Quo Vadis SA Music

VISON OF MUSIC, PRAISE & WORSHIP FOR
THE SALVATION ARMY INDIA EASTERN TERRITORY

By

IC.LALTHANMAMA, Kolasib

(Salvation Army Vision Conclave, 29.30.May.2009 @ Berawtlang Tourist Resort)

    Chhandamna Sipai Pawl, William Booth-a din, Pathian Kohhran hi a ropui a, a tak a, a nung bawk a ni. Chutiang dinhmuna dintir tute zinga pawimawh tak chu Rimawi Rawngbawlna hi a ni.

    A dintirh a tang rengin Sipai Pawlah hian Rimawi rawngbawlna hian hmun pawimawh tak a luah nghal a, vawiin thlengin chu hmun a luah chu tihdanglam a hnekin tih changtlun zel a lo nita a, a chhan bulpuiber chu Rimawi tel lovin Mihringte hi an awm thei lova, Hnamtin min hnaihbertu chu Rimawi a ni a, Pathian hnena mite hruaina atana hmanraw hlawhtlingber ala nih reng vang a ni.

    Engti hawi zawng pawhin rawngbawlna hi kalpui dawn  ila, rimawi kan hlamchhiah si chuan thui tak a kal theih lohva, khawngkhawbaia kal ang maiin a famkim thin lo. Hetiang taka mihringte-a  pawimawhna nei Rimawi hi Diabola pawh hian a hrechiang hle a, chuvangin hmanrua ah nasa takin a hmang ve a, Pop Group lar tak tak kan hriatte pawh Setanic pawl   an ni fo mai.
    Chuvangin a tir atanga kan hman rimawi rawngbawlna hi India Eastern Territory a Sipai Pawlte pawh hian kan hlamchhiah a dik lova, kan thei hek lovang. Hlamchhiah ahnekin hma a sawn dan tur leh a \hat zawk dan tur hi kan zir chhuah tur pawimawh tak a ni.
Kan dinhmun:
    Tuna kan dinhmun atanga han chhutin Rimawi hian  Corps tin ah hian hmun a chang pawimawh hle nachungin, ngaihthah a hlawh hle hlawm a, kan Inkhawm hi zai tellovin kan ti theilo, Mizote Testimony tamber chu Bible thu ni lovin Hla thu a ni. Inkhawm tan hma in kan zai a, inkhawm tan hnu ah kan zai leh a, ban dawn in kan zai leh a, thusawitute ai mahin rimawiin hun a chang tam zawk thin. Chutiang taka hmun pawimawh chang a ni nachungin Corps Council emaw, Pastoral Care  ah emaw kan rimawi hian sawi leh ngaihtuah a hlawh lo hle thung. Kan khuangte pawh a ri a that leh that loh sawi a ni khat hle, kan Instrument dangte pawh hian sawi  an  hlawh khat em em bawk. Kan Zaipawl leh Bandte pawh hi Rorelna hmun ah hian kan sawichhuak khat em em a, chu chuan a tarlan chian em em chu kan ngaihthah tih hi a ni tawp mai. A telo lova kan awm theihloh, a tel lova Pathian biak Inkhawm pawh kan tih theihloh rimawi kha kan hlamchhiah lui tlat niin a lang.

    Songsters: Corps tin ah Zaipawl kan nei deuh veka, Division, Bial leh Territory huap pawhin kan nei, mahse, kan neih dan erawh hi chu a phuahchawp deuh a, kan hman dan pawh chutiang tho chu a ni. Khawmpui leh Hotute lokal chang atan kan Zaipawlte chu kan duh em em a, tihpui deuh engemaw a awmloh phei chuan an zai ngai meuhlo fo. A hming kan duh tui a, Ramdangten an tih ang in Sonsgters kan han tive a, a in kaihhruai dan leh member thlanchhuah thu ah erawh chuan kan duhtui leh vak silo.
  
