Thih thlengin aw...

“THIH THLENGIN AW..”

         “Kei chu ka inpeih ta! Aw.... Thihna, i lam ka lo hawi e, ka In ta, ka taksa leh ka nunna chu ka hmangaihber tan ka hlan e, I nu hnenah mawlh khan ngaihdam min lo dilsak ang che, ka tlin rei dawn talo, min hmuh hun chuan muhil mai mai emaw min ti anga, mahse ava barakhaih nasa dawn em!...”  a message chhut sa chu ahan thawn chhuak dawn a, mahse chakna a nei tlem lutuk tawh, nula pangngai ni thin khan messege thawn tur pawhin theihtawp chhuah a ngai ta. Thei leh theilovin number a han chhu a, mahse eng number nge a chhut a hre tawhlo, digit engzat nge a chhut a, tu number nge a chhut lah a hre tawh heklo.
  
        Tluangtea nen hian kum 6 pumhlum thak chu an lo im kawp ve tawh a, an inkar ah hian engmah thu zep pawh a awm tawh lova, kohhran mai ni lovin vantlang pawhin an inkawp zia hi chua an hre chiang em em tawh a, mahse miten mawilo an tih tur leh vantlang mit khama an awm miahloh avang erawh chuan mite fak an hlawh letling hial zawk a ni.

        Naupang a nih lai atangin Siami chu mite lawm hlawh tak a ni a, a lo nulat hnu hian an veng chhunga tanpui ngaite hi hmaih lovin a tanpui thin, tar leh upa te tan a in pe nasa hle a, thenawm khawvengte pawh in an fanu ang hialin an duat in an duhsak vek a ni. Office dawr turte, Upa ho pension buaipui ngai zawng zawngte pawh a kutah hian an dah vek a, chu mai bakah chuan Kohhran lamah Thalai OB te ni thinin zaipawl member hlun a ni a, YMA section hruaitute zingah kum tamtak a lo tel ve tawh bawk a, chuvangin vantlang pawhin an hrebel hle. Nulat tlangvalna lamah vawikhatmah la che mawilo ngailo, mai ni lovin tlang sawi kaiin a awm ngai lova chu chuan mite fak a hlawh phah lehzual bawk.

        Tluangtea nen an intawn hnu hian vawmbei ang maiin a rilru leh hmangaihna zawng zawng chu  Tluangtea hnenah hian a hlan vek a, a ni Tlaungtea lah Kohhran Thalai Hruaitu kumhlun, lehkhathiam leh tlangval ti zawk zawklo a lo ni bawk si, an inkawp chu mite pawhin inhmeh an ti a, mawi taka Kristian nula tlangval in kawp dan tur ang chiaha an han inkawp chu Thalai dangte pawhin thik a hnekin an lawmpui em em zawk thin a ni.

        Kohhran thiltih engkim maiah hian an inkawp zela, khawtlang huap thil tih ah pawh an inkawp chawt thin, chutianga an awmna chu kum 6 lai a lo ni ta! Innei tawh mai tura vantlangin an rin lai pawhin a chhan hriat siloh hian an la in nei chuang lova, thianghlim takin an la in kawp ve char char reng a ni.

  
        Tluangtea chu a hnaah a tul thin hle mai a, nitin mai hian hmanhmawh reng rengin a hun a hmang a,  inlam ah pa ber chan chang a ni bawk a, nilenga a hnathawhnaa a awm hnu hian in lamah    tul takin ni hi a hmangliam thina, tun hmaa an retheihna zawng zawngte pawh mangchhia ang maiin a bo tan ve zela, an chhungkua pawh chuan mi kam thuah  rualin kam an thuah thei ta a, nakin lawkah chuan hna tha zawkte ala hmu anga, tun ai hian an la changkang ngeiin an beisei ve a. Theihtawpin Kohhran lamah chuan ala inhmang ve renga,  rawngbawlna chu an dah pawimawh em avangin an in chhung khawsakna phu lovin an tei hawi tam phah hial reng a ni.
  
