Saturday, September 24, 2011

Tunlai titi a ka sawi duh zawng

  Tunlai titi a ka sawi duh zawng(mimal ngaihdan )

Tunlai hian kan veng chhungah titi a tam hle a, "phal mai se, phallo maise" tih vel a ri reng mai a, hemi chungchang ah hian tlem sawiduh zawng ka neih hi he blog ah hian kan hnutchhiah teh ang.

Mizoram sorkar in district tinah Motor Terminal  siam nise tha a ti a, he terminal ah hian Bus 25 leh Sumo 50 tal leng ngei ni se,( highway terminal tia sawi pawh ani bawk) tih ngaihdan a neih  zulzui leh  Transport directorate lama hriattir an nih angin hma lak a ni a. Plan leh Project siam turin PWD te ruat an ni a, he project hmang hian Central ah sum dil ani anga, central duhdan anga project leh plan siam anih chuan Terminal chu sak theih ani ang. 
Kolasib district Hospital cum Nursing training school hmunhma tur leh project siamtura lokal PWD Senior Architect chu Kolasib Joint VC OB leh Thingdawl VC ten lo dawngsawngin Hospital 200 beded tur hmunhma te enpui a nih hnu ah, Kolasib lama lokal a tum thu leh a tihtur te kalkhawmte a hriattir a. DTO Office a hriat mailoh avangin tlawmngaih chhuahin Joint VC OB te hian Senior Architect chu  an tawiawm chhunzawm zel a.

Kolasib ah Terminal sakna tur khawilai nge? engtia zau nge? free land ani em? tehfel theih ani em? tihte chu a lokal chhan a nih thu a sawilan hma chuan Transport lam officerte chuan eng ti tura lokal nge a nih pawh  chiang takin an hrelo. Transport officerte chuan hmunhma an neih chu tuna an luahlai zawng hi a nih thu an lo hriattir a, Senior architect pawh a hawihai angreng hle a, fiamthu a (fiamthu taktak a) Hmarveng field ah hian dah theih a ni em tia zawhna chuan a ti nui suk a, a zim lutuk a, a lenglo hle a ni tiin a chhang.
He Terminal (highway terminal) hian Administrative building, booking building, toilets, rest room,  motor (customer) parking, staff quarters leh dawr a awm a ngaih thu leh, central duhdan ang chiaha free land a dah tur a nih thu  leh plan ang taka sak tur a nih thu a sawi chhunzawm nghe nghe a ni.

Department lam hotute chuan an Office building chei leh thawmthat nana sum an tlakchham thu te, office bungruate cheithat a ngaih thu leh tuna an building neih lai mekte chu renovate a Terminal hming put tir maite chu remchang siamdan a awm leh awmloh te zawhna an siam a, mahse Senior Architect chuan chutiang chu thil harsa a nih a rin thu te leh Central a sum dilna tur a nih vanga fimkhur leh dik taka thil tih a ngaih thute a sawi nghe nghe bawk.

Chutia hmunhma  Transport deptt in an neih tak siloh ah chuan Joint VC OB te chuan committee an neih veleh a lo pharh tur leh hmunhma awl hemi atana pe thei turte lo dap an in huam thu an sawi a, chu chu kalkhawmte chuan tha an ti hle a, Joint VC te remruatna chu ngaihchan nise tia thu inthlung in inhmuhkhawmna chu tin darh a ni ta a ni.

Joint VC te chuan he thil pawimawh tak hi ngawihbo pui mai lovin a puang chhuak thuai a, Thingdawl ram leh Rengtekawn ramah an duh ang tawk a zau hmunhma an pek theih thu hriat a ni ta thuai a ni. Chutia hmunhma pethei an awm mek lai chuan Kolasib Hmarvenga NGO hrang hrang leh Games & Sports leh VC te chuan lehkha thuhmun an dawng a, chu chu field kan neih chhun ah ngei hian Termninal dah phalsak tura ngenna a ni.