    Thiam takin an zai a, a tha e, mahse, kan zaipawlte avanga piangthar ta erawh chu sawitur an tamlo hle thung. A chhan ni a lang chu rawngbawl nan an zai lova, Programme tih hlawhtlin nana an zai thin vang a ni. Corps hian Zaipawl a nei mang lova, SAY lamte buaipui leh huaihawtin an ding tlangpui thin. Uniform hautak zetin an thui a, an lan dan leh an hming mawiin nalh hle mahse, Thlarau lamah erawh chuan malsawmna hmuh nan miten an hmang vaklo niin alang, a chhan chu a din dan a felloh vang a ni thei, tin, kan hman dan in a zir mawlh loh vang a ni thei bawk. Kum khat daih zaipawl neih hi a harsa hle mai. Khawmpui a hnaih poh leh hla zir an ngawrh a, programme hnaivai a awmloh chuan hla zir an in thlah dul thung thin. Engatinge, kumtluan daih, tang mar pat reng, zaia rawngbawltu kan neih loh? Engatinge Corps hian zaipawl a siamloh? Kum 1 chauh Term nei  thalai hruaitute hian Zaipawl nghet hi an siam theih kan la ring cheu em ni le?

    Band: Sipai Pawl ti Sipai em em tu chu Band hi a ni. Charles Fry te chhungkua chuan Brass Band hmangin William Bootha te rawngbawlna chu an pui a, Thlarau tamtak Isua hnenah an hruai ta a, chu mi hnu lawk chuan Consette Corps ah Corps Band hmasa ber din alo nih khan miten an hlut em em a, Pathian hnena mite hruaina hmanraw pawimawh tak a lo ni ta a, tun thlengin chu rawngbawlna chu a la nung reng a, Thlaraute Isua hnena hruaina hmanruaah Band te chu hman ala ni reng a ni.

Sipai Pawl in Rimawi Rawngbawlna hi engtin nge a ngaih?

   
    Rimawi Rawngbawlna hi William Bootha’n Sipai Pawl a hmuhchhuah atang khan hman tan nghal a ni a, Charles fry te chhungkua chuan Tawtawrawt 4,cornet2, euphonium 1 leh Tambourine pakhat in General hi an lo tanpui tawh a, Thlaraubo manna hmanrua ah nasa takin an lo hmang tawh a ni. Chumi hnu ah, Consette Corps ah Band hmasa ber chu 1878 ah khan din a lo ni ta a ni.
    William Booth chuan Rimawiin mihringah thil a tih theih zia hi a hrechiang hle a, chuvangin a kaihhruai Sipai Pawlah pawh hian mawhphurhna lian tak neiin a siam a ni. O & R hran neiin Local Officer hran neiin, fel taka rem an ni a, Rimawi lama Local Officerte phei chu Khawvel pumpui ah an nihna an chhawm thei hial a ni.
   
    Corps Council hnuaiah pawh awm lovin, DC leh CO kaihhruaina hnuaiah an awma, chak taka rawng an bawl theih nan zau takin kawng  hawn sak an ni. A rawngbawlna ah hian rimawi hi a dah chungnung hle a, a ngai pawimawh bawk. Thlarau rawngbawlna hlawhtlingber a ni tih hi a hre chiang hle. Rimawi rawngbawlna a tel (Bandsmen & Songsters) te hi a duat bik a, a enkawl tha bik bawk.Chumai ni lovin, Tunlai khawvel than rualin a music hi a ti thang ve zel a, a bik taka buatsaih Magazine (The Musician) pawh a siam hial a ni.
Thla 3 dan apaingin “Sing to the Lord“ tih lehkhabu a ti chuak ziah a, chutah chuan hla thar an ti chhuak thin.

    Pathian Biak Inkhawm, khawlai Inkhawm, a bika beihna chi hrang hrang ah Rimawi chu hmatheh berah tun thlengin hman ala ni zel a, Sipai Pawl chu Khawvel Kohhran leh Pawl-a Music nei thaber  a lo ni ta hial a ni. Sipai Pawl a awmna ah chuan miten rimawi a awm tih an hriaa, rimawi awmna ah chuan hahchawlhna a awm thin.  

Rimawi hi Sipai Pawlin engtin nge a hman?

    Ri thei tawh phawt chu Lalpa fak nana hman hi Sipai Pawl thil ltum chu a ni tawp mai. A hman pawh a hmang nasa bawk. A ngaisanga, a ngai hlu a, a pawimawhna a hria a, a tangkaina a hre bawka, a hlutna leh atangkaina ang ngeia hman chhuah hi Sipai Pawl chuan a tum a ni.  Sipai Pawl rawngbawlna hmun reng rengah chuan rimawi hi No.1 a ni a, India rama an lo luh tirh lai pawh khan Cornet leh Tombourine nen an lo let a nih kha.