        Mahse, tlangval  hmeltha leh zei, nungchang tha leh ruih theih thil engmah ti ngailo chu nula lam chuan an lo hmelhriat hle mai hi a lo ni a, nakin  lawkah chuan duh em em tu Mary a tawng ta tlat mai, a tir lam chuan mite biak chhiat a duhloh avangin tha tak takin a bia a, an lo in kawm tlangnel zela, a hmeichhe lam in chhuah tum heklo le, Siami nen an inkawp dan zawng zawngte chu hre vek mahse, a haider tlata, hun remchang a siam ta fo mai a, dip tu awm hauh lova an in kawm chang a lo tam ta tial tial a, a tawpah chuan Mary chu a lo ruaklo ta der mai!

        Tluangte chuan ngun taka a han ngiahtuah pawhin a duh thusamin a awm lo tih a in hre chiang em em a, kum 6 lai rinawm taka a lo kawp tawh Siami chu thlauhthlak a phal thei ngang silo, lo kalsanin lo thlauhthla ta se Siami chuan a tuar na dawn lutuka, chu chu a ngaihtuah ringawt zawng pawhin a phal thei thlawt silo, chutih laiin Mary lah chuan a ruakloh thu a lo hrilh sek a, in hruai mai a lo rawt ve reng bawk si, khawvel hi a tan chuan a buai zo ta vek mai a, mahni chauhva awm pawhin a buai a, midangte nen an awm lai pawhin a buai tho si.

        Kohhran lamah lah chuan mawhphurhna sang zawk an bel kur nguaia, miten mi fel leh tha ah an ngai vek si, chutih laiin anih lah chuan Midang lakah lo in thlahdulin fa hial an lo pai ta si. Ngun taka a han ngaihtuah hnu in naute chu tihthlakmai an rel thlu ta a.

        Thiam tak leh zaidawh taka reife a thlem hnu chuan Mary pawh chuan a lo remti thei ta a, Damdawiin lamah kal turin an in chhawm chhuak ta, tum thum teh meuh Doctor an rawn hnu pawh chuan an beisei ang chu am hlawhtling thei ta tlatlo mai, naute chu a pian ngei a ngai ta si, Tluangtea rilru chu a hah em em thin a, a rukin a tuar tlawk tlawk thin.

        Mary’n naute a tih thlak theih chuan ngawi rengin a enkawlna senso zawng zawng a tumsak anga, tichuan Siami nen kumtluangin an inkawp thei tawh dawn emaw a tih laiin a beisei angloh tak thil a chunga a lo thlen tak avangin Tluangtea chuan tum dan leh kaldan tur pawh a hrethiam tawhlo. Siami han hruai ngawt dawn se, Anu in a duhlo em em si, chumai bakah chuan Kohhran Hruaitute zinga tel meuhin nupui han ruk chu miten engtin nge an ngaih dawn tih a hre thiam vek si a, Mary han hruai dawn se a duhloh zawk amahin a zar buai ngun em avang leh fianrial hun a pek hnem em avanga rai chauh a nisi. Kum 6 chhung rinawm taka a tan chauha lo inserh thianghlim Siami chu a zah em em a, a ngaisang bawk, a bum a ni tih leh midang lakah a phatsan a ni tih a hriat chhuah huna a tawrh nasat dan turte chu a rilru mitthla ah chuan a lang chuai chuai a, mahse hmalakna engmah a nei silo.

        Vawikhat chu Siamiten a nau Pass lawm turin an rawn sawm a, tlaiah chuan hlim takin zanriah an kil hova, Siami nen pawh chuan inpawh leh in ngai takin in thlahlel takin an inkawm a, midang an awm ve reng avangin engmah sawi hleih theih anih loh avangin in lamah pawh haw tawh chuang lovin Tluangtea chu a leng nghal a, zan dar 11:00 thleng rawk lengin Siami nen chuan an inkawm a, hlim tak leh  a tuk zana in hmu leh mai turin an in mangtha ta a ni.

