I OVER TAWH

I OVER TAWH

by Isaac Lalthanmama on Wednesday, January 5, 2011 at 8:41pm

Ram leh hnam, khuarel leh mihring nunphung ah hian hun hian awmzia a va nei thui em! Bible Thianghlim ah pawh engkim hian hun an neih thu a  ziak a, phun hun te phawi hun te, tah hun leh nuih hun te a awm vek mai, a hun chhung chu a rei a ni emaw a reilo a ni emaw, chintawk nei vek kan lo ni.

Nausen nih hun a awm a, naupang nih hun nen, tleirawl/rawlthar hun a awm a, nula/tlangval(Thalai ) nih hun a awm bawk, nu leh pa nih hun a awm a,  pitar putar nih hun a awm. Hringfate hi eng hun berah emaw kan awm vek a, chu kan hun mil zel chuan kan nun dan pawh a danglam a, kan duh zawng leh kan tih thin pawh a danglam a ni.

"Abiangte hi ava no em! A chum tha a nia" tia min fak hun lai chuan engmah hrelovin kan lo nui duai duai a ni thei, mahse thiantha berten,"saw nu sawn a melhno che a nia, min rawn biak rawh a ti" an han tih hun kha chuan nuih dan a dang a, rilru a lawm viau si tilang ngam si lovin kan han nui lai hui hui a, khang hun lai kha tleirawl lai kha alo ni reng a. "Ahun leh Ni tur te rawn sawifel nghal vek ang che u" ti a Paber in makpa ho a han tirh zan meuh erawh chuan thinlung hi a su deuh dup a, ngaihtuah a tam duh tan khawp mai, pa nih hun tur te, fa neih hun turte tar hun turte zankhat thil thu ah kan ngaihtuah chhuak nghal vek mai thin zu nia.

Vanglai tak Nupui/pasal han neih mai hi a fin thlak ve reng reng a,  khawtlang ti hah lutuk lovin mahni in kan la hmu thei tih a chianga, a ropui dangdai ve reng reng a sin. Chuan, kan thatlai hun te  Lalpa tan tiin, theihtawp in tan kan han la a, a kul a tai mai ni lovin, kul tur chuang pawh awm tawhlo khawpa nasa in tan kan la a, Kohhran pumpui hmel ti mawi khawp a kan chet hnu in, kan hun erawh chuan thui tak min lokalpui tawh chu niin. Thalai committee ah te thu har deuh ngaihtuah a ngaih changte, tin, kalkhawm leh zinchhuah dawn ten ding tura beisei kan ni tafo mai a, ngaihdan fing leh tha neiber angin, naupang zawkte rilru buai hnu ah ding tura phut kan ni ta fo bawk a, dik tak chuan, kan hruaitute kha Sunde Sikula kan enkawl hnu te, an pate lah kan thiante an lo ni nawk tawh a, thenkhat nute phei chu zaipawla kan zaipui thinte an lo ni tawh a, nuih a rual tawh lova, ngaih pawimawh a in ang tawhlo.

An sawi duhzawng chu kan tan a ho lutuk a, kan sawiduh zawng lah an tan engmahlo mai a ni thung, titi ho theilo ta na na na chu thu ho reng chung si hian kan inhlat ta du a, Ngahlrual zinga a pikhawi awm ve thin ang hian ngho chhuak vurin tleirawl zingah kan lo tei kual ve mai mai a lo ni.

Hmana kan tih thin dan kan sawi kan sawi a, tunlai ani tawh tih kan hre lem lova, kan ngaihdan lah chuan thangthar zawkte beng a verh chai silo. An tan chuan hunserh hmangtu, chhuahkhawm huna engemaw sawitu, zin chhuah ho dawna Bus chhunga tawngtai tu, a khat tawka thingpui leh senso dang tum leh tawk tu kan ni ta ber mai.

Heng zawng zawng hi ka thiamloh pawh a ni lova, naupang zawkte thiamloh pawh ani chuanglo, hun in min herpui dan ani a, kan thlen chin atanga hma sawn zel kan nih avangin Thalai zingah chuan Tar  chan kan lo chan dawn tak avangin " I OVER TAWH" min lo tih rilrukna a lo rei viau tawh a lo ni reng thin.