Ringlo leh mi hla te hruai khawm nan a hmanga, ringtute leh Sipai te sawh ngheh nan a hmang bawk. Pathian Thlarau chu rimawi kaltlangin miten nasa takin an chang thei tih a hria a, chuvangin  nasa zawk leh tangkai zawka hman hi a tum a ni reng a ni.

        Rimawi hlutna hi kan ramah pawh kan hre chho zel a, kan khawmpui leh congress ah te, kan programme liantham leh tenau deuhah te pawh rimawi hian hmun a chang tam ta hle mai, hei hian  Sipaite ah nasa takin malsawmna a thlen a ni tih kan hriatreng a pawimawh bawk.*

        A hlutna leh a tangkaina chhawr thiam tak tak tur erawh chuan ngaihtuahna sen tam a mamawh tih kan hriat ka ring a, chumi tur chuan he laiah kan kalkhawm a ni.
       
    Sipai Pawl thil tum bulpuiber chu; Thlaraubo chhandam a ni a, chu hna thawk tur chuan hmanaraw pawimawh tak tak a awma, chung zinga pawimawhber fal nalh chu rimawi hi a ni. Mi tinrengte zai khata luan tir thei tu, ngaihtuahna leh hmul thi ti ding chuai chuai thei, van ram thlenga suangtuahna leh rilru kalding tir theitu chu Rimawi hi a nih tlat vangin. Engtin nge ni zel ang le?

        Rimawi pawimawhna kan hria a, kan hman dan kan hria a, kan pawm dan leh kan ngaihdan kan hria a, kan dinhmun kan hre tawh bawk a, engtin nge ni zel ta ang le?

        1.    Rawngbawlnana hman:  Rawngbawlnan kan hmang lo em ni? hmang tehreng mai, mahse tuna kan hman dan aia nasa hian rawngbawl nan hmang ila chuan kan rimawite hian  an tih tur diktak leh an thawhtur diktak an thawk thei ang.

        Zaipawl leh Band: Corps tin in mumal takin nei ila, commission ni thei turin \an la ila, a duh duh leh a hman apiang telmai lovin, mi rintlak leh mi puitling Corps in ruat se, an sum hman tur, an Instrument maintainance, an zinvelna engkim mai Corps in ngiahtuah nise, Sipai Pawl O & R in inkhaihhruaina a siam angin in kaihhruai nise.

        Kumkhata an rawngbawl dan tur, an hun neihna tur, an in zirna tur leh Corps a an awm ve ni turte mumal takin programme siamsak vek nise. Khawlai Inkhawm an neih Ni tur, Corps dang an tlawh ni tur, Kohhran danga rawngbawlna an neih dan tur, Spiritual Day an hman hun tur, leh rawngbawlna neise tia Corps in a duhna reng reng chu  kumtir ah ngun taka ngaihtuah sak vek nise.

        Anmahni chu midangte chhandam tura an in buatsaih theih nan nasa taka fuih leh zirtir nise, an thiamna te tih pun zel anih theih nan an mahni kaihruai thei tur ngaihtuah sak zel nise.

        An hmanraw ngaihtuah sak hi Corps tihtur pawimawh tak anbi bawk. Band tlakchhiatna chhan ber chu hmanrua( Instrument) an neih that tawkloh vang a ni thin. Zaipawl te pawhin CD player, Keyboard, Audio/Vedio  Album siamna senso etc. mamawh tamtak an nei thin, chung an mamawhte ngaihtuahsak chu Corps tihtur pawimawh tak a ni a, an mahni tih phurna leh chona hmanraw tha tak a ni bawk.        YP Inkhawm:    A bul tan that chu a zatve zo an nih takzet chuan YP inkhawm atang hian kan tan a ngai tihna ani. Tunlai corps hrang hragte hian YP lam rawngbawlna hi an hlamchhiah deuh niin alang tlat. YP Corps a sipai hla sa thap thap thawmte hi hriattur a vang hle ta mai. Chuchuan a entir chu kan dal tual tual tihna ani. Vawiin ni a Thalai Sdipai hla leh sipai tihdan phung hrelo tamtak te hi chu YP Corps a an awm laia zirtirna engmah an dawnloh vang a ni tlat.