        “Siami, Tluangtea khan nupui a ru an ti” tiin a thiannu  chuan zingkarah a rawn hrilh a, Siami chuan chhan ngaihna a hriatloh em avangin a nui mai a, mahse a rilru chuan thil tamtak a ngaihtuah a, nizan ah ka bul ah zanlai thleng dawnin a awm a, hlim takin kan in kawm a, in hmu leh mai turin kan in mangtha a, a theihloh reng reng min tih der a ni ang, ti tein a ngaihtuah a, tukthuan erawh chu a ei chak ta tlatlova, ei lovin a mu tamai mai a.

        Fehrehsan hun lai tak in, a ngaihtuahna ah chuan Tluangtea’n nupui a ru an tih kha a lo ri chhuak leh zawka, khawnge keimahngeiin ka han fiah teh ang, kum kha leh chen kha kan lo in zui tawh a,  A tan ka rinawm a, ka tanpawh rinawm em em in a in sawi a, thudik a nih ka ring chuanglo naa, amah tlawh pah ani bawk anga, ka han leng teh ang tiin a chhuak ta a. A kal pah chuan an sulhnu zawng zawng te a dawn kir a, an in tawn tantirh lai te, an in kawm fal hmasak bera “THIH THLENGIN AW..” ti a an i tiam dun laite kha a rilru ah a lo thar chuai chuai a, a thiannu in “Khawnge i kal dawn” ti a a lo zawh pawh chu a chhanglo tep a, “Khi tah” tih chauhin a chhang ta nghe nghe a ni.

        Awihlo tak chung si leh, a lo ni tak tak mai ang tih hlauthawng tak chung siin, Tluangtea te kawngkhar chu zawi te in a han kik karh karh a, a lut ta a, a han hawikual a, Tluangte Nu leh naupang tlem a hmu a, a han hawizau deuh a, Tluangtea chu pawr chap hian a lo thu a, a bulah chuan midang an lo thu ta tlat mai le.

        “A ni thei lo, ka awihlo, ka ringlo” tiin a rilru chuan a mit ngei pawh chu a ringhlel a, a hmangaih em em, Thihthleng pawha inhmangaih tur thu a lo tiam pui ngei mai chuan Mary chu a lo thutpui a, a mit a vai emaw tiin a han nuai thin a, mahse a tak tak a nisi. A ka chuan sawi tur a hre reng reng lova, a rilru erawh chuan kil tin angaihtuah chhuak vek a, A hmangaih Tluangtea chuan alo phatsan ta tih chu a thinlungah chuan hawrawp lian tawk tak hian a in ziak chiang kulh mai si. Khawvel hi tawp thut ang maiin a hria a, a bing chuk chuk a, engtin chiah nge a awm pawh a hre reng reng lo. Tluangte  Nu chuan a lo bia a, engtin nge a chhan pawh a hre tawhlo, mahse amah hmusit hmel taka melh kar chunga a duh zawng mi Tluangtea chuan a rawn hruai haw a ni tihte a ni chu lung ngailova a phu tawk leh a lawina tur awm tawk zawng tura a lo hrilh te chu a hre rei ruai chauh a ni.