Hmarveng field reh chhiat a nih tirh khan Hmarveng original int i te rilru chu hliam a lo ni tawh a, chuvangin Social education hnuai atanga Hmarveng Hall sakna tur VC ten an dawn pawh chu hmun laili lo zawk BRTF chhuahsan ram Hmarveng Dinthar ah hmunhma lei chawpa sak tum a lo nih phah tawh a. Hmarveng  hmun tha lai hi a tum 5 na atan Transport deptt hian hman an dil leh ta a ni.
NGO hrang hrang leh GSA leh VC ten lehkha thuhmun an hmuh tak avang chuan mahni zawn theuh ah ngaihtuah a ni ta a, thenkhat chuan an phal a, thenkhat in an phal talo a ni. Thil pakhat erawh chu hriatchian tul tak a awm; ram leilung hi NGO emaw Association emaw ta nilo tih hi.

Mi thenkhat hamthat duhna leh sum it vanga TAWTAWRAWT a hman theih te an lo awm ta nak a, Vantlang inkhawm pawh koh nise a duh leh  duhlo kha in hmachhawn tur an ni mai a, hmarveng mipuite chu hmun 3 ah thenin an awm ta a, a duh, a duhlo leh ngaihdan neilo in.

He field neih nan hian mimal ser kung tamtak kih sak an ni a, an in leh lo ngei pawh sawn sak a ni tawh a, mahse field tur a nih vanga mittui tla chunga kiangta te thlarau chuan eng ngaihdan tak rawn nei ve ang maw. Tuana kan field neih lai mek hi puitling tan chuan field puitling a ni hauh lova, naupang tan erawh chuan a zau nuam khawp mai, YMA Day leh Thalai pawl te tan chuan ni bika punkhawmna hmun remchang ber ala ni reng a field puitling tha tak  a nihna hi tunthleng hian a la vawng him ni pawhin a lang.

Mipuite kan fimkhurna tur pawimawh tak chu " an ti" tih zawng zawng hi awih vek tur a nilo tih hi a ni. pawisa awmsa leh contractor turte pawh thlan fel tawh ni anga sawina te pawh a awm a, helaia Terminal a awm dawnloh chuan Office awmsa zawng zawng pawh hi sawn mai tura  sawina te pawh a awm bawk, mahse tunge hre chiang, eng scheme atanga sak tur nge, eng fund nge? tihte hi mahni in zawh ve nise, tuna office awmsate hi lo sawn ta tak tak se Hmarveng mipuiten kan pek chhan anga an luah loh avangin avaiin kan nei let leh mai tur a ni. Zarkawt mipui entawn tur kan nei tawh.

Vahluk chhu sem an sawi ang maia mahni dawng vek a veng hralh duhna rilru hi Hmarveng hi "ka veng, ka ta" ti tu rilru atang chuan a chhuak ngai lo ang, Hmarveng mi ni thar deuhte rilru atang chuan a chhuak mahna tihte chu  tun tuma ka sawi ve duh mai mai ani a, remchangah kan chhunzawm leh dawn nia.(Kei mi mai mai  ngaihdan ani a, midangte tana na tur emaw huat tur emaw ka lo thailang palh anih chuan anmi hriatthiamna ka ngen chungin mi maimai thilsawi anih vangin huat chi ani love)



1 comment:

  1. Aizawl mi ka ni nachung in Kolasib hostel awm avang leh ka Pa hna a vang in ka naupan lai hun ka hman ral na ani.Tunthleng hian Chite lui ai in Mangkhawng lui ka mitthla tam zawk.Khang hunlai thil tihpui engemaw a awm a kan kalkhawm na ber Hmar veng field 2001 a ka zuk tlawh tum a field a soitham pawh a lo awm ta lo kha a hrilh hai thlak hle ani.U Sila(fam)te ka hre chhuak rum rum lehnghal.Rawn lenluh man ah kan tiri ve hram ani e.

    ReplyDelete