        Chuvangin YP Inkhawmna ah hian kan Sipai ze dik tak an chhawm nun reng theihna turin  tun atang hian tan lak a pawimawh a, ruahmanna fel tak neihpui a ngai ta. YP atanga Band leh Zaipawla telte ngat hi chuan puitling an nih hnu pawh ian an thlahthlam lo viau zel ania, kan bul\hut ah hian Music rawngbawlna dik hi i dinthar leh ang u.

        Hnam zia rang milin: Hnam tin hian ze hrang kan nei veka, hnam zawng zawngte hi Rimawi hian min hnaih hle bawk. Mihring a pian tirh atanga a thih thlenga zui rengtu chu rimawi ani. Chuvangin kan ze mil rimawi rawngbawlna kan ngaihven a tul a, kan hman a pawimawh bawk. Isua Krista chhandamna kan chan hnu hian, thlarau thianghlim pawlna thar kan changa, kan hlima chu zai leh lama lantir kan duh a, harsatna kan tawk nghal pang. Engtia lam tur nge? tih kan hre lova, kan banphara, kan su ve ngawng ngawng mai \hin. Hnam dangte chuan an ze milin Pathian an chawimawia, an fakamai thin.

        Sap hla thluk kan saa, sap lam titih, vai lam titih in kan lamleh a, a hlimte pawhin hlim thiam harsa an ti thin niin alang. Rimawi chi hrang hrang leh Keyboard leh Drumset te pawh a that em em lai hian mizopa diktak chuan a ma thiam zawng ngeia lengkhawm hla thluk diktak nena Pathian fak chu nuam a ti ber nge nge thin. Chuvangin Pathian kan fak leh kan chawimawina kawngah hian kan hnam ze mil hian a tam thei angber hi her rem ila, Mizo-Sap Kristian, Mizo-vai Kristian ni lovin Mizo Kristian diktak kan ni reng thei ang.        Zirna lam: Rimawi rawngbawlna kan hman nasat poh leh inzir a ngai nasa tih hriat tel hi a finthlak ang. Chuvangin zirna lamah nasa leh zualin tan kan lak a ngai. tunah hian  William Booth Memorial School of Music kan nei a, a tha hle mai, kan Music zir pawh Royal College of Music nen inthlunzawm anih avangin a standard a sang hle. Hei aia thaa kan kalpui erawh chu a ngai.
       
        Zirtirtu qualified kan neih a ngai, thiam ringawt ni lo, Qualified Certificate nei hi kan rawih a tul. Chuchuan, kan Zirna In chu nasa takin a chawimawi a, miten pan tlak leh belh tlak a ni tih an hriat phah ang.
Changtlung zawk leh lian zawka kan buatsaih a pawimawh bawk, tunah hi  chuan part time ang mai leh a duh apiangin zirtheih ah pawh miten an ngailo. Khawvel ramdanga zirnate nen in ang renga siam hi kan tih makmawh a ni.Chutiang dinhmuna din tir chu thil harsa tak niin a langlo.

        Inkaihhruaina: Inkaihhruaina leh in awpna fumfe tak kan neih a pawimawh em em. THQ ah pawh hian Music council mumal taka kan neih a hun takzet tawh.*2 Territorial Music Council chuan Territory puma Music hmasawnna tur leh inkaihhruaina zawng zawng enkawl sela, Territory chhunga  Hla phuahtu leh music composerte chawikanna pawh ngaihtuah se a tul hle. Chutiang ang chiah chuan Division tinah hian Division Music council mumal taka din nise, an hnuaiah Corps music council pawh din nise.