        Rilru tawt em em in, an in lamah a haw thuai thuai a, khum ah a bawk thlawp a, a tap char char a, a hmangaihin a kalsan ta chu na a ti em em a, atan chuan Vanpui a lo chim ta. Dam chhan a nei talo. Tu tan nge a a nun tawh ang le? Nimin tlaiah pawh kan in ah chaw a ei a, nizan ah pawh hlim takin ka kiangah a awm a, ka tana a rinawm zia te min hrilh mawlh mawlh a ni lovem ni? Tunah midang ta ni turin mi phatsan ta mai a maw? Hrehawmna eng pawh lo thleng se, dodalna leh harsatna engpawh lothleng se Thih thlengin in hmangaih tlat ang aw tia kan tiam kha a der mai maw i lo chantir tak le? Aw ka va vanduai bik tak em! tiin Siami chu in ngaihtuah a, a in sut hlawphlawp renga, a chhungte chu tumah an awm lova, amah chauhva ina a awm lai a ni a, tanpui tu a beisei lova, hnemtu a ngai heklo, chhantu a mamawh lova, puitu a ko heklo, a engkima engkim a hmangaih Tluangtea chuan a kalsan tawh a, Khawvel hi a tan awm zia a nei tawh lo.
  
        Pangpar pawh in a lakah chuan a mawina a thup a, Khawvel pawh hi a zim lutuk ta, a nu leh pa leh a chhungte pawhin a lakah awmzia engmah an nei lova, a tana pawimawh ber, a dam chhan Tluangtea chuan a kalsan ta si.

        Hmangaihna hi ava hlu in ava mak si em! Siami hawina lam apiang chu a thim vek a, dam thlakhlelhna reng reng hi a nei tawhlo. Rinawm taka a hmangaih tana a nunna chu hlan mai loh chu tihtur a nei tawhlo. Thih thlenga hmangaih tura a tiam pui ngei chuan a lo phatsan tak si ah chuan amah tal chuan a ti hlawhtling tur ani tih chu a rilru ah a lian tlat tawh. No ruak a la a, Tur hlauhawm tak chu a chhung lut a, a hma ah chuan  a hung a, a ngaihtuah na chuan kiltin reng a hawl tawn zawk zawk a, lehkha leh a ziahna tur a la a, engber nge  aziah dawn a hre chuanglo, a ngaihtuah vang vang hnu chuan “ Ka nu leh Pa leh ka unaute u, ka thiltih ah hian min ngaidam hram ang che u” tih hi a ziak a, abak ziah tur a hrelo mai ni lovin, a ziak thei tawh thlawtlo a ni.

        Khawi nge a tawp nan tiin Tluangtea chu mobile a han biak pawh hram a tuma, mahse a be tlang thei silo, abeidawng chuan Tluangtea te chhung hnai tak, amah Tluangtea pawh a len luhna ber nula chu a han dial leh a, vawi thum lai a ring zo leh ta vek mai. Chutah beidawng em em in a phone chu a dah a, a rilru buai leh kiltin kiltang ngaihtuah chu thil pakhatah a in sawrbing leh ta a, “Thih thlengin...” a khum bula in mai tura a siam sa Tur hlauhawm tak chu a chawikang a, a thlir ngawih ngawih a, “Tluangte, I thutiamah chuan ding zolo vin min phatsan mah la, kei chuan ka phatsan lovang che, Thih thengin ka hmangaih ang che” tiin tur chu a in zo ta vek a, a pum alo sa hut hut a, a ngaithtuahna a bing chuk chuk a, a khawhmuh a hnai tual tual a, a mobile chu a han la leh a,  “Kei chu ka inpeih ta! Aw.... Thihna, i lam ka lo hawi e, ka In ta, ka taksa leh ka nunna chu ka hmangaihber tan ka hlan e, I nu hnenah mawlh khan ngaihdam min lo dilsak ang che, ka tlin rei dawn talo, min hmuh hun chuan muhil mai mai emaw min ti anga, mahse a va barakhaih nasa dawn em!...”  tih hi a chhu a, Tluangte hnen thleng tura thawn a tum laiin a khaw hmuh a chiang tawh lova, eng number nge a hmeh pawh a hre kim thei tawh tlatlo!

