakhat hi a rawn vei sek a, a hmel ka hmuh theihloh vangin tunge anih ka hre mai theilo, min hrilh dan chuan chupa chu min puitu tura ruat a ni a, mahse, eng mah a sawi lo.

        A hun athleng ta! mipui tamtak chu an reh duk mai, zei takin stage a microphone an dahna lectrun tereuhte chu ka pan phei a, chutih lai tak chuan  boruak awmdan chu a danglam thut, Chhun leh zan inthenna lai tak, thim silo eng bawk silo, han en reng reng pawha mumang colour diktak mai hian  boruak chu a awm a, “Ladies and Gentlemen” ka han ti a, mipui an au dur  dur mai.
        Enge show tur ni a, tunge koh tur, enge sawi tur tih pawh ka hre miah lova, mahse he hun pui em em ah hian Host ka ni tlat a, ka thu leh hla an ngaichang thup mai. Mahse he hun hi eng hun nge? eng show nge? khawi hmun nge? ka hre tlat lo. Chutia bangbo ang reng taka ka din lai chuan min puitu tura an ruat kha a rawn chhuak a, kawrchung dum a ha a,  a kamis chu mar takin a beng lut a, woodland pheikhawk dark brown a  bun a, a sam chu a tial in a colour a, ka lam panin a rawn kal mut mut a, Facebook a Oznial Ngente profile Picture kha emaw ka ti tlat a, ka bul a lo thlen chuan a nui suk a, hriat theih mangloh hian rang deuh in engemawni a sawi a, anui zui vaka, mipui erawh chuan mak tiin an en thup a, ka lam lo hawileh in keh hui hian, “Chibai” a rawn ti a.
        Chutia programme pawimawh ka host laia tlangnel taka min rawn pana “chibai” min rawn titu chu ka han enchiang a, Stephen Auhmun a lo ni a, a lo nui hui leh nghal! Engemaw ni hi a ri thum dut a, ka phenah a biru zuk a, min pawt dawrh bawk a ka harh ta zawk a. Zan 2 ka muhil tawhlo a  Auhmuna vanga ka han harh leh chu ka thin ava rim tak em!

       

3 comments:

  1. mumamangah leh zel pawh Auhmuna chu i ngam lo a ni maw. I mang pawh a ni tak tak emawni le.

    ReplyDelete
  2. Auhmuna thlahrang a niang. Mumangah pawisa i nei ve a, ka lawmpui khop mai che.

    ReplyDelete
  3. Hepa hi mumanga hmuh chuan mang chhia a lo ni reng tih tun hnu ah ka hre chhuak a, ka zak khawp mai.

    ReplyDelete