        Chutianga Music council mumal tak leh nghet tak kan neih chuan, Hlabu buatsaih, Rally Hlabu siam leh Music School te chuan hmuh theihin hma a sawn ngei bawk ang. Rawngbawlna a hmalak dan tur pawh Council in ngun taka a ngaihtuah lawk hnu a nih chuan a hlawhtling ngeiin a rinawm bawk. Sipai Pawlte hi Khawvel huap pawha Music rawngbawlnaa hmahruaitu kan intih mek lai hian, kan ramah hi chaun kan in kaihhruai dan fel tawklohna avangin hnuchhuitu kan ni zawk mahin alang thin, chuvangin tan kanlak thar a pawimawh hle a ni.

    Praise & Worship:

        Tunlai \halaite leh naupang lamten an buaipui tak pakhat chu Praise & Worship hi a ni. Nuam an ti em em a, an hlimpui takzet niin a lang. He rawngbawlna hi a hlawk em em a, chutih rual chuan tundinhmun ah hi chuan Corps zawng zawng ten an ti theilo. Hmanrua neih a ngai a, Music thiam mi neih a ngai bawk. Zaithiam leh hetiang lama mi inpe awmlohna ah chuan thil tih harsa tak a ni ngei ang.

        Mahse, he rawngbawlna hian  Thalaite leh kum lama naupang zawkte a hip a nih si chuan theih tawpa kan chawi san a pawimawh tihna a ni. Chuvangin, Corps ah pawh Praise Team te din a, an rawngbawl dan tur ngaihtuah pui a, Thalai leh naupang zawkte hip khawm tura theihtawp chhuahpui hi kan tihtur a ni.*3 Tunlai Khawvel ah hian Thalaite in awm tleina tur tawk hi Khawlai ah hian atam hle mai, mani in chhung atangin khawvel an thlir thei a, pawn ah chhuak se an hlimna leh an duh zawng ber hi khawi lai ah pawh hian a awm vek ta mai. Chuvangin an tan Biak In kal chakna tur chhan hi a tlem tial tial a, an tan  Biakin chu a boring tlat tawh. chutiang chu an boruak a nih avangin an mahni hip thei chi a kan inkhawmna  leh kan kaldan te hi kan thlakthleng a tul takzet. An mahni hip tura engmah kan inbuatsaih siloh chuan kan hnawt tiau tihna ani ringawt ang. 19th Century hun lai hla leh music, congragational Hymn ringwt hian kan tunlai thalaite a kaiharh zo ta meuhlo chu a nih hi.An mahni kaihruaithei leh hip tur kan ngaihtuah siloh chuan  Corps a sipaite chu kum 60 chunglam chauh an nih hun ala herchhuak ngei ngei ang.

        Biak In inkhawm hi zai telo chuan a kim theilo, mizo hlimna chu zai ah a ni. Thlarau thianghlim pawlna changtute pawh hian an lanchuahtirna pawimawhber chu zai ani tih kan hrevek. Chuti chung chuan kan Inkhawm zai hi kan uluk lo hle a, kan khuang te pawh hi kan duatin kan enkawl ngunlo hle.Corps ah hian Music committee mumal tak din a hun takzet tawh, kan hlimna ber leh kan pherna ber music hi kan hlamchhiah vaih chuan kan hnungtawlh zel dawn tih hi thil chiangsa langreng chu a ni bawk. chuvangin vawiina kalkhawmte hian ngaihtuahna thar i hmang ang u.

Ahun mil zela insiamrem thin Sipai Pawl hian Thalaite ngaihven zawng leh tuina pawh hi a thlir tel renga, chuvangin kum 2003 vel daih awh khan Contemporay & Creative Arts Ministry hi a kalpui a, Commr.Robert Redhead te nupa chu hemi ah hian appointment pek hmasakber anni nghe nghe a nih kha.
   
        Anni kaihhruaina hnuaiah hian Khawvel pumh rawngbawlna thlakthleng a ni a,  tunlai hla chhuakthar leh thluk tharte, drama leh skit leh culture leh custom mila rawngbawlna hi a lo darh nasa ta em em bawk a ni.
        Kan hmabakah hian thil danglam tamtak a lo thleng dawn a, nun inthlakthlengna leh duhzawng leh uar zawng inthlak danglamna pawh a lo thleng ang. chutiang hunah chuan Sipai Pawl hian 19th Century Music ringawt hian kan mi te kan kaihruai thei dawnlo tih hi kan hrereng tur a ni. Chuvangin vawiinah hian naktuka kan awm dan tur kan siamfel vek a hun takzet a ni.