        Chutih laitak chuan a phone chu a lo ri a, Tluangtea te chhung nula kha  alo ni a, rei pawh an in be hman lova, ani chuan “I taksa leh thlarau tana pawi turin engmah in ti suh aw” a rawn ti a, mahse a tlai lutuk tawh. A  nih tur ang ang a ni zo tawh a, chu Tur hlauhawm tak chuan a fan tur zawng zawng a fanchhuak vek tawh tlat a ni.
            A ke a khur a, a ban a zawi zo ta, a khum ah chuan a bawk a, a pum a lo na ta tan ta bawk, a chhungte chu tumah an awm lova, a u te leh a nu chu lamhnaia an huan ah an kal a, a pa tar chak tawhlo tak chu thenawmte in lamah a leng chhuak bawk si, mahni chauh vin, Khawvel mi tawrha na ber mai chu a tuar mek a, a rilru chu a harh kar reng a, Tluangtea chu ala hmangiah reng ani tih pawh a hria a, ama tan chauha nung tura a in tiam tawh avangin, chu a thutiam chu a ti hlawhtling mek ani tih pawh a hria, peihlo chung chungin, a han mu rem a, a chhungten an hmuh hunah pawh muhil ang maia an hmuh theih nan a han in siamrem a, chiangkuangin engmah a hmu thei tawhlo, thim chu a lo hnai zel a, a pum na chu a zual tulh tulh bawk a, chutah a thim hlen ta!

        Thenawmte in vela leng apa chu a lo haw a, “Siami” a han ti a, “Siami” a han ti nawn leh a, mahse chhangtu an awm hauh lo. A pa chuan choka lam a han thlek vel a, tumah an lo awm lova, Sitting room lam a han en leh a, tumah an awm chuanglo. Bed room lam a han lut phei a, Siami chu tui em em a muhil ang mai hian a lo mu a, “Tho teh, mut hun pawh  anih loh hi” tiin a pa chuan a han kaitho mai dawn a, mahse a taksa chu alo vawt em em a, a kut  leh ke te chu a lo dum vek mai a, mang ang em em in thenawm khawveng an  a au khawm a, a rang thei ang berin Damawiin lam an panpui nghal ta rum rum a, huan lama an chhungte kal pawh an in ko va, veng chhunga an chhung khat laina pawh reilote ah an kim nghal thup mai. Damdawiin tual ah chuan lirthei chi hrang hrang a rawn in hung nghal sup sup a, chanchin ngai changin mipui chu an ngawi thup mai a ni.

        Nurse zam tha tak takte chuan a tul apiang an khawih nghal char char a, thi chhawnga let rengin  Siami chu a rawn meng a, a rawn harh leh tan ta, damlo awmpuitute chu pawna chhuak vek tura an tih avangin an chhuak sang sang hlawm a, chutih lai chuan nurse pakhat chuan Siami chu a bawihsawm mek a, fiah vaklo hian,  “Pathianin min la ngaidam duh angem?” a rawn ti a, Nurse chuan, “E, duh tehreng mai, A hnenah chuan ngaihdam dil la, tawngtai ta che” tiin zaidam takin alo hrilh a, Siami chu amaimitchhinga a ma hriat tawk leka zawiin Pathian hnenah chuan ngaihdam a dil a, chutih lai chuan achhungte chu luh an phalsak leh ta a, Siami’n a pa hmuh veleh chuan an in pawm vawng vawng a, “Ka pa min ngaidam rawh aw” alo ti a, a pa chu a hnuk a ulh nasa lutuka engmah a sawi hlei theilo, thei leh thei lovin “Siami ka ngaidam lutuk che” a ti thei tawk a, apa rilru ah chuan Siami pian lai te, a naupan laia kal a zirtir lai te, a lo lang chuai chuai a.