        Kan Biak In ah pawh hian Keyboard leh Drumset te, Electric Bass Guiter te nen zai kan kaihhruai hnu hian kan zai thawm a lo tha ta a, kan hlim sawt a, Upa zawkte tan ninawm ni silo, thangthar zawkte tana hne awm siloh, a lo ni ta. Chuvangin Biak In tinah hian keyboard emaw Music Instrument engemaw tal hi chu Pathian fak nana tih rik tel hi a pawimawh hle in ka hria.Hetih rual hian Corps Inkhawmna a zai kaihruaitu turte tan Training siamsak hi kan tihtur a ni bawk. Rimawi hman dan te, zai hruai dan te, kan inkhawm mila hla thlan chhuah dan te an thiam a tul a, chutiang taka hma kan lakpui chuan engtiklai pawhin hla key diklo, hla ngurchuai, inkhawmna nena hla thu in millo kan sa ngai lovang.

        Music Ministry hi Thalaiten buaipui hle mahse, thalaite tan chauh a nilo.Rual u zawkte tan hlei hlei hian a tha a, a pawimawh bawk chuvangin Corps council hian Praise team mumal tak din a tul a, rimawi hmanruate pawh a theih dan dana ngaihtuah hi an bat a ni. SAY ten theihtawp chhuahin an bei thin, kan hlawkpui zia pawh kan hrereng, an ni kutah chauh hian dah lovin Corps Buaipui chi ani tih hi kan hriat reng a pawimawh  em em bawk.
                                                         Heng hi Ngaihtuah teh


1.    Corps in Music bungraw lei nan sum a ui / ren lutuka, chu chuan harsatna nasa tak a thlen thin.
    Corps tinin Rimawi hmanrua leina tur leh a enkawlna tur hi Budget ah dah vek sela, Budget-a dah anih ang geiin hman ni ngei bawk se.

2.    Rimawi lama inhmangte hi kan rawngbawltu pawimawh an nih kan haider thin a, anmahni ah mipui ten hlutna kan siam saklo.
    Mipui hmaa vawikhat an inlan hma hian hun tamtak an seng tawh a, an sum leh pai senso pawh tamtak  ani thin. An tello in kan rimawite an rik theihloh chuan Corps hian ngaihlu thiam sela, dah pawimawh sela, rawngbawltu  mai nilo, mite thlarau chawk harhtu an nihna hi Corps hian tar chhuahsak thin se.

3.    Band Instrument hi hun engemawti hnu ah chuan a ri a inmil lova, a thara thlakangai thin a, mahse corps roreltute hi chuan a tlet chhung chu tha turah anngai mai a, chu chuan Tawtawrawt thar lei a ti har em em a, Band lama mawh phurtu leh Band pute a ti hnual nasa em em thin.
    Ngun tak leh duat taka enkawl anih chung pawh hian Tawtawrawt hi a ri diklo fo thin, a huhova ham anih avang hian ri inmil a pawimawh am chuavgnin Bandmaster ten theihtawp chhuah in an siam rem hram hram thin.Kum 5 a vei meuh hi chuan a thar lei angai ngeingei tluk ani a, tin a enkawl nan hian sum akal reng  bawka, Corps Band hman tur pawisa hi Budget ah dah sak vek nise.Budget ang ngeia hman ni bawk se.*4

4.    Zaipawl thiamtak ngaihthlak hi nuam kan ti a, mahse, mawi tak hla pakhat thiam tur hian vawi tamtak hla zir a ngai a, hla ziak siam nan sum tamtak sen a ngai bawk a, chung zawng zawng chu hriatpui lovin Corps roreltute hi an awm \hin.
    Zaipawl member 30 tan hla copy 30 a ngaia xerox man Rs.60/- a ni a, a spare tur leh an file tur nen hla pakhat zir tur buatsaihnan Rs100/- vel a ngai a, Hla sawm an sak chuan a tlemberah Rs.1000/- chu anseng ral vek tihna anih chu. Mahse chutiang chiah chu an ni e tiin Upa lamte hian an hriatpui ngailo. Khawi ami nge an zira khawi a pawisa in nge copy pawh an saim tih hi Council member zingah a hrelo an tam zawk hial ang.Chuti anih chuan tun atang chuan Zaipawl ho thingpui in man te, an File man turte, an hla copy man turte hi thawhpui ila, fuih ila, tanpui ila, veng ila, an rawngbawlnaah hian an va hlim leh zual dawn ve le.

5.    Music instrument thar eg.Guiter, Keyboard,drums etc te lei an ih hnu pawh hian rual u zawk ten thil bengchheng ringawt anga sawi an chinga, chu chuan rimawi ngaina tute a um tiau thin.
    Duh leh duat taka an lei, tlumtea  thlir taka an lo thlir thin an hmaa a han inchhawp ta chu, Thalaite hian nuam an ti, theih nise zan tairek thleng thlenga khawih chiau an chak, sual kawng zawh thinte, khawlaia teihawi maimai thinte, Biak In lam ngaihven tawhngailote pawh in chutiang bungraw thar khawih chu an chaka, “Lalpa in a nikhat awm hi a tha zawk” tih ang mai khan an awmchilh reng fo, an tuina leh anmahni koh hnaina atana chutiang chu lei kan nih theihnghilha Upa te an han tawng fak fak hian, kan member hla  lo let tan mekte chu a aia hlaah an um leng vawn vawn tawh thin. Chutianga ti lovin, zir hunbi leh khawih hunbi siamsaka, a zir dan kawhhmuh a, fuih a, theihtawp chhuahpui zawk tur kan ni.Chutianga kan tih ngat chuan Member hla an lo hnai anga, mi pangngaiah kan saimleh thei ang.

6.    Chhiat Ni / That ni ah te kan rimawite kan duh em em a, Khawlai inkhawmah te kan dah pawimawh em em a, mahse an mamawhber hmanrua lei belh emaw, music sheet siamsak emaw lamah chuan Corps hian a beng a chhu ngawng leh fo thin.
    Tawtawrawt a ni emaw, eng music hmanrua maipawh hi Corps ta ani a, a tum tu leh a hmang tute ta mai hi a ni biklo tih Corps hian a hriat a tul hle. Chhe thei, diklo thei, anih hi hre bawk sela, eng ang nge an mamawh, enge leibelh ngai tih hi Corps hianngaihven se, a hmangtute pawhin an duat sawt anga, an phur sawt ngei ang.

7.    Inkhawm apianga pawimawhber ni fo thin, Khuang puileh Khuang te te hian ngaihthah an hlawh em em a, Sialhawk Corps chuan a case mawi takin an siama, Bawng hmul pawr lang hauh lovin an siama, an ni hi kan territory a khuang duat ber an nimai thei hial!
8     A dul pawn a dul ang ang in kan vaw nawk nawk mai thin, chu chuan Corps Music Ministry hlanchhiah a nih zia a hril chiang hle awm e.
    Corps tinah hian a vaw thin bik chu an awm mai thei, mahse a vawtute ngei pawh hian  siam that emaw chei hnum emaw chu an tum kher lovang, chuvangin Corps hian a tel lova kan awm theih loh, kan khuang hi a enkawltu tur Connittee siam mai se. Chung committee chuan Khuang vuak Seminar te huaihawt sela, khuang pu tur midang chher chhuah ngei tumin tan la se, kan khuangin hma a sawn rualin a vawtu pawhin hma a sawn nghal anga, a vaw thiam pawh an pung bawk ang.

9    Corps music rawngbawlna ti hmasawn turin mi kan chher lova, a thiam ngaiin an thiama, a thiamlo erawh chuan an thiamlo char char thung.
    William Booth Memorial School of Music tha tak kan neia, mahse hetah hian thingtlang lammi an kai khat hle. Khawpui lam chauh in a hlawkna an tel niin alang hrih. corps tin ah hian rimawi lam tui mi an awm theuh va, chung mite chu tih hmasawn zel hi kan tihtur a ni a, chutih rualin a la thiamlote pawh thiamtir tum hi kan bat ani tel bawk. Thingtlang lammi tan chuan Corps in rimawi lam tui mi, tu emaw, corps hmingin Aizawl ah tir sela. Senso ngaite pawh tum sak hial sela, a nihloh vek leh, a chanve a zirtu in a chanve dang corps in emaw tum sela, thla khat tal Aizawl ah Keyboard tumdan, tawtawrawt ham dan, zai hruai dan, zaipawl kaihhruai dan etc zirin hun han hmang se, chu mi chuan a haw veleh, a corps chhunga thalai dangte zirtir chhawng ve leh sela, tichuan, khawpui thiamna leh thingtlang thiamna angkhat in a luang anga, Corps tinin a hlawkna kan tel ang.
    SAY te tan Music camp siam anih pawhin khawpui lam mi chah kher ngai lo leh, Khawmpui nikhuaa     YP/HL/SAY zaipawl intihsiak etc te pawh mahni kan in todelh thei ang.