        Thlasik khua tiihtakah a vawt hle mai, mahse chutiang khawvawt hnuaiah pawh chuan an thiannu, an rawngbawlpui, an veng nula, an farnu chu enge a dinhmun tur chiah hriat theih ala nih loh avangin Damdawiin tualah chuan Thalai tamtawk tak hi an awm nghuk renga, makpa fel deuhte an phe char char bawk a, thuthar leh thu danglam a awm apiangin an in hrilh chawngnghal mur mur zel a, chutih lai chuan Siami chuan a riltam thu a rawn sawi a, Doctorte chuan Rosgulla ei se a tha ang an tih avangin an han lei nghal chuk chuk a, pakhat bak a ei thei chuanglo.

        A taksa chu a vawt em em a, mahse a lum a tih tlat avangin tui vawt ten an dep mek a, a hnung chu na a ti hle bawk a, a ke chu zutsak se a duh bawk, a tawng peih vak lova, a khawhmuh a chianloh avangin tumah a hre hrang heklo, amah avangin mipui tamtak Damdawiin tualah chuan an awm mek a ni tih pawh a hre heklo. Khua chu a tlai zela, a harh zel dawn emaw tia beiseina sang tak miten an neih laiin Siami hnar atang chuan bawlhhlawh a lo chhuak leh a, a chauh a zual ta tlat mai, zan dar 9:oo a nih meuh chuan a hmangaih em em, a nunna ai pawha a hmangiah, “Thih thlengin aw..” ti a, a lo tiam tawh tan ngei chuan a nunna hlu tak chu a hlan ta!

        Nu chang tap thawm a lo ri rawih rawih a, damdawiin tuala mipui awmkhawmhote pawh an nghing nghal luih mai, engkim mai chu a buai ta nuaih ni hian alanga, Siami a awm talo. Siami kan then ta. Damdawiin chhung leh pawn lamah chuan  tap thawm a ri chuah chuah a, nula leh tlangval hote pawh a ri in tap lo mahse an inhnit hlawp hlawp hlawm a, an thinlung a hneh hlawm hle mai, tlangval tlawmngaiten In lam singsa turin an hriattir vat a, Doctor lam ten tihfel tur an la neih avangin a ruang chu khumah chuan an zalh reng a, a hmel thatna leh a duhawmna te chu a la ngai vek a, mahse famkhua  a lawi ta si.
        Damdawiin atang chuan Tlangval tlawmngaite chuan a zawnin kan zawn thleng tur a ni tiin In thleng in an zawn a, mipui tamtak, Inchhung ah leh pawnah chuan an khat vek tawh, Siami ruangin an in a han den meuh chuan Pachang pawhin insum harsa an va ti em! Ama khum ngei ah a hmangaih ber tana anunna a inhlanna hmun ngeiah chuan an zalh a, reife chhung chu mipuite pawh chuan khawhar hla sa a zai chu an ti thei lova, an tap ngawih ngawih vek mai a ni.

        An veng chhunga nu valai leh Pa valaite, Thalai zawng zawng leh veng hla lama thenrualte chuan tlaivar thakin Siami ruang chu an men pui a, tui takin In khat tlatin an zai tlaivar a ni. Khua a lo var tan dawn ta tih ah chuan Paber rilru tawt chu a lo puak chhuak ta, patling rawl tapri a han rik meuh chuan zai chu sawiloh, hawi chhuak thei pawh an awm meuh talo. “Mate, thih thleng in aw ti a i tiamna chu i hlen ta maw? mahse i hlenchhuah dan hian min va ti lungngai si em!!!”

        Khawvela kan hmangaihber te, kan duhberte tan hian “thih thlengin aw..” tia kan tiam ngam ang hian, Mihringte Sual thuk taka pilbo lova kan awmna turin Isua Krista chuan, “Thih thlengin aw..” tiin a tuar a, chuvanga Nunna nei kan lo ni. Chutiang bawkin, keini pawhin, Khawvel thil mai mai a Thih thleng rawk khawpa kan in huam anih si chuan, kan tana Nun petu Krista tan chuan “Thih Thlengin aw ....kan ti ve dawn lawm ni.