10    Music rawngbawlna hi Thalaite tan chauh niin kan ngai.
He ngaihdan hi ngaihdan diklo a ni. Corps a Music rawngbawlna a chakna hmunh apiang ah Corps a chak. Zaipawlmember active mi 20 hian SAY member active lo 50 an hen. Band active tak hian Sipai Pawl chu enge a nih tih leh Sipai ze mawi chu an entir thin. In Biak in khuang a dul hnuk chuan in corps pawh an hlim lo nge nge. Inkhawm apianga zai thei, rimawi tum thei hla rem thei, mimal emaw pawl emaw an awm chhung chuan in corps chu a hlim hle ang. A nihna takah chuan Corps chak leh chaklo enna thaber chu rimawi ah an chak em tih hi ani.
11    Hla phuahtuleh music siamtute kan chaiwmawiin kan \anpui lova, an thiamna kan chhawr tak tak theilo.

    Kan Territory chhungah hian Music thiam tak tak leh hla phuah thiam tak tak an kat ve nuk a.Mahse, an mahni chawimawi leh fuihna kawngah hian hma kan la tawklo hle. Hla phuah thiamte leh Music siam thiamte hian an kutchhuakte chu Territorial Music Council ah thawn thin sela, Territorial Music council chuan ngun taka lo endikin, chhuah tlaka an ngaihte chu Territory puma kan thiam tlan theih nan a bu in ti chhuak thin sela, Kum khatah vawi 2/3 lai pawh tichhuak sela thil lawmawm tak a ni ang. Zaipawl Hruaitute rilru tibuaitu ber chu Hla thar a awmem tih hi englaipawhin a ni reng. Chuvangin kan hla phuahtute leh music siamtute hi nasa zawka an tan theih nan Territorial Music Concil chuan chak takin hma la rawh se.

 12    Zaipawl leh Bandte hian Sap hla emaw Sap hla lehlin emaw hi an sak leh an tumrik ber a ni a, Mizo Traditional leh Mizo hlate hi kan uar tawklo hle a, Sap ho phei chuan an thiamlo.

    Hla lehlin hi a thu pawh a mawilo duhlo hle a, a thluk a nalh vanga sak a tamber awm e. Band music phei chu Bandsmen ten an sawifiah hle anihloh phei chuan eng hla nge tih mizo in an hre manglo. Keimahni hla ngei an han tihrik chang erawh chuan mhrilhfiah ngai lovin, kan hrethiam veka, a mawi leh mawiloh thlengin kan hre thei.
    Hla tha tak tak kan nei a, heng kan hla te hi Band rual ten an ham theih tura kan siam chhuah ve hi a hun hle mai.Unity/Triumphonic etc Series in siam ve ila, chung kan music chu Khawvel ramdanga Band pute hian lo tum ve rawh se.Kan zaipawlten thiam taka an sak thin, kan Sipai hla tha tak tak kan mihuai kaltaten lungchim taka an lo phuah chhuahte hi Khawvel ramdanga Songster te sak theih tura siama, thehdarh hi  kan tih ve a hun  hle bawk ani.
    Mizo hla tha tak tak Mittui hnaptui nena kan sak thinte hi hnamdangte tana sak theih tura kan lehlin chhuaha, music pawh kan siam a pawimawh em em, tichuan Pathian Pakhat, General Pakhat, Music  pakhat hnuaiah rawng kan bawl tlang thei anga, kan mihuaite leh kan musician ten ram hlazawk leh kilkhawr zawka chanchintha hrilhna hun an nei tihna a ni bawk ang.